Lamentaciones 3 - Bible in Tzeltal de Oxchuc y Tenejapa

Yoxebal xc'uxul mel-o'tan

¹ Jo'on caiyojix stojol te woclajele, te majel la yac'bon yu'un yilimba te Cajwale.

² La yic'on bael ta yijc'al q'uinal; la yac'on ta beel ta beetic ta bay ma sacuc q'uinal.

³ Bayal buelta, ta spisil ora, ya xyal tel sc'ab ta jtojol.

⁴ La yac' mamalubuc te jbaq'uetal soc te jnujc'ulele; la swuybon te jbaquele.

⁵ Jajch' sjoytayonic jichuc corral te xch'aal mel-o'tan soc te woclajele;

⁶ la yac' ainucon ta yijc'al q'uinal, jich bit'il mach'atic laj ta namey.

⁷ La quich' maquel jilel ta corral te ma'yuc sloq'uibale; la xchucon ta cadenaetic te buen alique.

⁸ Manchuc me awunon ta sc'anel coltayel, ma la yich'bon ta muc' te la cal wocole.

⁹ La smacbon jbe ta latsbil ton; la syantesbon bael te jbee.

¹⁰ Jich c'ot ta jtojol te bit'il león-choj te snac'oj sbae, jich bit'il oso te chapalix yu'un ya smilon.

¹¹ La sjowteson bael ta be, la st'omon ta ti'el, la snojesbon co'tan ta xiwel.

¹² La snit te st'ime, la stojlinon a.

¹³ Te yat'ejibal t'im wil tel yu'un te Cajwaltique, mero c'ub ochel ta jbaq'uetal.

¹⁴ Spisil te jlumale ya slabanonic; ta spisil ora jo'on ya staonic ta labanel.

¹⁵ Te Cajwaltic la snojesbon ta co'tan te bila ay xch'aale; ch'a te uch'balil la yac'bone.

¹⁶ La swuybon que ta cotp'inel ta lum, la jlo' te ts'ubil lume.

¹⁷ C'ubul bajt' ta jtojol te lamal q'uinale, soc ch'ayix bael ta co'tan te sbujts' q'uinale.

¹⁸ Ya cal te ch'ayix te smuc'ul co'tan soc te cutsilal yu'un te Cajwaltique.

¹⁹ Ya jna' te ayon ta mel-o'tan soc te jtuquel ayone, te ch'auben co'tan yu'un te woclajel ya caiye;

²⁰ ja' yacon ta sna'el, te smuc'ul co'tan c'alal ta lum ya xc'ot yu'un.

²¹ Ja'uc me to, ay bila ya jc'an te ayuc ta co'tan spisil ora, ja' te ayon ta smaliyele:

²² Ja' te xc'uxul yo'tan te Cajwaltique, ma'yuc slajibal stuquel, ma xch'ay te yutsil yo'tane.

²³ Ta jujun sab ya x'ach'ub; ¡mero ma xyanaj ta jyalel te xc'uxul yo'tane!

²⁴ Jich ya cal ta co'tan: “Te Cajwale, ja' cu'un ta spisil; jich yu'un ja' smuc'ul co'tan stuquel”, xoon.

²⁵ Te Cajwaltic lec te bila ya spasbey te mach'a ja' ya smuc'ulin yo'tane, te mach'atic ya xbajt' yo'tanic ta sc'oponele.

²⁶ Ja' lec ch'abalucotic ta smaliyel te ya scoltayotic te Cajwaltique.

²⁷ Ja' lec te mach'a yalalil to te ya yac' sba ta smaliyel.

²⁸ Te winique jichuc nax ainuc stuquel soc ch'abaluc nax teme tulan ya x'ac'bot yu'un te Cajwaltique.

²⁹ Ya sc'an peq'ueluc ya yac' sba asta ya sbujts'iy coel te lume; repente ya to sta c'uxtayel a.

³⁰ Ya me sc'an te jun yo'tan ya yac' ta majel yelaw yu'un te mach'a ya x'ejch'entesot yu'une, soc te jun yo'tan ya sc'ases te bayal bolc'optayele.

³¹ Te Cajwaltic ma ba ya spijt'esotic sbajt'el q'uinal.

³² Manchuc me ya yac' c'axuc jwocoltic, ja' nix jich ya sna' yo'bolil jbatic. Melel te xc'uxul yo'tane mero muc' ta jyalel.

³³ Ta smelelil, ma jichuc yo'tan yu'un yac'beyel swocol te ants-winiquetique, ni ta yac'beyel bila c'ux ya yaiy.

