Levítico 13 - Bible in Tzeltal de Oxchuc y Tenejapa

Sc'oplal te chamel te ya xchicnaj ta jnujc'uleltic

¹ Te Cajwaltic la sc'opon te Moisés soc Aarón, jich albotic:

² —Teme ay mach'a sijt'em te sbaq'uetale, teme saluben, teme yac ta bolobel snujc'ulel yilele, o teme ay sc'a'el te jich yilel te bit'il c'a'el-chamel, ya me yich' iq'uel bael ta stojol sacerdote Aarón, o ja' te sacerdoteetic te ja' patil alnich'anetic yu'une.

³ Te sacerdote ya me stsajtay yil ta lec te chamel ay ta snujc'ulel, teme sacuben te stsotsil ta banti ay te xchamele, soc teme pujulix ochel yu'un te snujc'ulele, mero ja' me te c'a'el-chamele. Teme la stsajtayix yil ta lec te sacerdote, ya me yal ta jamal te ma lecuquix sc'oplale.

⁴ “Teme sac te banti boloben te snujc'ulele, pero teme ma ba pujul ochel yu'un te snujc'ulele, soc teme ma ja'uc sacuben te stsotsile, te sacerdote ya me smac juqueb c'aal te mach'a ay ta chamele.

⁵ C'alal ya xloc' juqueb c'aal, ya me xcha'tsajtay xan yil ta lec. Teme stalel jich ay te xchamele, teme ma ba pujq'uem bael ta snujc'ulel, ya me xcha'mac xan juqueb xan c'aal.

⁶ C'alal ya xloc' juqueb c'aal, ya me xcha'tsajtay xan yil ta lec yan buelta. Teme yac ta c'un ch'ayel bael te xchamele, soc teme ma ba yac ta pujq'uel bael ta snujc'ulel, te sacerdote ya me yal ta jamal te lequix aye, melel jich c'oem te bit'il yu'un nax tsajuben te snujc'ulele. Ja' yu'un te jchamele ya me sac' te sc'u'-spaq'ue, jich me lecubenix sc'oplal ya xjil.

⁷ “Yan teme yac ta pujq'uel ta scojt'ol sbaq'uetal ta snujc'ulel te mach'a ay ta chamele teme la stsajtayix a te sacerdote, soc te la yalix ta jamal a te lecubenix sc'oplal te mach'a ay ta chamele, ya me xcha'bajt' xan ta stojol sacerdote, swenta yu'un ya xcha'tsajtayot ta lec yu'un.

⁸ Teme la yil te sacerdote te yac ta pujq'uel bael ta sbaq'uetal te mach'a ay ta chamele, te sacerdote ya me yal ta jamal te ma lecuc sc'oplal te mach'a ay ta chamele. Melel te chamel yich'oje, ja' te c'a'el-chamel te ma squejch'aje.

⁹ “Teme ay mach'a tsacbil ta chamel te snujc'ulele, ya me yich' iq'uel bael ta stojol sacerdote.

¹⁰ Te sacerdote ya me stsajtay yil ta lec, teme yac ta sacubel te sijt'emal te snujc'ulele, soc teme yac ta sacubel te stsotsile, teme chican ta ilel te sijt'emale,

¹¹ ja' me te c'a'el-chamel ya xjajch' ta jnujc'uleltic te ma squejch'aje. Ja' yu'un te sacerdote ya me yal ta jamal te ma lecuc sc'oplal ay yu'un te xchamele, ma puersauquix te ya smaque, melel ma lecuquix sc'oplal.

¹² “Teme ora nax ya xpujc' bael te c'a'el-chamele, teme ya sc'an ya xpotsbot jajch'el ta yacan c'alal ta sjol te mach'a ay ta chamele,

¹³ te sacerdote ya me stsajtay yil ta lec. Teme potsbotix scojt'ol sbaq'uetal yu'un te chamele, te sacerdote ya me yal ta jamal te lec ay sc'oplale, melel te chamele sacubix, ja' yu'un lecubix sc'oplal te mach'a ay ta chamele.

