Levítico 10 - Bible in Tzeltal de Oxchuc y Tenejapa

Smul Nadab soc Abiú

¹ Te Nadab soc Abiú, ja' te snich'nab Aarón, ta juju-jtul la stsac te yawil yac'alic, la yac'beyic c'ajc' soc spomil, la yac'beyic smajt'anin te Cajwaltique, pero te c'ajc' la yaq'uique, ma ja'uc smandal te Cajwaltique.

² Ja' yu'un loc' tel c'ajc' ta stojol Cajwaltic, jc'axel lajic ta chiq'uel, jich lajinotic yu'un te Cajwaltique.

³ Patil te Moisés jich la yalbey te Aarón: —Ja' ay ta yo'tan Cajwaltic te c'alal jich la yale: “Te mach'atic ya xnoptsajic ta jtojol, ya me cac'bey yilic te jo'on te Ch'ul Diosone; ta spisil te israeletic ya me cac'bey yilic te xojobil cutsilale”, te xie —la yut. Te Aarón, ma ba c'opoj yu'un.

⁴ Te Moisés la yic' tel te Misael soc Elzafán, snich'nab Uziel, stajun Aarón, jich la yalbey: —La', loq'uesaic bael ta ch'ul awilal te awermanotac te lajemiquixe, loq'uesaic bael ta spat campamento —la yut.

⁵ Jich noptsajic tel. Ta snajt'il c'u'ic nix la sliquic bael te animaetic, la sloq'uesic bael ta spat campamento, jich nix te bit'il albotic yu'un te Moisese.

At'elil ay ta swenta spasel sacerdoteetic

⁶ Te Moisés jich la yalbey te Aarón soc te snich'nabe, ja' te Eleazar soc Itamar: —Tesbiluc me ajolic, soc ma me xach'i' ac'u'ic swenta seña mel-o'tan, swenta yu'un ma orauc ya xlajex, soc ma orauc ya yac' tel yilimba Dios ta stojol te israeletique. Yan te awermanotac te jun ats'umbalic soque, soc spisil te israeletique, ya xju' ya yaq'uic ta ilel te ya smel yo'tanic yu'un te mach'atic lajic ta c'ajc' te la yac' tel te Cajwaltique.

⁷ Soc te ja'exe ma me xc'ubex bael ta yochibal te Nailpac' te banti ya yich' c'oponel te Cajwaltique, swenta yu'un ma ba ya xlajex a, melel awich'ojiquix ch'ultesel ta swenta te aceite yu'un te Cajwaltique —xi' sc'oplalic yu'un te Moisese. Mero jich nix la spasic a te bit'il albotic yu'un te Moisese.

⁸ Te Cajwaltic la sc'opon te Aarón, jich la yalbey:

⁹ —Te bi ora ya x'ochat soc anich'nab ta yutil Nailpac' te banti ya quich' c'oponele, ma me xju' ya awuch'ic vino, soc ma me xju' ya awuch'ic tulan uch'balil, melel ya me xlajex yu'un. Ja' mandalil te ma'yuc bi ora ya xlaj sc'oplale, ya me xc'ax ta stojolic tatiletic soc ta stojol alnich'anetic,

¹⁰ swenta yu'un jich me ya ana'ic stsajtayel a te bila ch'ultesbile, soc te bila ma ba ch'ultesbiluque, soc te bila lec sc'oplale soc te bila ma lecuc sc'oplale;

¹¹ soc ya me xju' awu'unic ya awac' ta nopel yu'un te israeletic te mandaliletic la cac'beyex ta swenta Moisés —xi' sc'oplal yu'un te Cajwaltique.

¹² Patil te Moisés la yalbey te Aarón, soc uuc te Eleazar soc te Itamar, ja' te cheb xan snich'nab jilem Aarón: —Tsacaic te majt'anil harina te jilem te ja' sobrail te chic'bil majt'aniletic la yich' aq'uel ta stojol te Cajwaltique, we'aic te bila ma'yuc slevadurail ta nopol scajtijib ta chiq'uel majt'anil, melel mero ch'ultesbil.

¹³ We'aic ta yawil ch'ultesbil, melel ja' me te c'ot ta awentaic ja'at soc anich'nab te jilem ta majt'aniletic ya yich' chiq'uel swenta yich'el ta muc' te Cajwaltique. Jich ay te mandal quich'oj alele.

¹⁴ Te stan te ja' ya yich' toyilayel ta stojol te Cajwaltic, soc te ya' chambalam te swenta patanile, ya me sc'an ya awe' ta yawil te yich'oj lecubtesel sc'oplale, ja'at soc te aquerem-nich'nab soc te awantsil-nich'nabe, melel ja' me te c'ot ta awentaic te jilem yu'un milbil majt'anil swenta lamal-o'tanil te ya yac' te israeletique.

¹⁵ Te ya' te ja' swenta patanile, soc te stan te ja' ya yich' toyilayel ta stojol te Cajwaltique, ya me yich' ich'el bael ta stojol swenta smajt'an, jich bit'il te xepuil te ya yich' aq'uel yu'un ya yich' chiq'uele. Ja' in to spisil ora ja'at me awu'un soc anich'nab, jich nix te bit'il yaloj mandal te Cajwaltique —xi' te Moisese.

¹⁶ Te Moisés la sjojc'obey: —¿Banti ay te tentsun ya yich' milel swenta mulile? —xi'. La yaiy te la yich'ix chiq'uele. Jich ilin ta stojolic te Eleazar soc te Itamar, te cheb xan snich'nab Aarón jileme, jich la yalbey:

¹⁷ —¿Bi yu'un ma ba la ati'ic ta ch'ultesbil yawil te milbil majt'anil swenta mulile? Melel mero ch'ultesbil, ja' yu'un ja'ex la yac'beyex te Cajwaltique, swenta yu'un ja'ex me ya acuchbeyic a te sfaltaic te israeletique, swenta yu'un jich me ya staic a te perdón yu'un smulic ta stojol te Cajwaltique.

¹⁸ Melel ma ba la yich' ich'el ochel ta yutil ch'ul awilal te xch'ich'ele, te ja'ex la sc'an te la ati'ic te milbil majt'anil ta yamac'ul te Nailpac' Templo te ch'ultesbile, jich nix te bit'il la jpasex ta mandale —xi' te Moisese.

¹⁹ Jac'bot yu'un Aarón: —Aiya awaiy, nax to la yaq'uic ta stojol Cajwaltic te milbil majt'anil yu'un smulic, soc te majt'anil te scojt'ol ya yich' chiq'uele. Pero te jo'one ay bila c'oemix ta pasel ta jwenta, ja' te lajic te jnich'nabe. Te jo'ucon la jti' te milbil majt'anil yu'un mulil te naxe, ¿lec bal yo'tan yu'un te Cajwaltique? —xi'.

²⁰ C'alal la yaiy te Moisés, lecub yo'tan yu'un.