Jueces 20 - Bible in Tzeltal de Oxchuc y Tenejapa

Jajch' slab yo'tanic israeletic yu'un mach'a laj ta Gabaa

¹ Ta spisil te israeletic ta Dan c'alal ta Beerseba soc ta Galaad, la stsob sbaic ta Mizpa ta stojol te Cajwaltic, jun nax la yac' sbaic, jich c'otic te bit'il jtul nax winic.

² Spisil te jtsobwanejetic yu'unic ta juju-jchajp sts'umbal Israel, tey ayic a. Te lum yu'un Dios la stsob sbaic jbajc' ta jmil (400,000) soldadoetic te ya xbeenic ta yacanic.

³ Te mach'atic sts'umbal Benjamín la yaiyic stojol te la stsob sbaiquix ta Mizpa te yantic israeletique. Te israeletic la sjojc'obeyic te levita-winic bi la yutic te mach'a laje.

⁴ Te levita-winic, te smamlal te mach'a laje, la yal: —C'oon soc cants ta lum Gabaa te ay ta sq'uinal sts'umbal Benjamín, te tey ya xc'ax ajc'ubal cu'un a.

⁵ Ta ajc'ubal la stsob sbaic tel te winiquetic yu'un te lume. La sjoytayic te na te banti ayon, yu'un snopojic te ya smilonique. Soc la yuts'inbonic te cantse, ja' to c'alal laj yu'unic.

⁶ Jich yu'un la jtsacbey te sbaq'uetal, la jbojbey, la jpucbey bael ta spamal te jlumaltique, swenta yu'un spisil me Israel ya yaiyic stojol te bila mero c'ax amen c'ot ta pasele.

⁷ Ta ora to ayix ta awentaic ja'ex, jlumalex, ta snopel soc ta sna'el te bila ya sc'an ya yich' pasele —xi'.

⁸ Tejc'ajic ta ora ta spisilic, jich c'oem te bit'il jtul nax winic la yac' sbaic, jich la yalic: —Te jo'otic ma sujt'otic bael jtuluc ta jnailpac'tic o ta jnatic.

⁹ Te bila ya sc'an ya jpastique, ja' te ya jpastic snúmero ta na'el te mach'atic ya xba yac'beyic guerra te lum Gabaa.

¹⁰ Ya me jloq'uestic jtul ta lajuntul winiquetic ta spisil ta chajbalchajp jts'umbaltic, ja'ic me ya x'och ta swentaic sleel we'elil yu'un te soldadoetique. Te yantic ya me yac'beyic stoj te swinquilel Gabaa te bila amen la spasbey te jlumaltique —xiic.

¹¹ Spisil israeletic jun nax la yac' sbaic ta yac'beyel guerra te lume, jich c'oem te bit'il jtul nax winic.

¹² La sticunic bael c'op ta spamal sq'uinal te sts'umbal Benjamín te la yich' alel ta stojolic: “¿Bistuc te mulil la yich' pasel awu'unic?

¹³ Ac'botic ta jc'abtic te winiquetic te amen yo'tanic te ayic ta Gabaa, swenta yu'un ya jmiltic, jich me ya xlecub te jlumaltic te bit'il ya yich' loq'uesel te mulile”, xiic. Te sts'umbal Benjamín ma la yich'beyic ta muc' sc'op te yermanotaque.

¹⁴ Spisil te benjaminetic te ayic ta lumetic jajch' stsob sbaic ta Gabaa, swenta yu'un ya xba yac'beyic guerra te yantic israeletique.

¹⁵ Te soldadoetic ta lumetic yu'un Benjamín la xchajban sbaic waqueb xcha'winic ta jmil (26,000). Ma ba la yich' ta ajtayel te jo'lajunwinic xcha'bajc' (700) winiquetic tsabil te ayic ta lum Gabaa.

¹⁶ Ta spisil te jo'lajunwinic xcha'bajq'ue (700) q'uexen c'abetic te mero ya yac'beyic jimoch'il soc ton, ta mero jlijc' tsotsil jolol ya stsacot yu'unic, mero ma xc'ax te sc'abique.