¹⁴ Pero teme ay bi ora chicnaj ta sbaq'uetal te yac ta loq'uel ya'lel te yejch'ene, ma me lecuc sc'oplal ya xjil.

¹⁵ Te sacerdote ya me stsajtaybey yil ta lec te yejch'en te ay ya'lele, ya me yal ta jamal te ma lecuquix sc'oplale. Melel te yejch'en te ay ya'lel ma ba lec ay sc'oplal, ja' me te c'a'el-chamele.

¹⁶ “Teme ay bi ora cha'sacub xan yan buelta te yejch'en te ay ya'lel, te mach'a ay ta chamel, ya me xbajt' ta stojol sacerdote,

¹⁷ swenta yu'un ya stsajtay yil ta lec. Teme ya yil te sacerdote te sacubenix te banti boloben te snujc'ulele, ya me yal ta jamal te lecubix sc'oplal te mach'a ay ta chamele, melel lecubenix sc'oplal jilel.

¹⁸ “Teme ay mach'a ya xjajch' ta bolobel te snujc'ulel, pero teme ya xc'axe,

¹⁹ teme ay to sijt'em soc sac ya xjil te banti ya xc'axe, o teme ay to saluben te sac o tsaje, ya me sc'an te ya xbajt' ta stojol sacerdote.

²⁰ Teme ya yil te sacerdote te ja' pujulix ochel te banti bolobene, te ja' toyol ay te snujc'ulel ay to jileme, soc teme sacubenix te stsotsile, ya me yal ta jamal te ma lecuc sc'oplal te mach'a ay ta chamele, melel te chamel yich'oje ja' te c'a'el-chamele.

²¹ Teme ya yil te ma'yuc sacuben stsotsil te banti c'ot te chamele, soc teme ma ba pujul ochel te snujc'ulel te lec to aye, teme yac ta ch'ayel baele, ya me smac juqueb c'aal te mach'a ay ta chamele.

²² Teme yac to ta pujq'uel bael ta snujc'ulel te bila amen ay ta sbaq'uetale, te sacerdote ya me yal ta jamal te ma lecuc sc'oplal yu'un Dios te jchamele, melel ja' te c'a'el-chamele.

²³ Yan teme ma ba yaquix ta bolobel bael te banti ay te chamele, yu'un me ja' nax yac ta t'ot'obel te banti c'ax te chamele, te sacerdote ya me yal ta jamal te lec ay sc'oplale.

²⁴ “Teme ay mach'a c'ajq'uem te snujc'ulel, teme ay sac soc tsaj, o teme sac, te banti c'ajq'uem te sbaq'uetale,

²⁵ te sacerdote ya me stsajtay yil ta lec. Teme yac ta sacubel stsotsil te banti ay te chamele, soc teme ja' pujulix ochel te snujc'ulel te banti ay te chamele, teme ja' toyemix jilel te snujc'ulel te banti leque, yu'un ja' te c'a'el-chamel te ya xjajch' ta jnujc'uleltic te banti c'ajq'ueme; te sacerdote ya me yal ta jamal te ma lecuc sc'oplal, melel ja' te c'a'el-chamele.

²⁶ Te c'alal ya stsajtay yil ta lec te sacerdote te banti ay te chamele, teme ma'yuc yac ta sacubel stsotsil soc te ma ba pujul ochele, teme ma ja'uc toyol yac ta jilel te snujc'ulele, teme yaquix ta c'un ch'ayel baele, ya me smac juqueb c'aal te mach'a yich'oj chamele.

²⁷ C'alal ya sts'acaj te juqueb c'aale, ya me stsajtay yil ta lec te sacerdote: teme yaquix ta pujq'uel bael ta snujc'ulele, jich ora ya yal ta jamal te ma ba lec ay sc'oplal te mach'a yich'oj chamele, melel ja' te c'a'el-chamele.

