Levítico 15 - Bible in Tzeltal de Oxchuc y Tenejapa

Te mandaliletic yu'un teme ay bila ma lecuc ya xc'ot yu'un te winique

¹ Te Cajwaltic la sc'opon te Moisés soc Aarón, jich albotic yu'un:

² —Albeyaic te israeletic: “Teme ay winic te ay bila ya xmal loq'uel ta sjol te sbaq'uetale, ma ba lec sc'oplal ya xjil yu'un.

³ Te bit'il ma ba lec sc'oplal yu'un te bila ya xmale, jich ay: Manchuc me ya xmal loq'uel ta sbaq'uetal, manchuc ya xmajc' ta sbaq'uetal te ma xmal loq'uele, pero puersa me ma ba lec sc'oplal ya xjil yu'un.

⁴ “Te wayibal ya xway a te winic te ay bila ya xmal yu'une, ma ba lec sc'oplal ya xjil. “Soc te banti ya xnajc'aj, ma ba lec sc'oplal ya xjil yu'un.

⁵ “Mach'auc a te ya spic te banti way te winique, ya me sc'an te ya sac' te sc'u'-spaq'ue, soc ya me spoc sba ta ja', soc ma ba lec sc'oplal ya xjil c'alal yijc'ubel q'uinal.

⁶ “Teme ay mach'a najc'aj tey a te banti te winique, ya me sc'an te ya sac' te sc'u'-spaq'ue, soc ya me spoc sba ta ja', soc ma ba lec sc'oplal ya xjil c'alal yijc'ubel q'uinal.

⁷ “Teme ay mach'a ya spic te winic ay ta wocol yu'un te ay bila ya xmal yu'une, ya me sc'an te ya sac' te sc'u'-spaq'ue, soc ya me spoc sba ta ja', soc ma ba lec sc'oplal ya xjil c'alal yijc'ubel q'uinal.

⁸ “Teme ay ya stubtay te winic te lec ay sc'oplal, te mach'a ya xtubtayot ya sc'an te ya sac' te sc'u'-spaq'ue, ya me spoc sba ta ja', soc ma ba lec sc'oplal ya xjil yu'un c'alal yijc'ubel q'uinal.

⁹ “Teme ay ya stuuntes montura te winic ay ta wocol yu'un te bila ya xmal yu'une, ma ba lec sc'oplal ya xjil yu'un.

¹⁰ “Teme ay mach'a ya spic te banti najc'ajem te winic te ay ta wocol yu'un te bila ya xmal yu'une, ma ba lec sc'oplal ya xjil c'alal yijc'ubel q'uinal. “Teme ay mach'a ya yich' bael te biluquetique, ya me sc'an ya sac' te sc'u'-spaq'ue, soc ya me spoc sba ta ja', ma ba lec sc'oplal ya xjil c'alal yijc'ubel q'uinal.

¹¹ “Teme ay mach'a ya xpicot yu'un te winic te ay ta wocol yu'un te bila ya xmal yu'une, teme ma ba spocoj te sc'abe, ya me sc'an te ya sac' te sc'u'-spaq'ue, soc ya me spoc sba ta ja', ma ba lec sc'oplal ya xjil c'alal yijc'ubel q'uinal.

¹² “Teme ya spic pac'bil oxom te winic yac ta wocol yu'un te bila ya xmal yu'une, ac'a me yich' wuyel ta jc'axel. Jich nix te biluquetic pasbilic ta te', ac'a me yich'ic poquel ta lec.

¹³ “Teme ya xlecub te winic te ay swocol yu'un te bila ya xmal yu'une, ya me yajtay juqueb c'aal yu'un ya yich' lecubtesel sc'oplal, ya me sac' te sc'u'-spaq'ue, soc ya me spoc sba ta ja' ta ya'lel sloq'uibja' te yac ta oque, jich me lecubenix sc'oplal ya xjil.

¹⁴ Ta swaxaquebal c'aal ya me stsac tel cheb puliwoquetic o cheb alal stsumutetic, ya me xbajt' ta stojol te yochibal Nailpac' te banti ya yich' c'oponel te Diose, swenta yu'un ya yac'bey ta sc'ab sacerdote ta stojol te Cajwaltique.

¹⁵ Te sacerdote ya me yac' jcojt' swenta milbil majt'anil yu'un mulil, te yane swenta majt'anil te scojt'ol ya yich' chiq'uele. Jich me ya spas ta stojol Cajwaltic ta swenta slecubtesel sc'oplal te winic ay bila mal yu'un ta sbaq'uetale.

¹⁶ “Teme ay winic te ya xmal loq'uel yu'un ta sjol sbaq'uetal te ya'lele, ya me spoc sba ta ja' scojt'ol, soc ma ba lec sc'oplal ya xjil c'alal yijc'ubel q'uinal.

