Jueces 8 - Bible in Tzeltal de Oxchuc y Tenejapa

Gedeón la stsac smil ajwalil-madianetic

¹ Te mach'atic sts'umbal Efraín jajch'ic ta ilimba, la spasic bayal c'op soc Gedeón, melel ma la yich'ic iq'uel yu'un te c'alal loc' yac'bey guerra te madianetique.

² Ja'uc me to, la sujt'esbey sc'opic: —¿Yu'un bal ma x'ana'ic stojol te bi la apasic te ja'exe, c'axem jich sc'oplal a te bi la jpastic te jo'otique?

³ Dios la yac'beyex ta ac'abic te Oreb soc Zeeb te jtsobwanej-madianetique. ¿Bi la jpas jo'on, te ya xju' jpaj soc te bi la apasic te ja'exe? —xi'. Te mach'atic sts'umbalic Efraín la yaiybeyic stojol sc'op Gedeón, jich a lamaj bael yilimbaic ta stojol.

⁴ Te Gedeón c'ot ta muc'ja' Jordán soc te jo'lajunwinic (300) ta jtul swinictaque. C'axic bael, manchuc me ayix bayal lubel la yaiyic ta snutsel bael te scontroique.

⁵ Ta Sucot ay bi la sc'an te Gedeón ta stojolic te mach'atic ainemic tey a: —Wocoluc a, ac'bon jtebuc swe'elic te mach'atic sjoinejonic tel, mero lubeniquix ta jyalel. Ja' yacotic ta snutsel bael te ajwalil-madianetic, ja' te Zeba soc Zalmuna —xi'.

⁶ Te mach'atic yich'oj yat'el ta Sucot la yalic: —¿Yu'un bal la achuquiquix te Zeba soc Zalmuna, te ya jmac'lintiquix te soldadoetic awu'une? —xiic.

⁷ Te Gedeón la sjac': —Lec, te c'alal ya yac'bon ta jc'ab Cajwaltic te Zeba soc Zalmuna, ya me sujt'on tel. Ya xtal jlombeyex abaq'uetalic ta muc'ul ch'ixetic soc te ch'ix ayic ta jochol taquin q'uinal —xi' te Gedeón.

⁸ Bajt' ta Penuel, la sc'an tey a te bit'il nix la sc'an ta Sucot. Ja'uc me to, te mach'atic ayic ta Penuel, jich nix la yalic te bit'il Sucot.

⁹ Te Gedeón la yalbey: —Lec ay, te c'alal ya sujt'on tel ta tsalaw, ya me jin coel te toyol ts'ajc' awu'unique —xi'.

¹⁰ Te Zeba soc te Zalmuna tey ay ta lum Carcor soc te jo'lajunmil (15,000) swinictac, te ja' xanix jilemic ta spisilic te soldadoetic talemic ta stojol sloq'uib c'aal. Melel lajemiquix wacwinic ta jmil (120,000) te swinictaque.

¹¹ Te Gedeón mo bael ta be te ay ta sti'il te jochol taquin q'uinal, ta stojol sloq'uib c'aal ta Noba soc Jogbeha. Och yac'beyic guerra soc ta scampamentoic, ch'ayemix yo'tanic a.

¹² Te Zeba soc Zalmuna loq'uic ta anel; ja'uc me to, te Gedeón la snuts, la xchuc, jich och xiwel ta yo'tanic ta spisilic te soldado-madianetique.

¹³ C'alal sujt' tel Gedeón ta guerra, c'ax tel ta bay c'axibal ta Heres.

¹⁴ La xchuc jtul muc'ul querem talem ta Sucot, la yich' ta c'op. Te querem la sts'ibubey ta jun sbiilic te juclajuneb xchanwinic (77) jtsobwanejetic soc mamaletic ta Sucot.

¹⁵ Jich yu'un te Gedeón c'alal c'ot ta Sucot, jich c'o yalbey te lume: —¿Ya bal ana'ic te la alabanonic ta scaj te Zeba soc Zalmuna? ¿Ya bal ana'ic te ma la awac'bonic swe'el te soldadoetic sjoinejonic te c'ax ayiquix ta lubel a? La awalbotic te ja' yu'un te ma to ayuc ta jc'abtique. Ta ora to ayix ta atojolic —xi' te Gedeón.

¹⁶ Jich yu'un te Gedeón la stsac te ch'ixetic, ja' la yac'bey castigo a te mamaletic ta Sucot.

¹⁷ Ja' nix jich la sjinbey coel te toyol ts'ajc' yu'un te lum Penuel, soc la smil te ants-winiquetique.

