Lamentaciones 4 - Bible in Tzeltal de Oxchuc y Tenejapa

Xchanebal xc'uxul mel-o'tan

¹ Jajch' ta ijc'ubel te oro. Ch'ay ta jc'axel yutsil te t'ujbil oro. Pujq'uemic bael ta xujc' calleetic te tonetic yu'un te ch'ul templo.

² Te mach'atic yajwal Sión te ich'bil ta muc', soc te jich yutsilalic te bit'il oro, yo'tic jich c'oemix ta o'tanil te bit'il pac'bil oxometic te pasbil yu'un jpas-oxome.

³ Te yantsilel ja'mal ts'i' ya to nix yac'bey xchu'ic te yalataque; yan te jlumal Israele, c'ax amen te yo'tane, pajal soc te avestruz-mut te ya x'ain ta jochol taquin q'uinale.

⁴ Bayal taquinti'il ya yaiyic te chu'ul alaletique, te yaq'uic ya slab sba ta yutil yeic. Ya sc'an swe'elic te alaletique; ja'uc me to, ma'yuc mach'a ya yac'bey.

⁵ Te mach'atic c'axem to xan bayal we'ic ta sbabial, ta ora yo'tic ya xlajiquix yu'un wi'nal ta calleetic. Te mach'atic muc'ubic ta bayal c'ulejalil, ta ora yo'tic ayiquix ta xch'ayjibal te bila ma xtuunixe.

⁶ Te smul te jlumal Israele, ja' muc' xan yu'un a te smul Sodoma; ta ora nax laj ta jinel, manchuc me ma'yuc mach'a tal sjin.

⁷ C'ax to xan sac jichuc toib te winiquetic tsabilique, c'ax to xan saquic, jich bit'il te leche; te sbaq'uetale, c'ax to xan yutsilic a te bit'il tsajal coral-ton; te sit-yelawe, c'ax to xan ya xtil yutsilal te bit'il zafiro.

⁸ Yan ta ora to ijc'ubeniquix te yelawique; ma'yuquix mach'a ya sna'bey sba ta calle. Chajalix ta bac, jich bacubenic te bit'il si'.

⁹ Ja' lec xan c'otic ta loq'uel stuquelic a te mach'atic lajic ta guerra, ma jichuc te mach'atic yacalic ta lajel ta wi'nale; melel c'unc'un yacalic ta lajel, ta scaj te ma'yuc awalts'unubil ta lumq'uinal.

¹⁰ Asta te antsetic lec yo'tanique, ta sc'abic nix la spayic te yalataque; ja' nix te mero yalataquic tuun ta swe'elic, ta scaj te jinot te jlumal Israele.

¹¹ Te Cajwaltic la sloq'ues yilimba, yac ta tilel sc'ajc'al yo'tan la smal; la yac'bey sc'aal te Sión, la sjin c'alal ta yet'al ts'ajq'uetic.

¹² Te muc' ajwaliletic ta bayuc, spisilic te jmandalteswanejetic ta balumilale mero ma la xch'uun yo'tanic te ya x'ochic ta Jerusalén te scontrotaque.

¹³ Melel ta scaj spisil smul te j'alwanejetic yu'une, soc te bila amen la spasic te sacerdoteetic, te tey nix ta yolilal lum la smalbeyic xch'ich'el te mach'atic ma'yuc smule.

¹⁴ Yacalic ta ts'otlajanel ta beel jichuc ma'sitetic ta calleetic yu'un te lume; mero c'ax bolobenic yu'un ch'ich', ma'yuc mach'a ya sc'an ya spicbey te sc'u'e.

¹⁵ “¡Q'ueja abaic, q'ueja abaic, ja'ic te mach'atic bolobenic, ma x'apiquic!” xi' sc'oplalic ta awtayel. “J'aneletic, ma xju' x'ainex li'to”, xiic te mach'atic ma'yuc ta stojol te Diose.

¹⁶ Ja' nix te Cajwaltic la spuc bael, ma ba la yilix. Ma'yuc mach'a la yich' ta muc' te sacerdoteetic, ni ma'yuc la sna'beyic yo'bolil sba te mamaletique.

¹⁷ Lubenic te jsitique, tojol la cat'elintic smaliyel coltayel. Tojol chapalotic ta smaliyel te jpam lum te ma xju' yu'un coltaywaneje.

¹⁸ Spisilic scanantayejic te jbeetique; ma xju' xloc'otic ta calle. Slajibalix ayotic te jo'otique, ya xc'otix te corailtique; c'otix te jlajibaltique.

¹⁹ C'ax jich ya x'animajic te bit'il áquila ta ch'ulchan te jnutswanej cu'untique; ya snutsotic ta witstiquil, ya yac'botic yaquiltic ta bay jochol taquin q'uinal.

²⁰ Tsacotix ta pejts' te mach'a tsabil yu'un te Cajwaltique, ja' te mach'a cuxulotic ta swenta, ja' te muc' ajwalil, te la calbeytic sc'oplale: “Ya me xcuxinotic ta awaxinal ta yolil te lumetique”, te xootic yu'une.

²¹ Tse'enan, binuc nax me awo'tan, ja'at nación Edom; te ja'at nix ya xmandalajat ta sq'uinal Uz. Ja' nix jich ya xc'ot ta awenta yuch'el te ch'aal uch'balil c'oeme, ya xyacubat soc ya xt'anajat yu'un.

²² Lajix castigo ta atojol, ja'at lum Sión; te Cajwaltic ma ba ya yac'at xan bael ta mosoil. Ja'uc me to, ja'at nación Edom, ya yac'bat castigo yu'un te bitic apasoje, soc ya yac' chicnajuc ta comonsitil spisil te amule.