Lamentaciones 2 - Bible in Tzeltal de Oxchuc y Tenejapa

Xchebal xc'uxul mel-o'tan

¹ Mero muc' ta jyalel te yilimba te Cajwaltique, la yaxintes ta ijc' q'uinal te yutsilal Sión. La sjin coel te t'ujbil yutsilal Israel, jich bit'il ta ch'ulchan c'alal ta balumilal; yu'un yilimba ma la sna'bey yo'bolil sba te scajtijib yacane.

² Te Cajwaltic ma'yuc bay la yijq'uitay junuc na yu'un Jacob; ta ora nax la sjin yu'un sc'ajc'al yo'tan te tulanil anjibal ts'ajq'uetic yu'un te t'ujbil Judá. La spejc'anbey te bit'il ya xmandalaj, soc la sliman ta lum te ajwaliletic yu'une.

³ Te c'alal til te yilimbae, la sjax ta bojel te yip Israel. La sq'uejbotic bael te jcoltayel yu'un yu'el te c'alal la jta jbatic soc te jcontrotique; tilemix sc'aal, yu'un ya xchic' spisil a te bila ya sta yu'un Jacob.

⁴ Te Cajwaltic la snit te st'ime, jich bit'il jcontro yilel, toj la yac' bael te yat'ejibale. Pajal soc jcontro, la sjin te bila lec ta ilele; wil bael jichuc c'ajc' te yilimba ta sba scampamento te t'ujbil Sión.

⁵ Jich at'ej te bit'il jcontro te Cajwaltique; jc'axel la sjin te Israele. Jin coel spisil te palacioetic yu'un; la sjinbey te tulanil anjibal ts'ajq'uetique. Bayal la yac' ta mel-o'tan soc oq'uel te t'ujbil Judá.

⁶ Jich bit'il elec', jelaw ochel ta ch'ul templo, la sjinbey te awilal yu'unique. Te Cajwaltic la yac' ch'ayuc ta o'tanil ta Sión te q'uinetic soc te sc'aalelal cux-o'tane. Swenta sc'aal yilimba, la sloq'ues a te muc' ajwalil soc te sacerdotee.

⁷ Te Cajwaltic ma'yuc sc'oplal c'ot ta yo'tan te scajtijib smajt'ane; la yilay te ch'ul templo yu'une. La yac'bey ta sc'ab scontro te ts'ajq'uetic ya scoltay sbaic a te lume. Ay awetic ta templo yu'un Cajwaltic, jich bit'il sc'aalelal q'uin yaiyel.

⁸ Te Cajwaltic la snop te ya sjin coel te ts'ajq'uetic yu'un t'ujbil Sión. La xchajbanbey sc'oplal ta jinel, ma la xcux yo'tan ta sju'tesel. Te ts'ajq'uetic ta sjoyobal la yac'bey smel yo'tan; ta jun nax c'aal la sliman ta lum.

⁹ Ma'yuc smajq'uil yochibal te lume, ni smajq'uil taq'uinal yu'un; la yich'ic jinel loq'uel, ts'ubiltic a jil. Te muc' ajwalil soc te sjo'tac ta ajwalil yu'unic, ayic ta yolil te mach'atic ma'yuquic ta stojol Dios; ma'yuquix ta alel smandal te Diose. Te j'alwanejetic yu'unique, ma'yuquix bila ya x'ac'bot yilic yu'un te Cajwaltique.

¹⁰ Te jtsobwanej-mamaletic ta Sión, ch'abalic nax, nacalic ta ts'ubil lum, ya yac' tan ta sjolic soc ya slapic ch'ixal paq'uetic. Te ach'ixetic ta Jerusalén ya snijan sbaic coel c'alal ta lum ta mel-o'tan.

¹¹ Ya xtup'ix jsit yu'un te oq'uele; soc ya slajinbon ya caiy te co'tane. C'alal ta lum bajt' sbujts' te q'uinale, yu'un te la yich'ix jinel ya quil te lum cu'une, yu'un te la quil te muc'-biq'uit yacalic ta lajel ta calleetic yu'un te wi'nale.