³⁴ Ma sc'an stuquel te Cajwaltic te xujt' ma'yuc ta na'beyel yo'bolil sba te ya yich' pech'el ta teq'uel te jchuqueletic ta balumilal.

³⁵ Ma sc'an te jelawel ta stojol te bila ay ta swenta jtul winic, ta sit te Mach'a ay ta Toyole.

³⁶ Te bay ma lequil chajbaneluc, ja' te ma lecuc yo'tan yu'un te Cajwaltique.

³⁷ Te c'alal ay bila ya x'alot, c'alal ay bila ya xc'ot ta pasel, yu'un me ja' smandal te Cajwaltique.

³⁸ Te bila leque, soc te bila ma lecuque, pajal ya xtalic, yu'un jich ya yal mandal te Mach'a Toyole.

³⁹ Te jmulawil ta q'uinale, ¿bila te ya x'ajc'anaj yo'tan yu'une?

⁴⁰ Ac'a me jnop caiytic ta lec te bit'il ayotic soc te co'tantique; ac'a me cha'sujt'ucotic xan ta stojol te Cajwaltique.

⁴¹ Ac'a me caltic bael ta stojol Dios ta ch'ulchan te bila ay ta co'tantic, ac'a calbeytic:

⁴² “La jletic jmultic soc la jtoy jbatic ta atojole, ma la apasbotic perdón yu'un”, xootic me.

⁴³ La ajoytayotic soc te sc'ajc'al awo'tane, la anutsotic; ma la ana'botic yo'bolil jbatic, la amilotic.

⁴⁴ La apots aba ta tocal swenta yu'un ma x'awaiy te ya caltic wocole.

⁴⁵ La awac'otic ta ilayel ta stojol spisil te ants-winiquetique.

⁴⁶ Spisilic te jcontrotactic ya x'utawanic ta scontroinbelotic;

⁴⁷ xiwtesel, yaquiletic, jinel soc lajinel, ja' c'oemic ta jwentatic.

⁴⁸ Yac ta oquinel jichuc sloq'uibja' te ya'lel jsit yu'un te jlumal te la yich' jinele.

⁴⁹ Xujt' ma xcom ta oq'uel te jsite, ma'yuc bay ya xcux yo'tan

⁵⁰ ja' to teme ya yilotic tel c'alal ta toyol te Cajwaltic te ay ta ch'ulchan.

⁵¹ C'uxiquix ya caiy te jsit c'alal ta co'tan, ta scaj te bila c'oem ta pasel ta stojol yantsilel te jlumale.

⁵² Mero ma'yuc swentail, te jcontrotac la snutsonic jichuc ja'mal mut;

⁵³ cuxulon to a te la smuconic ta pozo, ton la smaquic jilel a te sti'ile.

⁵⁴ Te ja'e la smucon ta jc'axel, la cal ta co'tan: “Ch'ayemon ta jc'axel”, xoon.

⁵⁵ Jo'on, Cajwal, ya jc'oponat c'alal to ta yet'al pozo,

⁵⁶ ya awaiybon stojol te jc'ope; ma ba ya amac achiquin yu'un te wocol ya calbate.

⁵⁷ Te bi c'aalil ya quic'ate, ya xtalat ta jtojol, soc ya awalbon: “Ma xiwat”, xaat me.

⁵⁸ Cajwal, c'opojan yu'un te jwocole, coltaybon loq'uel te jcuxlejale.

⁵⁹ Cajwal, ilawil te tojol uts'inel te ay jwocol yu'une, chajbanawon atuquel.

⁶⁰ Ya awil te bila snopojic ta yac'belic spacol, spisil te bila chapal ta jtojol yu'unique.

⁶¹ Cajwal, aiybeya awaiyic stojol te sbol-c'opic soc spisil te bila xchapojic ta jtojole;

⁶² te sjowil c'op te jcontrotaque, ja' jc'oplal yu'unic spisil ora.

⁶³ Aiya awaiy stojol ta spisil te yat'elic, spisil ora ya slabanonic.

⁶⁴ Cajwal, ac'beya castigo te bit'il ya sc'ane, ac'beya stoj te bit'il nix te yat'elique.

⁶⁵ Tulantesbeya te yo'tanique, soc ac'beya castigo ta stojolic.

⁶⁶ Cajwal, nutsa ta sc'ajc'al awo'tan, ac'a ch'ayuc bael ta balumilal.