¹⁸ La sjojc'obey te Zeba soc Zalmuna: —¿Bi yilelic te winiquetic la amilic ta Tabor ja'ex? —la yut. La sjaq'uic: —Jich yilelic te bit'ilat. Ta juju-jtul pajal soc yilel te snich'nab ajwalile —xiic.

¹⁹ Jich yu'un te Gedeón awun: —¡Ja' te quermanotaque! ¡Ja'ex la amilbonic te mero quermanotaque! Ya cal ta stojol te cuxul Diose, ma ba ya jmilex te manchuc ja'uquex te milwanexe —xi'.

²⁰ Ta ora nax la spas ta mandal Jeter, ja' te sba snich'ane: —Jajch'an mila —xi'. Ja'uc me to, te querem Jeter, ma to ayuc yip yo'tan yu'un sloq'uesel te spuñale.

²¹ Jich yu'un te Zeba soc te Zalmuna la yalbeyic te Gedeón: —Milawotic ja'at. Teme winicate, ya xna'ot ta swenta te atulanile —xiic. Te Gedeón och ta smilel soc la stsacbey te xch'alil te ay ta snuc' te camelloetic yu'un Zeba soc Zalmuna.

²² Jich yu'un te israeletic la yalbeyic te Gedeón: —Te bit'il ja'at la acoltayotic ta sc'ab te madianetic, ya me jc'antic te ja'at me ajwalilat cu'untic ya xc'oat soc te ats'umbale —xiic.

²³ Ja'uc me to, te Gedeón la sjac': —Ni te jo'on, ni te jnich'an, ma ajwaliluc ya xc'ootic awu'unic. Ja' me ajwalil cu'untic te Cajwaltique.

²⁴ Te bi ya jc'anbeyex, ja' te ya awac'bonic te staq'uinal chiquiniletic la apojic, teme jich awo'tanique —xi'. (Ja' scostumbre te madianetic te ay staq'uinal xchiquinic pasbilic ta oro, jich bit'il yantic ismaeletic.)

²⁵ Te israeletic la slimic pac' ta lum, tey la sbusanic a te staq'uinal chiquiniletic la spojic tele. Jich la yalbeyic te Gedeón: —Li' me ay to —xiic.

²⁶ Spisil te staq'uinal chiquiniletic jteb ma loq'uemuc balunlajuneb kilo te yalale. Ma ba ajtaybil stuquel spisil ta jchajp te yantic xch'alilic, soc te paq'uetic te púrpura sbonile, ja' te sc'u'ic te ajwaliletic yu'un Madián, soc te yual snuq'uic te camelloetic yu'unique.

²⁷ Te Gedeón la spas jun efod a te oro. La yac' ta lum Ofra, ja' te slumale. Spisil te israeletic chebaj yo'tanic ta stojol Cajwaltic ta scaj te efod. Ja' nax syacjibal c'ot a te Gedeón soc spisil te mach'atic ay yu'une.

²⁸ Jich te madianetic lajic ta tsalel yu'un Israel, jc'axel la yich'ic pejc'anel yu'un. Ma'yuc banti la stoy sbaic xan ta stojol Israel ta patil. Jc'axel lamaj q'uinal cha'winic (40) ja'wil te c'alal cuxul a te Gedeón.

Laj Gedeón

^29-30 Te Jerobaal, ja' te Gedeón, bajt' ta sna. Ay lajuneb xchanwinic (70) ta jtul snich'nab, melel ay bayal ta jtul te yiname.

³¹ Ay jtul ants yu'un ta lum Siquem, la yac'bey jtul squerem-al, Abimelec sbiil c'ot yu'un.

³² Mamalub te Gedeón, laj bael. La smuquic ta bay smuquenal Joás, ja' te state, ay ta lum Ofra, te lum yu'un sts'umbal te Abiezer.

³³ Te c'alal lajemix a te Gedeón, te israeletic la yijq'uitay xan ta yo'tanic te Diose, ja' ba xch'uunic te loc'ombaetic yu'un Baal. Ja' mero la stsa sdiosinic te Baal-berit.

³⁴ Ch'ay ta yo'tanic te Cajwaltic te Dios yu'unic, te coltayotic yu'un ta sc'ab scontroic te joytayotic yu'une.

³⁵ Mero ma'yuc yutsil yo'tanic ta stojol te mach'atic ay yu'un te Jerobaal, te Gedeón yan sbiil, manchuc me t'ujbil nax spisil te bitic la spas te Gedeón ta stojolique.