¹² Te alaletic jich ya yalbeyic te sme'ique: “Ma'yuquix jwe'eltic, ni ma'yuquix vino cu'untic”, xiic. Jich yalic yu'un lajel te bit'il ac'bot yejch'en ta calleetic yu'un te lume, slajibal xanix la yich'ic ic' ta sc'ab te sme'ique.

¹³ Jerusalén te t'ujbilate, ¿bila ya xju' ya jpajat soc? ¿Bila ya xju' ya jmuc'tesbat awo'tan a, ja'at Sión te ma bolobenucat soc awutsilal ta neelale? Muc' ta jyalel te ajinel, jich bit'il smuc'ul mar; ¿mach'a ya xju' yu'un ya slamantesbat q'uinal awaiy?

¹⁴ Te bila ac'bot yilic ta sc'opic te j'alwanejetic awu'une, ja' nax puro lo'laywanej la spasic a. Ma la yaq'uic chicnajuc te amule, te jichuque la ataic c'uxtayel. Tojol la yalbat te ay bila ac'bot yilic ta sc'opic; ja' nax la slo'layex a te la yac'beyex ach'uunique.

¹⁵ Te mach'atic ya xc'axic ta be, te c'alal ya yilate, ya spac' sc'abic jich bit'il q'uin ta labanwanej; ya yaiyic xuxub soc ya sjimulay sjolic ta labanwanej. Jich ya yalbat ac'oplal, ja'at te t'ujbil Jerusalén: “¿Ja' bal te lum te ya yalic te ja' cajal yutsilal yu'un spamal te balumilale?” xiic me ta yalel.

¹⁶ Spisil te acontrotac ya x'utwanic ta scontroinbelat. Ya yaiyic xuxub a soc ya yixlan sni'ic ta yalel bol c'op: “La jintiquix ta jc'axel. Ja' te bayal c'aal la jmaliytique; ja'uc me to, ju'ix cu'untic ya quil”, xiic.

¹⁷ Te Cajwaltic la sc'otes ta pasel te bi chapal yu'une, la sc'otes te sc'ope. Ma la sna'bey yo'bolil sba ta sjinel te namey la xchajbanbey sc'oplale. La yac' stse'luyat te acontro, soc ja' la yac'bey bayal yip stuquel.

¹⁸ C'anbeya coltayel Cajwaltic, ja'at lum Sión te ay awutsilale. Ac'a oquinuc ta c'aal ajc'ubal jichuc tulan yocja' te ya'lel asite. Ma me x'acom aba ta oq'uel, ma xawac'bey xcux yo'tan te asite.

¹⁹ Jajch'an, awunan ta spisil ajc'ubal, spisil me ora ya x'awunat; c'opojan ta spisil awo'tan ta stojol te Cajwaltique. Ac'a maluc bael jichuc ja' te bitic ay ta awo'tan; toya moel ac'ab ta yalel wocol, soc ala wocol yu'un xcuxlejal te alaletic awu'une, melel ta xujc' calleetic ya xlajic ta scaj ma'yuc swe'elic.

²⁰ Cajwal, nopa awaiy, melel ma'yuc mach'a apasojbey jich bit'il in to. ¿Lec bal te ya sti' yalatac te me'eletic te ya to xchu'unique? ¿Lec bal te ya yich'ic milel ta ch'ul templo awu'un te sacerdoteetic soc te j'alwanejetique?

²¹ Limilic ta calleetic ya quil, muc'-biq'uitetic; lajic ta milel ta puñal, queremetic soc ach'ixetic cu'un. Ta sc'aalelal awilimba la awejch'entes yu'un lajel; ma la ana'bey yo'bolil sba ta milel.

²² La awac' tel bitic chujc'ul ta bayuc, yacalic ta talel ta il-q'uin yilel. Cajwal, ta sc'aalelal awilimba ma'yuc mach'a col jtuluc. Te mach'atic muc'ub cu'un soc te la jp'ijubtese, laj ta milel yu'un jcontro.