²⁸ Pero teme ma ba yac ta pujq'uel bael ta snujc'ulele, teme yac ta c'un ch'ayel baele, yu'unix ja' nax sijt'emal a te banti c'ajq'ueme. Ja' yu'un te sacerdote ya me yal ta jamal te lec ay sc'oplal te mach'a ay ta chamele, melel ja' nax jich ay yu'un te yac ta smaquel sba te banti c'ajq'ueme.

²⁹ “Teme ay ants o winic te ay ejch'en ta sjol, o ta yalan'e,

³⁰ te sacerdote ya me stsajtay yil ta lec te ejch'ene. Teme pujul ochel te snujc'ulel soc teme c'anix jtebuc te stsotsil soc teme ma'yuquix bayale, te sacerdote ya me yal ta jamal te ma ba lec ayix sc'oplal, melel yich'oj te c'a'el-chamel te ya xjajch' ta jolole, soc ta yalan'e.

³¹ Te c'alal ya stsajtay yil ta lec te sacerdote te banti ay te ejch'en, teme ya yil te ma ba pujul ochel te snujc'ulele, soc te ma'yuc yijc'al tsotsile, ac'a smac juqueb c'aal te mach'a yich'oj chamele.

³² Ta sjuquebal c'aal, te sacerdote ya me stsajtay xan yil ta lec te ejch'ene. Teme ma ba pujq'uem te ejch'ene, soc teme ma ba pujul ochel te snujc'ulele, soc te ma'yuc sc'anal tsotsile,

³³ ya me yal mandal te sacerdote te ya xjoxbey te stsotsil sjol soc te yisime. Yan te banti ay te ejch'ene, ma me xjoxbey stuquel. Patil ya me amac xan juqueb c'aal.

³⁴ C'alal ya xc'ax te juqueb c'aale, te sacerdote ya me xcha'tsajtay xan yil ta lec te ejch'ene. Teme ma ba pujq'uem te ejch'ene, soc teme ma ba pujul ochel te snujc'ulel, te sacerdote jich ora ya yal ta jamal te lecubenix sc'oplal te mach'a ay ta chamele, ya me sac' te sc'u'-spaq'ue, jich me lec sc'oplal ya xjilix a.

³⁵ Yan teme ay yac ta pujq'uel ta snujc'ulel te chamel te c'alal la yich'ix alel a te lec ay sc'oplale,

³⁶ te sacerdote ya me xcha'tsajtay xan yil ta lec te mach'a yich'oj chamele. Teme pujc' bael ta snujc'ulele, ac'a me sle yil teme ay sc'anal tsotsile. Teme aye, ma ba lequix sc'oplal.

³⁷ Yan teme ya yil te yaquix ta quejch'ajel te chamel, soc loq'uemix te yijc'al tsotsile, ja' seña te yaquix ta colele. Ja' yu'un te mach'a ay ta chamele, lecubenix sc'oplal. Jich ora te sacerdote ya me yal ta jamal te lec ayix sc'oplale.

³⁸ “Teme ay ants o winic te ay sacuben te snujc'ulele,

³⁹ te sacerdote ya me stsajtaybey yil ta lec te snujc'ulele. Teme ya stabey jtebuc sacsactic yijc'ale, ja' nax me chin yac ta chicnajel loq'uel ta snujc'ulel. Teme jich aye, yu'un me lec ay sc'oplal stuquel.

⁴⁰ “Teme ay winic te ya xlubaj te stsotsil sjole, teme t'axal ya xjil te sjole, te winic lec me ay sc'oplal stuquel.

⁴¹ Teme ya xlubaj te stsotsil sjol ta sti'ba, teme t'axal ya xjil te sti'bae, lec me ay sc'oplal.

⁴² Yan teme ay ya xchicnaj chamel te jich yilel te sac o tsaj ta banti lubajem stsotsile, teme ta sti'ba, o teme spat jole, yu'un me yac ta jajch'el a te c'a'el-chamele.