¹⁷ Te yantic israeletic la stsob sbaic jbajc' ta jmil (400,000) te ya sna'ic guerra ta lec.

Guerra ta stojol sts'umbal Benjamín

¹⁸ Te israeletic bajt'ic ta lum Betel, tey la sjojc'obeyic Dios swenta sna'el te mach'a neel ta chajbalchajp sts'umbal Israel te ya xba yac'bey guerra te sts'umbal Benjamín. Te Cajwaltic la sjac' te ja' neel ya xbajt' te sts'umbal Judá.

¹⁹ Jich yu'un te soldado-israeletic buen sab a jajch'ic, ba spas scampamentoic ta nopol lum Gabaa.

²⁰ Loq'uic bael ta yac'beyel sbaic guerra soc te benjaminetic, la xchol sbaic ta stojol lum Gabaa, jich bit'il ay ta pasel te guerrae.

²¹ Ja'uc me to, te benjaminetic loq'uic tel. Ta jun nax c'aal la smilic cheb xcha'winic ta jmil (22,000) israeletic.

^22-24 Jich yu'un te israeletic bajt'ic ta Betel ta oq'uel ta stojol Cajwaltic, c'alal ta yijc'ubel q'uinal. Tey la sjojc'oyic teme ya to xcha'sujt'ic ta guerra soc te yermanotac, ja' te sts'umbal Benjamín. Te Cajwaltic la yalbey te ac'a bajt'uquic xan ta guerra soc, jich la staic xan smuc'ul yo'tanic. Jich yu'un, ta yan c'aal ochic ta guerra soc te benjaminetic, tey nix ta bay la spasic ta yan c'aal.

²⁵ Te benjaminetic cha'loq'uic tel ta Gabaa, la smilic xan waxaclajuneb ta jmil (18,000) soldado-israeletic.

²⁶ Jich yu'un ta spisil te soldadoetic yu'un Israel soc spisil te lume, cha'bajt'ic ta Betel ta oq'uel ta stojol te Cajwaltique. Sjunal c'aal c'ax yu'unic, ma ba we'ic, soc la yac'beyic majt'anil la xchic'beyic Cajwaltic, soc la smilic majt'anil swenta lamal-o'tanil.

^27-28 Ja' yorail ay ta Betel a te scajonil trato yu'un Dios, soc te sacerdote yu'un, ja' te Finees, te snich'an Eleazar soc ja' smam te Aarón. Te israeletic la sjojc'obeyic te Cajwaltic: —¿Ya to bal xju' ya cac'beytic guerra te quermanotactic sts'umbal Benjamín, o ja' bal lec jichuc jiluc te bit'il la stsalotique? —xiic. Te Cajwaltic la yal: —Baan ac'beyaic guerra, pajel ya cac'beyex ta ac'abic —xi'.

²⁹ Jich yu'un ay soldado-israeletic la snac' sbaic ta sjoyobal te lum Gabaa.

³⁰ Te yantic ba sta sbaic soc ta guerra ta yoxebal buelta te benjaminetique. La xchol sbaic ta stojol lum Gabaa jich bit'il ay ta pasel te guerra, jich bit'il la spasiquix cheb buelta.

³¹ Jich yu'un te mach'atic sts'umbal Benjamín loq'uic tel, la snutsic bael ta yac'beyel guerra te israeletique. Ay ju' yu'unic smilel, ay niwan lajuneb xcha'winic (30) ta jtul israeletic ta bebetic bael yu'un Betel soc Gabaa soc ta bay aquiltic.

³² La scuyic te yu'un yacalic ta anel bael yu'unic, soc te ju'emix yu'unic ta sc'opic jich bit'il cheb buelta. Ja'uc me to, te israeletic yac ta c'ubul jilel yu'unic yilel te lume swenta yu'un ya xnutsotic bael yu'un te scontroic ta bebetic.

