Jueces 6 - Bible in Tzeltal de Oxchuc y Tenejapa

Dios la yic' Gedeón

¹ Te israeletic bolob yat'elic ta sit te Cajwaltique. Jich yu'un te Cajwaltic la yac'bey ta sc'ab juqueb ja'wil te madianetique.

² Te madianetic la yac'beyic c'axuc swocol te israeletic, squechcon nax ta toyel jajch'el te swocolique. Te bit'il och bayal xiwel ta yo'tanic te israeletic yu'un te madianetic, la spasic yanjibic ta witstiquil, ta nailch'entiquil, soc ta bay chujc'ul q'uinal ta bay wocol ya xtaotiquixe.

³ Te israeletique ay nix bi sts'unojic, pero te madianetic, te amalequetic soc te mach'atic talemic ta stojol sloq'uib c'aal la yaiyic uts'inwanej.

⁴ C'otic ta spasel scampamentoic ta sq'uinal te israeletique. Jujun ja'wil la slajinbeyic sit te yawal-sts'unubic c'alal ta sq'uinal Gaza. Ma'yuc bitic ijq'uitaybotix swe'elinic te israeletic, ni ja'uc te xchijic, swacaxic soc te sburroic te ya xtuun xan yu'unique.

⁵ La yich'ic tel snailpaq'uic soc xchamsbalamic, jich la yochintayic te lumq'uinal soc la slajinic ta spisil. La yiq'uic tel camelloetic, mero c'ax bayal ta jyalel, jich talic te bit'il ya xtalic te c'ulubetique.

⁶ Ta scaj te madianetic te bayal c'ax yo'tanic ta me'bal te israeletique. Ja'uc me to, c'ot yorail te la sc'anbeyic coltayel te Cajwaltique.

⁷ C'alal la sc'anbeyic coltayel Cajwaltic te israeletic te yacuc ac'otuc ta libre,

⁸ jich la sticunbey jtul j'alwanej yu'un te jich c'otic ta albeyel yu'une: —Jich ya yalbeyex awaiyic te Cajwaltic te Dios awu'unic te Israelexe: “Jo'on la jloq'uesex tel ta Egipto ta bay ainex ta mozoile.

⁹ Soc ma ja'uc nax a te loq'uex tel cu'un ta Egipto, la caq'uex ta libre yu'un spisil te mach'atic la yac'beyex awocolique. La jch'oj loq'uel ta atojolic, jich la awich'beyic jilel te sq'uinalique.

¹⁰ Soc la calbeyex te jo'on Awajwalonic te Dioson awu'unique. La calbeyex te manchuc ya awich'ic ta muc' te diosetic yu'un te amorreoetic te ainemexix ta sq'uinalique; ja'uc me to, ma la awich'bonic ta muc' te jc'ope”, xi' te Cajwaltic —xi' te j'alwaneje.

¹¹ Ta patil te ch'ul abat yu'un Cajwaltic, la snajc'an sba ta yet'al jijte' te ay ta lum Ofra, te ay ta swenta Joás, ja' te sts'umbal Abiezer. Gedeón te snich'an Joás yac ta yic'uyel ta muquen te strigo ta yawil bay ya yich' pits'el ta teq'uel te ts'usube, swenta yu'un ma me xyilic te madianetique.

¹² Te ch'ul abat yu'un Cajwaltic la yac' sba ta ilel ta stojol Gedeón, jich la yalbey: —Sjoinejat te Cajwaltique, te tulan winicat soc te ma xiwate —xi'.

¹³ Te Gedeón la sjac': —Pasbon perdón, cajwal, te yu'unuc joinejticuc te Cajwaltic, ¿bistuc yac ta c'axel jwocoltic? ¿Banti ay spisil te jchajp at'eliletic yu'un, te la yalbotic sc'oplal te antiguo jme'-jtatique, te la sloq'uesotic tel ta Egipto a? Pero te Cajwaltic la yijq'uitayotiquix jilel, la yac'otiquix ta sc'ab te madianetique —xi'.

