Levítico 1 - Bible in Tzeltal de Oxchuc y Tenejapa

Smajt'an Dios scojt'ol chic'bilic

¹ Te Cajwaltic c'opoj c'alal ta Nailpac' te banti ya yich' c'oponel, la yic' te Moisés, jich la yalbey:

² —C'opojan soc te israeletic, albeya: “Te c'alal ay mach'a ya yich'bon tel jmajt'anin chambalam, ya me sc'an te ja' ya stsac tel jcojt'uc xwacax, o xchij, o ja' te stentsune.

³ “Teme wacax te chambalam ya yac'bon ta jmajt'an te scojt'ol ya yich' chiq'uele, ya me sc'an te ja' te toro te ma'yuc bila boloben ta sbaq'uetal. Swenta yu'un ya stsacbot a te majt'anil, ya me sc'an ya yac'bon ta jtojol jo'on te Ajwalilon ta stojol te yochibal Nailpac' te banti ya quich' c'oponele.

⁴ Ya me scajan sc'ab ta sjol te chambalam, jich me ya stsacbot te chambalam ya yac', swenta spasbeyel perdón yu'un te muliletic ay ta swenta.

⁵ Ya me sbojbey snuc' ta jtojol te toroe. Te snich'nab Aarón, ja' te sacerdoteetic cu'un, ya me yac'bon jmajt'anin te xch'ich'ele. Patil ya me stsijts'anbeyic ta ch'ich' ta sjoyobal ta spat te scajtijib ta chiq'uel jmajt'an te ay ta stojol te yochibal Nailpac' te banti ya quich' c'oponele.

⁶ Te mach'a ya yac'bon jmajt'anin te chambalam te scojt'ol ya yich' chiq'uele, ya me xcho'bey snujc'ulel, soc ya me yich' niwac sesenel te chambalame.

⁷ Te sacerdoteetic ya me spasic c'ajc' ta sba te scajtijibe. Ya me spasic ta lec te si'e,

⁸ swenta yu'un ya scajanbeyic ta sba te niwac sesenbil chambalam, te sjol soc te xepuil sbiquil ta yutil xch'ujt'e.

⁹ Te mach'a ya yac'bon te chic'bil jmajt'ane, ya me spocbey ta ja' te sbiquil soc te ya' te chambalame. Te sacerdote cu'un ya me xchic' spisil ta sba te scajtijib jmajt'an swenta yu'un bujts'an yic' ta jtojol jo'on te Ajwalilone.

¹⁰ “Teme xchij, o teme stentsun te chambalam ya yac'bon jmajt'anin te scojt'ol ya yich' chiq'uele, ya me sc'an ja' te stat te ma'yuc bila boloben ta sbaq'uetal.

¹¹ Ya me sbojbey snuc' ta stojol norte yu'un te scajtijib ta chiq'uel majt'anil ta jtojol jo'on te Ajwalilone. Te snich'nab Aarón, ja' te sacerdoteetic cu'un, ya me stsijts'anbeyic ta xch'ich'el chambalam ta sjoyobal ta spat soc te scajtijib ta chiq'uel jmajt'ane.

¹² Patil ya me yich' niwac sesenel te chambalame. Te sacerdote ya me yac' ta ba si' yac ta tilel ta scajtijib jmajt'an te chambalam yich'oj sesenele, soc te sjol, soc nix te xepuil ta sbiquile.

¹³ Te mach'a ya yac' ta chiq'uel majt'anil, ya me sc'an ya spocbey ta ja' te sbiquil soc te ya' te chambalame. Te sacerdote cu'un ya me xchic'bon spisil ta sba te scajtijib swenta chic'bil majt'anil te bujts'an yic' ta jtojol jo'on te Ajwalilone.

¹⁴ “Teme mut ya yac'bon jmajt'anin, te scojt'ol ya yich' chiq'uel swenta quich'el ta muc', ya me sc'an te ja' te jcojt' puliwoc o jcojt' alal stsumut.

¹⁵ Te sacerdote ya yac'bon te jmajt'an ta scajtijib ta chiq'uel, ya me sc'ocbey loq'uel te sjole. C'alal ya xlaj ta spits'el coel xch'ich'el ta spajc'ul te scajtijib jmajt'ane, ya me xchic' te mut ta scajtijib jmajt'ane.

¹⁶ Ya me sloq'uesbey neeluc te xchuyja' soc te sbaale. Ya me yac' ta stojol sloq'uib c'aal yu'un te scajtijib ta chiq'uel jmajt'an, ja' te yawil te banti ya yich' aq'uel te stanul c'ajq'ue.

¹⁷ Ya me stsacbey ta xic' te mute, ya me sjat, pero ma me stuch' ta jyalel. Swenta slajibal ya me xchic' te mute. Ya me yac' ta ba si' ta scajtijib jmajt'an, swenta jmajt'an te scojt'ol ya yich' chiq'uel te buen bujts'an yic' ta jtojol jo'on te Ajwalilone.