Jueces 4 - Bible in Tzeltal de Oxchuc y Tenejapa

Débora soc Barac la stsalic Sísara

¹ C'alal laj bael te Aod, te israeletic jajch'ic xan ta spasel te bila amen ta sit te Cajwaltique.

² Jich yu'un te Cajwaltic la yac'bey ta sc'ab Jabín, ajwalil-cananeo ay ta lum Hazor. Te mach'a ay ta jtsobwanej ta swenta te soldadoetic yu'un Jabín, Sísara sbiil, nainem ta Haroset-goim.

³ Te Jabín ay jo'winic yoxbajc' (900) carreta-taq'uinetic yu'un. Jtab ja'wil la yac'bey buen tulan woclajel te israeletic, ja' to c'alal la yalbeyic wocol te Cajwaltic te yacuc xcoltayotic yu'une.

⁴ Ja' te bi ora ay ta wentainel te israeletic yu'un jtul antsil-j'alwanej, Débora sbiil, yinam Lapidot.

⁵ Te Débora spisil ora la snajc'an sba ta yet'al palma (ac'bot sbiil yu'unic “te palma yu'un Débora”), ay ta witstiquil yu'un Efraín. Te te' ay ta olilal yu'un te lumetic Ramá soc Betel. Te israeletic spisil ora talic ta stojol te ants ta xchajbanel te c'opetic yu'unique.

⁶ Ay jun c'aal te Débora la sticun ta iq'uel jtul winic Barac sbiil, snich'an Abinoam. Te winic ainem ta Cedes, jpam lum te ay ta sq'uinal sts'umbal Neftalí. Te Débora jich la yalbey: —Te Cajwaltic te Dios cu'untic te israelotic, ay smandal ya yalbat: “Baan ta bay wits Tabor, tsoba lajunmil (10,000) ta jtul winiquetic tey a te sts'umbal Neftalí soc sts'umbal Zabulón.

⁷ Te jo'on ya cac' ya xtal te Sísara te jtsobwanej-soldadoetic yu'un Jabín ta yocja' Cisón. Ya xtal yac'bat guerra, soc te carretaetic soc te soldadoetic yu'une. Ja'uc me to, ya me cac'beyex ta ac'abic”, xi' te Diose —la yut.

⁸ La yal te Barac: —Ja' nax me ya xboon teme ya ajoinon baele. Yan teme ma ba ya ajoinon bael, ma ba ya xboon —xi'.

⁹ La yal te Débora: —Yacuc, ya joinat bael. Ja'uc me to, te bi yutsilal ya xc'ot ta pasel te ya ajache ma me ja'ucat awu'un stuquel, melel te Sísara ya x'ac'ot ta sc'ab jtul ants yu'un te Cajwaltique —xi'. Jich yu'un te Débora bajt' soc Barac ta Cedes.

¹⁰ Te Barac tey la yic' a te sts'umbal Zabulón soc te sts'umbal Neftalí. Ju' yu'un stsobel lajunmil (10,000) ta jtul winiquetic. Te Débora bajt' soc.

¹¹ Ta jijte' ta Zaanaim, te nopol yiloj sba soc lum Cedes, tey yac'oj scampamento te Heber te quenita-winic, te la sloq'ues sba tel ta stojolic te yantic quenitaetic te sts'umbalinejic tel te Hobab te snialmamal Moisés.

¹² C'alal la yaiy stojol Sísara te moemix bael ta wits Tabor te Barac,

¹³ la stsob tel te jo'winic yoxbajc' (900) carreta-taq'uinetic soc spisil te soldadoetic yu'une. Beenic bael c'alal ta Haroset-goim, c'alal yocja' Cisón.

¹⁴ Jich yu'un te Débora la yalbey te Barac: —Jajch'an me, melel te Cajwaltic ya me yac'bat ta ac'ab yo'tic te Sísara. Te Cajwaltic ja' me j'ic'wanej ta stojol te soldadoetic awu'une —xi'. Te Barac co tel ta wits Tabor soc te lajunmil (10,000) soldadoetic yu'une.

¹⁵ Te Cajwaltic la yac'bey muc'ul xiwel ta yo'tanic te yajwal carretaetic soc te soldadoetic yu'un Sísara, ja' te bi ora la sta sba ta guerra soc te Barac. Te Sísara ora co ta scarreta, an bael ta yacan.

¹⁶ Te Barac la snuts bael te soldadoetic soc te carretaetic c'alal ta Haroset-goim. Te bi c'aalil c'ot ta pasele, ma'yuc ni jtuluc soldado yu'un Sísara te cuxul jilel, spisil lajic.

¹⁷ Te Jabín te ajwalil yu'un Hazor, jun yo'tan sba soc te mach'atic ay yu'un Heber te quenita-winique. Te Sísara, te bit'il an bael ta yacan, c'ot c'alal ta snailpac' Jael, te yinam Heber.

¹⁸ Te Jael loc' tel ta stael, jich la yalbey: —La', cajwal, ochan, ma xiwat —la yut. Te Sísara och bael. Te Jael la snac', la smuc ta pac'.

¹⁹ Te Sísara la sc'an ja' yuch', yu'un bayal taquinti'il la yaiy. Te Jael la sjambey sti' nujc'ul te yawil leche, la yac'bey yuch'. Patil la smuc xan ta pac'.

²⁰ Te Sísara la yalbey te Jael: —Ainan ta yochibal nailpac'. Teme ay mach'a ya xtale, teme ya sjojc'obat, “¿Ay bal mach'a ay ta yutil ana?” teme xie, “Ma'yuc”, uta me —xi'.

²¹ Ja'uc me to, mero luben te Sísara, jich c'ub swayel. Jich yu'un te Jael la stsac martillo soc jch'ix estaca te ya xtuun ta snijt'anel snailpac' a. Noptsaj bael, c'unc'un nax ta jyalel, ta banti ay Sísara. La sbajbey coel ta xujc' xchiquin, jelaw c'axel ta lum, jich laj te Sísara.

²² C'alal c'ot te Barac ta sleel te Sísara, te Jael loc' bael ta stael, jich la yalbey: —La' ilawil, ya cac'bat awil te mach'a yacat ta sleele —xi'. Te Barac och bael ta nailpac', lajemix a c'o sta te Sísara, ts'apal coel estaca ta xujc' xchiquin.

²³ Te Cajwaltic ja' yorail te la yac' pejc'ajuc yip te ajwalil-cananeo Jabín ta stojol te israeletique.

²⁴ Jich jajch'ic te israeletic, squechcon ta tulanajel te bi la spasbeyic ta stojol te Jabín, ja' to c'alal la smilic.