¹⁴ Te Cajwaltic la yilbey sit, jich la yalbey: —Ac'a aba ta abatinel soc te awipe, yu'un ya sc'an te ya xbaat ta scoltayel te israeletic ta sc'ab te madianetique. Jo'on ya jticunat bael —xi' te Cajwaltique.

¹⁵ Te Gedeón la sjac' xan: —Ya jc'anbat xan perdón, cajwal. ¿Bit'il ya xba jcoltay te jlumale? Melel te jo'one sts'umbalon te mach'a mero ma'yuc bi ay cu'untic, c'ax jich te bit'il yantic sts'umbalic Manasés, soc jo'on mero xutilon yu'un te mach'atic ayic ta jna —xi'.

¹⁶ Te Cajwaltic la sjac': —Ya xju' awu'un spasel, melel ya joinat. Ya me atsal te madianetic, jich nax me ya xc'ot ta awo'tan te bit'il jtul nax winic —xi' sc'oplal.

¹⁷ Jich te Gedeón la yal: —Teme yu'un lecon ta asit ya awile, ac'bon junuc prueba quil teme melel te ja'at te ya ac'opone.

¹⁸ Wocoluc a, ma to me xbaat ja' to me teme sujt'on tel ta yich'el tel amajt'an, te ya jc'an cac'bate —xi'. Te Cajwaltic la yalbey ta jamal: —Lec ay. Ya jmaliyat te ya sujt'at tele —xi'.

¹⁹ Te Gedeón bajt' ta xchajbanel tel jcojt' ch'in tentsun, soc jtab ta jp'is harina la spas ta pan te ma ba yich'oj levadura. La yac' bael ta moch te ti'bale. Te ya'lel la yac' bael ta oxom. La yich' bael spisil c'alal ta jijte'.

²⁰ Te ch'ul abat yu'un Dios la yal mandal ta aq'uel ta sba ton te ti'bal soc te pan te ma ba yich'oj levadura, soc te ya smalbey tey a te ya'lele. Te c'alal ju' yu'un Gedeón,

²¹ te ch'ul abat la stij ta sni' sbastón te ti'bal soc te pane, jich loc' tel c'ajc' ta ton, laj ta c'ajq'uel te ti'bal soc te pane. Ora ch'ay ta sit te ch'ul abat yu'un te Cajwaltique.

²² Te Gedeón la sna' stojol te ja' te ch'ul abat yu'un te Cajwaltique. Jich la yal: —¡Ay, ja'at Cajwal! La quilbey jba sit soc te ch'ul abat awu'une —xi'.

²³ Ja'uc me to, te Cajwaltic la sjac': —Ma me xiwat, ma ba ya xlajat. Lamaluc me q'uinal ya awaiy cu'un —xi'.

²⁴ Jich yu'un te Gedeón la sts'ajc'ubey scajtijib ta chiq'uel smajt'an tey a swenta yich'jibal ta muc' te Cajwaltique. “Lamal-o'tanil ya yac' Cajwaltic”, xi' sbiil c'ot yu'un. Te scajtijib majt'anile ay to ta Ofra ta sq'uinal yu'un te sts'umbal Abiezer.

²⁵ Ta ajc'ubal te Cajwaltic la yalbey te Gedeón: —Tsaca jcojt' toro yu'un te atate, ja' te xchebal, te juqueb ya'wilale, jina soc te scajtijib ta chiq'uel smajt'an Baal yu'un te atate. Boja loq'uel te sloc'omba Asera te ts'unul ta sts'eel scajtijib smajt'an Baal.

²⁶ Ts'ajc'ubeya scajtijib smajt'an Cajwaltic te Dios awu'unic, ta bay mero sni'il anjibal q'uinal te inbaye. Tsaca te jcojt' toro, ja' me te xchebale, ac'bon jmajt'anin ta chiq'uel ta scojt'ol. Ja' me ya awac'bey si'ilin te sloc'omba Asera ya aboj loq'uel —xi' te Cajwaltique.

²⁷ Jich yu'un te Gedeón la yic' bael lajuntul abatetic yu'un, ba spas spisil te bit'il albot mandal yu'un te Cajwaltique. Ja' nax te ma c'aalelticuc la spas, ta ajc'ubal la spas, ja' la xi' te mach'atic ay yu'un te state soc te yajwal te lume.