³³ Te israeletic loq'uic tel ta ora te bay ayique, la xchol sbaic ta guerra ta bay Baal-tamar. Ja' nix jich loq'uic tel te yantic israeletic te snac'oj sbaic ta aquiltic ta sjoyobal te lum Gabaa,

³⁴ la yac'beyic guerra te lume. Ay lajunmil (10,000) ta jtul israeletic te mero lequic yu'un guerra te ba yac'beyic guerra te Gabaa. Jich toy te guerrae. Te benjaminetic ma ba la sna'ic stojol te nopol ya xch'ayiquixe.

³⁵ Te Cajwaltic la yac'bey israeletic te ya stsalic te benjaminetique. Ja' yorail a te israeletic la smilic jo'eb xcha'winic ta jmil soc jo'winic (25,100) soldadoetic te sts'umbal Benjamín.

³⁶ Te benjaminetic la sna'ic stojol te ch'ayemiquixe. Melel jich c'otix ta pasel: Te israeletic anic loq'uel yilel ta guerra ta stojol te benjaminetic te nutsotic bael yu'une. Ja' ay ta yo'tanic te ya xju' yu'unic te winiquetic snac'oj sbaic yu'un yaq'uel guerra te lum Gabaa.

³⁷ Te winiquetic la yochintayic te Gabaa, te mero ch'ayem yo'tan a, soc la smilic ta puñal ta spisil te lume.

³⁸ Te mach'atic snac'oj sbaic ta yaq'uel guerra te lume, xchapojic soc te yantic israeletic te ja' seña ya yilic te ochix ta sc'abic a te c'alal xtomet ya xloc' xch'ailel te lume.

³⁹ Te c'alal te israeletic te yacaliquix ta anel yilele la yilic te ch'aile, sujt'ic bael ta yaq'uel guerra te soldado-benjaminetique. Te benjaminetic ju' yu'unic smilel lajuneb xcha'winic (30) ta jtul israeletic, ja' la yich'ic ta muc' a, la scuyic te tsalbilix yu'unic ta sc'opic, jich bit'il ta sbabial buelta guerra.

⁴⁰ Ja'uc me to, jajch' ta loq'uel xch'ailel te lume. La yil sujt'el te benjaminetic, la yilic te bit'il xpulpon nax ta tilel c'ajc', soc te xch'ailel c'alal ta toyol.

⁴¹ Te israeletic la sut sbaic bael ta ora. Te benjaminetic xiwic yu'un te ay bi muc' talix ta stojolique.

⁴² Loq'uic bael ta anel ta stojol israeletic ta sbelal bael te jochol taquin q'uinale. Ma ju'ix yu'unic te ya scoltay sbaic, melel te mach'atic loq'uic tel ta lum, la smaquic ta be soc la smilic.

⁴³ Te benjaminetic la yich'ic joytayel yu'un te israeletique. Ja'ic la snutsic soc la spech'ic bael ta teq'uel ta Menúha c'alal ta Gabaa, ta stojol sloq'uib c'aal.

⁴⁴ Jich lajic waxaclajuneb ta jmil (18,000) soldadoetic yu'un te sts'umbal Benjamín.

⁴⁵ Te mach'atic cuxulic xan jilel, sujt'ic soc loq'uic bael ta anel ta stojol jochol taquin q'uinal, c'alal ta muc'ul ton Rimón. Ay jo'mil (5,000) ta jtul laj jilel ta bebetic. Te israeletic la snutsic xan bael, la smilic cha'mil (2,000) winiquetic.

⁴⁶ Ta spisilic lajic jo'eb xcha'winic ta jmil (25,000) te mero lequil soldadoetic sts'umbal Benjamín.

⁴⁷ Te yantic olil xcha'bajc' (600) benjaminetic sujt'ic bael ta spatic, soc anic bael ta stojol jochol taquin q'uinal. Tey jilic chaneb u ta bay muc'ul ton Rimón.

⁴⁸ Te israeletic ora la yac'beyic guerra te yantic benjaminetic, laj ta puñal te juju-jpam lume. La smilbeyic te xchamsbalamic soc spisil te bitic la staic ta be, soc la xchiq'uic te lumetique.