Lamentaciones 5 - Bible in Tzeltal de Oxchuc y Tenejapa

Yo'ebal xc'uxul mel-o'tan

¹ Cajwal, na'a te bila c'oem ta jtojoltique; ilawil te jwocoltique.

² Spisil te bila ay cu'untique, ta ora yo'tic ay ta sc'ab jyanlumetic; te nanatic cu'untic, ja' yu'uninejiquix ta jc'axel.

³ Ayotic ta me'ba, ma'yuc jtatic; te jme'tique, jilic ta me'ba ants.

⁴ Te ja' ya cuch'tic, ayotic ta smanel; ayotic ta stojel te si' cu'untique.

⁵ La yac'botic yugo-te' ta jnuc'tic; ya xlubotic, pero ma xyac' jcux co'tantic.

⁶ Swenta yu'un yacuc xnoj jch'ujt'ic yu'un te we'elile, ya jach jc'abtic ta stojolic te egipcioetic soc te asiriaetique.

⁷ Te me'il-tatiletic cu'untic te wayemix sbaq'uetalique, la sta smulic ta stojol Dios; te jo'otique, ja' la jcuchbeytic jilel te smulique.

⁸ Ta ora yo'tic ja' ajwalilix cu'untic te mosoetique, ma'yuc mach'a ya sloq'uesotic ta libre ta sc'abic.

⁹ Wocol xanix cuxulotic ta stael jwe'eltic, scaj te ya yuts'inotic te mach'atic talemic ta jochol taquin q'uinale.

¹⁰ Te snujc'ulel jbaq'uetaltic yac ta tilel jichuc sc'aal horno, ja' nix sc'aal te wi'nale.

¹¹ Ta Sión soc lumetic ta Judá, lajic ta uts'inel te antsetic soc ach'ixetic.

¹² Te jtsobwanejetic cu'untic la yich'ic jojc'anel ta sc'abic; te mamaletic ma ba ich'otic ta muc'.

¹³ Te winiquetic tulanic ta leque la yaq'uic ta juch'majel; te queremetic laj yipic yu'un yalal si'.

¹⁴ Ma'yuquix mamaletic nacalic ta chajbanwanej ta yochibal te lume; ma'yuc bay ya xchicnajix c'ayojetic yu'un te queremetique.

¹⁵ Ma'yuquix sbujts' te co'tantique; te sbujts' co'tantic ta ajc'ot c'atp'ujix ta mel-o'tan.

¹⁶ Ch'ay coel ta joltic te corona; ¡obol nax jbatic te jtaoj jmultique!

¹⁷ Ja' swentail te ay ta chamel te co'tantique; te ya xmajq'uix ta tocal te jsitique.

¹⁸ Te wits Sión ja' jinem ts'ajq'uetic c'oem; xtal xbajt'ic tey a te waxetique.

¹⁹ Yan te ja'at Cajwal, sbajt'el q'uinal ya xmandalajat; spisil ora ayat ta amuc'ul nactijib.

²⁰ ¿Bi yu'un te jc'axel la ach'ayotic ta awo'tane? ¿Bi yu'un te bayal c'aal ya apijt'esotique?

²¹ Cajwal, ic'awotic sujt'el ta atojol, jich me ya xtalotic. Ac'a cuxinucotic xan jich te bit'il ta neelale.

²² Ja'uc me to, te ja'at la ach'ojotic loq'uel ta jc'axel; te awilimba ta jtojoltic mero bayal ta jyalel.