²⁸ Ta sab ta yan c'aal, te c'alal jajch'ic te ants-winiquetic, jinbilix te scajtijib milbil smajt'an Baal te c'o staique. Ja' nix jich bojbilix loq'uel te sloc'omba Asera te ay ta sts'eel te scajtijib ta chic'beyel smajt'an Baal. La yilic te chic'bilix jcojt' toro tey a ta bay yach'il scajtijib te majt'anile.

²⁹ Juju-jtul la sjojc'obey sbaic: —¿Mach'a la spas? —xiic. Te c'alal bayal la sleiquix a, la sna'ic stojol te ja' la spas te Gedeón te snich'an Joás. Ja' yu'un ba yilic te Joás, jich ba yalbeyic:

³⁰ —Loq'uesa tel te anich'ane, ya jmiltic. Melel la sjinbey scajtijib ta chiq'uel smajt'an Baal, soc te sloc'omba Asera te ts'unul ta sts'eele —xiic.

³¹ Te Joás la sjac'bey sc'opic te mach'atic tal ta joytayel yu'une: —¿Ya bal acoltayic te Baal, ya bal awac' guerra ta swenta? ¡Ja' lec te lajemuquix te ma to sacub q'uinal a te mach'atic ya xc'opojic yu'un Baal! Teme ja' Dios te Baal, ac'beya scoltay sba stuquel, melel ja' yu'un te scajtijib majt'anil te jinbote —xi'.

³² Jich yu'un te Gedeón la yac'beyic sbiilin Jerobaal. Jich la yalic: “Ac'a scoltay sba Baal ta stojol te scontroe”, xiic, melel ja' nix te Gedeón la sjinbey scajtijib smajt'an te Baale.

³³ Spisil te madianetic, te amalequetic soc te mach'atic talemic ta stojol sloq'uib c'aale, la stsob sbaic tel, c'axic tel ta muc'ja' Jordán. La sleic banti ya spas scampamentoic ta spamlej q'uinal Jezreel.

³⁴ Te espíritu yu'un Cajwaltic wentainot ta jyalel yu'un te Gedeón. Jich la yoq'uesin xulubil swenta yu'un jun nax me ya xtal yac' sba soc te mach'atic sts'umbal Abiezer.

³⁵ Soc la sticunbey xan c'op ta iq'uel tel spisil te sts'umbal Manasés te jun nax ya xtal yac' sbaic soque. La sticunbey xan sc'oplal ta iq'uel tel te sts'umbal Aser, Zabulón soc te sts'umbal Neftalí. Jich talic ta spisilic, la stsob sbaic ta jun nax.

³⁶ Te Gedeón la yalbey te Diose: —Teme melel te ya awabatinon ta scoltayel te jlumal te jich awalojbone,

³⁷ ya jlich' te snujc'ulel chij ta bay smajibal trigo. Teme buen ajch'em te stsotsil snujc'ulel chij ta sab yu'un te ts'ujul ta ajc'ubale, teme taquin te lumq'uinale, tey me ya jna' a te melel ya awabatinon ta scoltayel te jlumal, jich te bit'il awalojbone —xi' te Gedeón.

³⁸ Jich a c'ot ta pasel. C'alal jajch' te Gedeón ta sab, la spits'bey loq'uel ya'lel te stsotsil te nujc'ule. Noj jun taza yu'un te ya'lele.

³⁹ Ja'uc me to, te Gedeón jich la yal: —Ma me x'ilinat ta jtojol yu'un te ay bi ya calbat xan: yu'un ya jc'an ya jpas jun xan prueba quil. Yo'tic, taquin ac'a jiluc te snujc'ulel chije. Te ts'ujul ta ajc'ubal, ajch'em ac'a jiluc yu'un te lumq'uinale —xi'.

⁴⁰ Ta ajc'ubal jich la spas te Diose. Ta sab, taquin a jil te stsotsil snujc'ulel chije, yan ta bay sjoyobal, te lumq'uinal ajch'em jilel spisil yu'un te ts'ujul ta ajc'ubale.