Levítico 17 - Bible in Tzeltal de Oxchuc y Tenejapa

Jun nax ch'ul awilal

¹ Te Cajwaltic la sc'opon te Moisés, jich la yalbey:

² —C'opona te Aarón soc te snich'nabe, soc nix ta spisil te israeletic, albeya te jich la yal ta mandalteswanej te Cajwaltique:

³ “Mach'auc israelil ya me sta smul teme ya yac' ta milbil majt'anil jcojt' toro, jcojt' chij, o jcojt' tentsun te ya smil ta spat o ta yutil te campamento.

⁴ Teme ma ba ya yich'bon tel ta yochibal Nailpac' te banti ya quich' c'oponele, jo'on te Ajwalilon, swenta jmajt'an ta ch'ul awilal cu'une, ya me sta smul ta swenta bit'il la smal ch'ich'. Ja' yu'un ya me yich' loq'uesel ta yolil te slumale.

⁵ Te chambalametic ma me smilic ta yol q'uinal te israeletic te ya yac'bonic jmajt'anin, jo'on te Ajwalilone. Ya me sc'an ya yiq'uic bael ta stojol sacerdote ta yochibal Nailpac' te banti ya quich' c'oponele, swenta yu'un ya yac'bon jmajt'anin, ja' me te milbil majt'anil swenta lamal-o'tanile.

⁶ Te sacerdote ya me stsijts'anbeyic xch'ich'el ta scajtijib ta chiq'uel majt'anil cu'un jo'on te Ajwalilone, te ay ta stojol yochibal Nailpac' te banti ya quich' c'oponele, soc ya me xchic'bey te xepuil swenta chic'bil majt'anil te buen bujts'an yic' ta jtojol jo'on te Ajwalilone.

⁷ Tey ma'yuquix bi ora ya yac'beyic milbil smajt'an a te pucujetique, ja' te la xch'uunic ta neelal to soc ja' ta scaj te bolobenique. Ja' jmandal in to ma'yuc bi ora ya xlaj sc'oplal awu'unic, te ya me sc'an ya yich' ch'uunel yu'un tatiletic soc nich'aniletic ta cajalcaj bael.

⁸ “Soc mach'auc israelil, o jyanlumil te nainemic ta awolilic, te ya yaq'uic majt'anil te scojt'ol ya yich' chiq'uele, o yan milbil majt'anile,

⁹ teme ma ba ya yic' bael ta yochibal Nailpac' te banti ya quich' c'oponele, yu'un jmajt'an jo'on te Ajwalilone, ya me yich' loq'uesel ta yolil te yajwal lume.

Comel yu'un slo'el ch'ich'

¹⁰ “Jo'on me ya cac'bey smulin mach'auc israelil o jyanlumil te ay ta awolilic, teme ya slo' ch'ich', chican bila ya yut ya slo', ya me jloq'ues ta yolil te yajwal lume.

¹¹ Melel spisil te bitic cuxulique, ja' cuxul a te xch'ich'el ay ta sbaq'uetale. Jo'on cac'ojbeyex ta scajtijib ta chiq'uel majt'anil te xch'ich'el te chambalame, melel ja' ta swenta te ch'ich' te ya atojic a te ya xcol te acuxlejalique, melel ta swenta ch'ich' ya xtojob scolel te acuxlejale.

¹² “Ja' yu'un, ya calbeyex te israelexe: Te ja'exe ma me ayuc jtuluquex, soc ni ja'uc te jyanlumetic ayic ta awolilique, te ya xju' ya alo'ic te ch'ich'e.

¹³ Mach'auc israelil, o jyanlumil te ay ta awolilique, teme ay ya smil ja'mal chambalam o ja'mal mut, te lec ta ti'ele, ac'a smalbey te xch'ich'el te bila la stsaque, soc ac'a me smucbey ta lum,

¹⁴ melel ta ch'ich' cuxul te bitic cuxulique. Ja' yu'un la calbeyexix te ma xju' ya alo'ic te ch'ich'e, melel ja' cuxul spisil a te bitic cuxulique. Mach'auc a te ya slo'e, ya me yich' loq'uesel ta yolil te yajwal lume.

¹⁵ “Mach'auc israelil, o jyanlumil, teme ya sti'bey sbaq'uetal lajem chambalam, o teme ya sti'bey sbaq'uetal te ixlanbil yu'un yan jti'awal ja'mal chambalame, ya me sc'an te ya sac' te sc'u'-spac', soc ya me spoc sba ta ja', soc ma ba lec sc'oplal ya xjil c'alal yijc'ubel q'uinal. Patil lecubtesbil me sc'oplal ya xjil.

¹⁶ Pero teme ma ba ya sac' te sc'u'-spaq'ue, soc teme ma ba ya spoc sba ta ja', xcuchoj me ya xjil te smule.” Jich me ya xc'o awal ta stojolic —xi' te Cajwaltique.