¹⁷ “Teme ay ya xmal ta c'u'il o nujc'ul te ya'lel sbaq'uetal te winique, ya me yich' poquel ta ja', soc ma ba lec sc'oplal ya xjil c'alal yijc'ubel q'uinal.

¹⁸ “Te winic soc ants te ya sta sbaique, ya me spoc sbaic xchebalic ta ja', ma ba lec ya xjilic sc'oplal c'alal yijc'ubel q'uinal.

Mandaliletic yu'un teme ay bila ma lecuc sc'oplal ya xc'ot yu'un te antse

¹⁹ “Teme ya sta yorail te ya yil xchamel swenta jujun u te antse, ma ba lec sc'oplal ya xjil juqueb c'aal yu'un. “Mach'auc a te ya xpicot yu'un te antse, ma ba lec sc'oplal ya xjil c'alal yijc'ubel q'uinal.

²⁰ “Biluc ya swayibin te c'alal yac ta yilel xchamel swenta jujun u te antse, ma ba lec sc'oplal ya xjil yu'un. “Biluc a te ya snactibine, ma ba lec sc'oplal ya xjil yu'un.

²¹ “Mach'auc a te ya spic te banti waye, ya me sc'an te ya sac' te sc'u'-spac' soc ya me spoc sba ta ja', soc ma ba lec ya xjil sc'oplal c'alal yijc'ubel q'uinal.

²² “Te mach'a ya spic te biluc la snactibin a te antse, ya me sc'an te ya sac' te sc'u'-spac' soc ya spoc sba ta ja', soc ma ba lec sc'oplal ya xjil c'alal yijc'ubel q'uinal.

²³ Teme ja' ya spic te banti mejts'aje, o ja' te banti najc'aje, puersa ma ba lec sc'oplal ya xjil c'alal yijc'ubel q'uinal.

²⁴ “Teme ay winic ya xway soque, ma me lecuc, juqueb me c'aal ma ba lec sc'oplal ya xjil yu'un te winique. Ja' nix jich te banti ya smejts'an sbae.

²⁵ “Teme ay ants te ay ch'ich' ya xc'ax yu'un te c'alal ma yorailuc a te xchamel swenta jujun u, teme bayal c'aal ya xjalaj soque, o teme ja' nix te xchamel swenta jujun u te c'axem jich ya xjalaj a te bit'il stalel aye, ma ba lec sc'oplal te jayeb c'aal ay te ch'ich'e, jich nix te bit'il ya yil xchamel swenta jujun u.

²⁶ “Ta bayuc ya xway, soc biluc a te ya snajc'an sba a te ants te c'alal ay te ch'ich' yu'une, ma lecuc sc'oplal ya xjil yu'un, jich nix te bit'il ya yil xchamel swenta jujun u.

²⁷ “Mach'auc a te ya spic te biluquetique, ma ba lec sc'oplal ya xjil yu'un, ya me sc'an te ya sac' te sc'u'-spac' soc ya me spoc sba ta ja', soc ma ba lec sc'oplal ya xjil c'alal yijc'ubel q'uinal.

²⁸ “Te c'alal ya squejch'aj ta jc'axel te ch'ich'e, ya me yajtay juqueb c'aal te antse, tey to me lecuben sc'oplal ya xjil a.

²⁹ Ta swaxaquebal c'aal ya me stsac tel cheb puliwoquetic o cheb alal stsumutetic, ya me yich' bael ta stojol sacerdote ta stojol te yochibal Nailpac' te banti ya yich' c'oponel te Diose.

³⁰ Te sacerdote ya me yac' jcojt' swenta milbil majt'anil yu'un mulil, te yane swenta majt'anil ta scojt'ol ya yich' chiq'uele. Jich me ya spas ta stojol Cajwaltic te sacerdote ta slecubtesel sc'oplal te ants te c'ax yu'un te xchamele.

³¹ Jich me ya awaq'uic lecubuc sc'oplal yu'un a te sbaq'uetalic te israeletique, swenta yu'un jich ma ba ya sboltesbonic sc'oplal te awilal ta banti nainemon ta yolilique, soc jich ma ba ya xlajic yu'un a.” Jich me ya xc'o awalic ta stojolic —xi' te Cajwaltique.

³² Ja' te bitic ya sc'an ya yich' pasel te mach'atic ya staic wocol yu'un te ay bila ya xmal loq'uel ta sbaq'uetalique, soc te winiquetic te ay bila ya xmal loq'uel ta sjol sbaq'uetalic te ma lecuc sc'oplal ya xjil yu'une.

³³ Ja' nix me jich te antsetic te ya yil xchamel swenta jujun u, soc mach'auc a te ay bila ya xmal loq'uel ta sbaq'uetal, manchuc winic o ants, soc te winiquetic te ya xwayic soc ants te bi ora yac ta yilel xchamel swenta jujun u.