Jueces 2 - Bible in Tzeltal de Oxchuc y Tenejapa

Ch'ul abat yu'un Cajwaltic ta Boquim

¹ Te ch'ul abat yu'un Cajwaltic loc' ta Gilgal, bajt' ta Boquim. Jich la yalbey te israeletic: —Jo'on la jloq'uesex tel ta Egipto, la quiq'uex tel ta bay in q'uinal to te la calbey te antiguo ame'-atatique: “Ma'yuc bi ora ya jlajinbey sc'oplal te trato cu'un ta atojolic te ja'exe”, xoon.

² Ja' la cal yu'un te manchuc ya apasic trato soc te mach'atic yajwalic te q'uinale, soc te yacuc ajinbeyic te scajtijib ta chiq'uel majt'aniletic yu'unique; ja'uc me to, ma la ac'an la ach'uunic. Ilawil te bila apasojiquixe.

³ Jich yu'un ya calbeyex yo'tic: Ma ba ya jloq'uesbeyex bael te lumetique. Te lumetic soc diosetic yu'unic, ja' me ayaquilic ya xc'ot ta atojolic te ja'exe —xi' te ch'ul abate.

⁴ C'alal laj yo'tan ta c'op te ch'ul abat yu'un Cajwaltic, spisil te israeletic jajch'ic ta tulan aw ta oq'uel.

⁵ Ja' swentail te Boquim c'ot sbiil yu'unic ta bay c'opoje. Tey la yac'beyic milbil smajt'an a te Cajwaltique.

Laj Josué

⁶ C'alal la sc'opon xan jilel israeletic te Josué, juju-jtul bajt' ta sq'uinal te c'ot ta swentae.

⁷ C'alal cuxul to a te Josué, te israeletic jun yo'tan la xch'uunbeyic smandal te Cajwaltic, soc nix te c'alal cuxulic to jilel te mamaletic te la yilic te bi muc' la spas te Cajwaltic ta swenta xc'uxtayel Israel.

⁸ Pero laj te Josué, lajuneb swacwinic (110) ya'wilal a.

⁹ La smuquic ta sq'uinal nix ta Timnat-sera, te ay ta stojol norte yu'un te wits Gaas, ta witstiquil yu'un Efraín.

¹⁰ Lajic ta spisil te israeletic te ayiquix ta q'uinal a te c'alal cuxul to a te Josué. Ja' yu'un te mach'atic ayinic xan ta patil, ma la sna'beyiquix sba te Cajwaltic, soc spisil te bitic la spas ta xc'uxtayel te Israele.

Israeletic la yijq'uitayic Cajwaltic

¹¹ Te israeletic la spasic bi amen ta sit te Cajwaltic, ja' te bit'il jajch'ic ta xch'uunel loc'ombaetic yu'un Baal.

¹² La yijq'uitayic ta yo'tanic te Cajwaltic te Dios yu'un te antiguo sme'-static, te loq'uesotic tel yu'un ta Egipto. Ja' la yac' sbaic ta xch'uunel te loc'ombaetic yu'un te lumetic te ainemic ta sjoyobale. Jich la sjajch'esbeyic yilimba te Cajwaltique.

¹³ La yijq'uitayic ta yo'tanic ta scaj xch'uunel te Baal, soc te jayeb ta jchajp loc'ombaetic yu'un te Astarté te antsil-diose.

¹⁴ Ja' swentail te ilin Cajwaltic ta stojol Israel. Jich la yac' taluc j'eleq'uetic te tal spojbeyic te bitic ay yu'unique. Te scontroic te ayic ta sjoyobal, tsalotic yu'un, xujt' ma ju' yu'unic te ya stsal sbaic soque.

¹⁵ Jujun buelta te ya xbajt'ic ta guerra, ma'yuc ta coltayel yu'un te Cajwaltique. Squechconic ta bolobel, melel jich nix albot sc'oplalic ta neelal. Manchuc me ac'botiquix tulan swocolic te israeletic yu'un te Cajwaltic,

¹⁶ ja'uc me to, la xchicnantesbey juecetic te ya xcoltayotic yu'un, te bit'il yac ta bael ta pojel sbiluquic yu'un te j'eleq'uetique.

¹⁷ Ja'uc me to, te israeletic ma la yich'ic ta muc' te juecetique. Jc'axel chebaj yo'tanic ta stojol Cajwaltic, la xch'uunic loc'ombaetic te scuyojic ta diosetique. Te antiguo sme'-static la xch'uunbeyic te mandaliletic yu'un Cajwaltic; yan stuquelic ma ja'uc la snopbeyic te yo'tanique.

¹⁸ Te juez ya sle jujun buelta te Cajwaltique, ya xcoltayot yu'un te jayeb c'aal cuxule, soc ya xcoltayotic te israeletic ta sc'ab te scontroique. Te Cajwaltic ya sna'bey yo'bolil sbaic c'alal ya yaiybey stojol yajc'anic, yu'un ya xwoclajic bayal yu'un te uts'inele.

¹⁹ Ja'uc me to, te c'alal ya xlaj te juez, ya xcha'boltes sbaic xan, ja' c'axem to xan jelawen la spasic a te bit'il sme'-statique. La xch'uunic soc la yac' sbaic ta abatinel yu'un loc'ombaetic te scuyojic ta diosetique. Ma la yijq'uitayic te bi snopojic spasel soc te sbolil yo'tanique.

²⁰ Ja' swentail te ilin yo'tan Cajwaltic ta stojol Israel. Jich la yal: “Te lume, ma xyich'ic ta muc' te trato jchapoj soc te antiguo sme'-statique, soc ma sc'an xch'uunbonic te jc'ope.

²¹ Ja' yu'un ma ba ya jloq'uesbey bael ni jchajbuc te lumetic, te ma loq'uemuc bael yu'un te Josué te c'alal ma to xlaj a”, xi' te Cajwaltique.

²² Ja' la sc'an yil Cajwaltic a teme ya xch'uunbeyic smandal jich bit'il te antiguo sme'-statique, o teme ma sc'aniquix stuquelique.

²³ Ja' swentail ta yo'tan Cajwaltic te ma la sloq'uesbey bael yajwal te lumetic te banti ma ba ac'bot ta sc'ab Josué, jich nax la yijq'uitay jilel.