⁴³ Ja' yu'un te sacerdote ya me stsajtay yil ta lec, teme sac o tsaj te sijt'emal te chamel ay ta banti t'axale, jich nix te bit'il ya spas te chamel ta snujc'ulel te baq'uete,

⁴⁴ ja' yu'un te winic yich'oj c'a'el-chamel, melel ay xchamel te sjole. Ma ba lec ay sc'oplal te winique, jich me ya yal ta jamal te sacerdote.

⁴⁵ “Te mach'a yich'oj te c'a'el-chamele, ya me sc'an te ch'i'em te sc'u'-spac' ya slape, t'anal stuquel te sjole, soc olil macal te yelawe. Ya me x'awun: “¡Ma lecucon! ¡Ma lecucon!” xi' me.

⁴⁶ Te jayeb c'aal yich'oj te chamele, “ma lecuc”, xi' me sc'oplal; soc stuquel me ya xnain ta spat campamento.

⁴⁷ “Teme ay ya xchicnaj stotol ta pac' pasbil ta lana o ta lino,

⁴⁸ teme ya xchicnaj ta jalbil pac' pasbil ta lino, ta lana, teme ya xchicnaj ta nujc'ul, o ta yantic biluquetic te pasbil ta nujc'ule,

⁴⁹ te stotol ay ta biluquetique, teme yax, o teme tsaje, seña me te ayix stotole. Ya me sc'an te ya xba yac'bey yil te sacerdote.

⁵⁰ Te sacerdote ya me stsajtay yil ta lec te bila chicane. Ya me smac juqueb c'aal te biluquetic te ay seña chamel tey ae.

⁵¹ Ta sjuquebal c'aal ya me stsajtay yil ta lec te señail aye; teme pujq'uemix ta c'u'il-pac'al, o te bila jalbile, ta nujc'ul, o te biluquetic pasbil ta nujc'ule, seña me te ja' stotol te ya xlajinwane soc te ma lecuc sc'oplal te biluquetique.

⁵² Spisil te biluquetic ya me yich' chiq'uel ta jc'axel, melel ja' me te chamel te ya xlajinwane.

⁵³ Pero teme ya stsajtay yil ta lec te sacerdote, teme ma ba yac ta pujq'uel bael te chamele,

⁵⁴ ya me yal mandal te ya yich' saq'uel te biluquetic te banti ay te chamele, soc ac'a me majc'uc xan juqueb c'aal te biluquetique.

⁵⁵ “Te c'alal la yich'ix saq'uel a te banti bolobene, ya me stsajtay xan yil ta lec te sacerdote. Teme ya yil te ma ba ch'ayem te banti bolobene, yu'un ja' me te chamel ya xlajinwane, te biluque ya me yich' chiq'uel, manchuc teme ma ba pujq'uem bael, melel yu'unix ochem bael ta yolil a, jich ta yutil soc ja' nix jich ta spat.

⁵⁶ Te c'alal ya stsajtay yil ta lec te sacerdote, teme yac ta ch'ayel bael yu'un te la yich' saq'uel, ac'a xch'i' loq'uel te banti chicnaj seña ta c'u'il-pac'al, o ta jalbil pac', o ta nujc'ule.

⁵⁷ Yan teme chicnaj xan yan buelta, teme ya xpujc' bael ta c'u'il-pac'ale, ta jalbil pac', o ta biluc te pasbil ta nujc'ule, ya me yich' chiq'uel ta jc'axel te bitic biluquil te ay bila chicnaj tey a.

⁵⁸ Te c'u'il-pac'al, jalbil pac', o biluc a te pasbil ta nujc'ule, teme ch'ay te seña yich'oj te c'alal la yich' saq'uele, ya me yich' xan saq'uel junuc xan buelta, jich to me lecubenix sc'oplal ya xjil —xi' te Cajwaltique.

⁵⁹ Ja'ic te bitic ya sc'an pasel teme ay señail c'a'el-chamel te ya xchicnaj ta c'u'il-pac'aletic pasbil ta lana, teme pasbil ta lino, teme jalbil pac', o biluquetic te pasbil ta nujc'ule, swenta yu'un jich ya xju' ya yich' alel ta jamal a teme lec sc'oplal, o teme ma lecuc sc'oplal.