Jueces 7 - Bible in Tzeltal de Oxchuc y Tenejapa

Gedeón la stsal madianetic

¹ Te Gedeón, te Jerobaal sbiilix yu'unique, buen sab jajch'ic soc spisil te mach'atic sjoineje, ba spas scampamentoic ta bay sloq'uibja' yu'un Harod. Yan te bay spasoj scampamentoic te madianetic, ja' ay ta stojol norte ta spamlej yoc wits More.

² Te Cajwaltic la yalbey te Gedeón: —Mero bayal ta jyalel te israel-winiquetic te awic'oj tele. Te yacuc cac'bey stsal te madianetic, repente ya yalic ta swenta stoybailic te ju' yu'unic scoltayel sbaic ta stuquelique.

³ Jich yu'un, albeya te winiquetic, te mach'atic ay xiwel ta yo'tanic, ac'a sujt'uquic bael ta snaic —xi'. Jich te Gedeón la yac'bey spas prueba, jich sujt'ic bael cheb xcha'winic ta jmil (22,000) winiquetic, pero jil to xan lajunmil (10,000).

⁴ Ja'uc me to, la yal xan te Cajwaltique: —Mero bayal to ta jyalel. Ic'a bael ta yuch'el ja', tey me ya cac'bey prueba quil a. Tey me ya calbat a te mach'atic ya ajoin bael, soc te mach'atic ma ba ya ajoin baele —xi' te Cajwaltique.

⁵ Te Gedeón jich la yic' bael te winiquetic ta yuch'el ja'. Te Cajwaltic la yalbey: —Te mach'atic ya yuch'ic ja' ta sc'abic, te ya sleq'uic jichuc ts'i'etic, q'uepa loq'uel ta stojol te mach'atic ya spajc'an sbaic ta yuch'ele —xi' te Cajwaltique.

⁶ Te mach'atic la yuch'ic ja' ta sc'abic te la sleq'uic jichuc ts'i'etic, loc' jo'lajunwinic (300) ta jtul. Spisil te yantic la spajc'an sbaic ta yuch'el.

⁷ Jich yu'un te Cajwaltic la yalbey te Gedeón: —Tic' ya jcoltayex a te jo'lajunwinic (300) ta jtul winiquetic, jo'on ya jtsal te madianetique. Ta spisil te yantic ac'a sujt'uquic bael —xi'.

⁸ Jich yu'un te Gedeón la yalbey mandal te yantic, te ya sujt'ic bael ta snailpaq'uic ta bay scampamentoic. Ja'uc me to, la stsobeyic jilel te sq'uibic soc te xulubil yich'ojique. Ja' nax a jil soc Gedeón te jo'lajunwinic (300) ta jtul winiquetic te tsabiliquixe. Moel ba spas scampamentoic ta cajal yu'un te madianetic te ayic ta stenlej xatal q'uinal.

⁹ Ta ajc'ubal a, te Cajwaltic la yalbey mandal te Gedeón: —Jajch'an, coan bael ta yochintayel te madianetique, ya cac'beyex ta ac'abic.

¹⁰ Yan teme ya to xiwat ta spasel guerra soc awaiye, coan bael neeluc soc te Fura te awabate, tey ta bay scampamentoic.

¹¹ Aiya awaiy stojol te bi ya yalbey sbaic. Jich jun awo'tan ya xba awochintay —xi'. Jich co bael te Gedeón soc te yabat Fura, c'ot ta bay pujq'uemic ta ti' campamento te jcanantaywanejetic yu'un te madianetique.

¹² Te madianetic, te amalequetic soc te yantic winiquetic talemic ta stojol sloq'uib c'aal, spucoj sbaic ta stenlej xatal q'uinal jichuc c'ulubetic. Ay bayal camelloetic yu'unic, mero jich yipalic te bit'il sji'al mar.

¹³ C'ot te Gedeón c'alal ta scampamentoic te scontroe. Tey la yaiybey stojol sc'op te jtul soldado te yac yalbel yaiy te jtul sjoy te bi swaichineje. Jich yac ta yalel: —La jwaichin te ay jpejch' pan te pasbil ta cebada, stselelet nax tel c'alal ta campamento cu'untique, jul sbot'q'uin te nailpaq'ue —xi'.

¹⁴ Te sjoy la sjac': —Ma'yuc bi yan swentail abi. Ja' ya yac' ta na'el stojol te ja' seña spuñal Gedeón te snich'an Joás, te israel-winique. Dios ya yac'otic ta sc'ab Gedeón jo'otic te madianotic soc spisil te campamento cu'untique —xi'.

¹⁵ Te Gedeón la yaiy stojol bi yac ta yalel sbaic sc'oplal te swaiche, jich la yalbey wocol te Cajwaltique. Sujt' bael ta scampamentoic, jajch' spas ta mandal te winiquetic: —Jajch'ucotic me, te Cajwaltic ya yac'botic ta jc'abtic te madianetic soc te scampamentoic —xi'.

¹⁶ Te jo'lajunwinic (300) ta jtul winiquetic, oxchajp la sloq'ues a. La yac'bey xulubil ta spisilic ta juju-jtul, soc la yac'bey jochol q'uibetic te ja' nax yac ta tilel c'ajc' ta yutile.

¹⁷ Jich la yalbey: —C'alal ya xc'oon ta jejch' sti'il scampamento te jcontrotic, ila me awilonic, jich nix me xapasic te bit'il ya jpas awilique.

¹⁸ Te jo'on soc te mach'a ya join bael, ya me coq'uesintic te xulubiletique. Jich me ya xjajch' awoq'uesinic ta sjoyobal ta spisil scampamentoic, soc awunanic: “¡Ta swenta Cajwaltic, soc ta swenta Gedeón!” xaex me ta aw —xi'.

¹⁹ Ja' yu'un te jo'winic (100) swinictac Gedeón, c'ot soc ta jejch' sti'il scampamento te madianetique. Ja' yorailix a te ya sjel sbaic te jcanantaywanejetique, yu'un olilix ajc'ubal a. Jich la yoq'uesinic te xulubil, soc la swuyic te q'uibetic yich'ojic bael ta sc'abique.

²⁰ Ta yoxchajbalic jun nax la yoq'uesinic te xulubil yich'ojic ta sc'abic, soc la swuyic te sq'uibique. Ta xq'uexen sc'abic la yich'ic bael te sc'ajq'uique, yan te xulubil ay ta swa'el sc'abic stuquel, soc awunic: “¡Guerra ta swenta Cajwaltic, soc ta swenta Gedeón!” xiic ta aw.

²¹ Tey nax ainic a te israeletic ta bay tec'ajtic ta sjoyobal scampamentoic te madianetique. Spisil te soldado-madianetic awunic, soc loq'uic bael ta anel.

²² Pero yacalic ta yoq'uesinel xulubil te jo'lajunwinic (300) ta jtul israeletique. Te Cajwaltic ja' nix la yac'bey smil sbaic te madianetic, soc te ya xloq'uic bael ta anel c'alal ta Bet-sita ta sbelal Zerera, soc ja' to ta sti'il sq'uinal Abel-mehola ta nopol Tabat.

²³ Jich la yich' iq'uel tel te sts'umbal Neftalí, te sts'umbal Aser soc te sts'umbal Manasés, swenta yu'un ya me snutsic bael te madianetique.

²⁴ Te Gedeón la sticun c'op ta witstiquil yu'un Efraín, la yal bael mandal te Efraín-winiquetic te ac'a coicuc tel ta yac'beyel guerra te madianetique. Ja' me ac'a ba smaquic ta bay tec'oja' ta Bet-bara soc ta Jordán te c'alal ma to xc'ot stuquelic a. Te sts'umbal Efraín la xch'uunic te mandale.

²⁵ Jich ju' yu'unic xchuquel te cheb jtsobwanej-madianetic, ja' te Oreb soc Zeeb. Te Oreb la smilic ta bay te muc'ul saquil ton. Ta ora yo'tic, “Ton yu'un Oreb”, xi' ta na'el yu'unic. Te Zeeb la smilic ta awilal te sbiilineje, ja' te bay ya yich' pits'el ta teq'uel ya'lel ts'usub te c'alal ya yich' pasel vino. Te c'alal laj yo'tanic ta snutsel te madianetic, la yich'beyic bael sjolic te Oreb soc Zeeb ta stojol Gedeón te ay ta jejch' ja' Jordán.