Jueces 19 - Bible in Tzeltal de Oxchuc y Tenejapa

Levita-winic soc ants yu'un

¹ Te c'alal ma'yuc ajwalil ta Israel, ay jtul levita-winic te c'ubul to nainem ta witstiquil yu'un Efraín. Te levita-winic la yic' yantsin jtul ants ay ta Belén ta sq'uinal Judá.

² Te antse ilin ta stojol te levita, jich ba sjoin stat ta Belén. Te c'alal ayix chaneb u sc'oel,

³ te levita-winic bajt' ta sleel, ba slecubtesbey yo'tan te yacuc sujt' tel soc. La yic' bael jtul yabat soc cheb burroetic. Te antse jun yo'tan la yic' ochel ta sna te state.

⁴ Ja' nix jich te stat, bin nax yo'tan ta stojol, la yalbey te ya xjoinotic yu'une. Te levita-winic soc te yabate ainic oxebuc c'aal ta sna stat te antse, we'ic, uch'ajic, soc wayic tey a.

⁵ Ta xchanebal c'aal sab jajch'ic te ya xbajt'iquix; ja'uc me to, te c'alal baeliquix a, te stat te antse la yalbey te sniale: —We'an, manchuc me ch'in xejt' xanix ya awe' te bit'il ma to xbaate, swenta yu'un ay me awip a —xi'.

⁶ Ta xchebalic pajal la snajc'an sbaic ta we'el ta uch'ajel. Te stat te antse la sc'an te yacuc xcom xan, te binuc nax yo'tan ya xc'ax jun xan ajc'ubal yu'un.

⁷ Te levita-winic, manchuc me la stejc'an sbaix ta beel, la to scom xan sba te bit'il bayal buelta wulilayot yu'un te snialmamale.

⁸ Ta yo'ebal c'aal te levita-winic sab jajch' swenta yu'un ya xbajt'ix. Ja'uc me to, te stat te antse la yalbey wocol ta yan buelta te ac'a we'uc te bit'il ma to xloc' baele, swenta yu'un ay me yip a. Jich we'ic xchebalic, yu'un ja' to malc'aal te c'an bajt'uque.

⁹ Te levita-winic la stejc'an sba jajch'el yu'un ya xbajt'ix soc te yantse soc te yabate. Te snialmamal la yalbey te malix te c'aale, ch'ayelix bael a, te yacuc scom sba xan te binuc nax yo'tan ya xc'ax jun xan ajc'ubal yu'un tey a, swenta yu'un buen sab ac'a loc'uc bael ta yan c'aal.

¹⁰ Ja'uc me to, te levita-winic ma la sc'anix te ya xc'ax ajc'ubal yu'un tey a. Bajt' soc te yantse, te yabat, soc te cheb burroetic te chapalic soc sillaetique. C'alal c'otic ta nopol lum Jebús, ja' te Jerusalén,

¹¹ jich albot yu'un te yabate: —¿Bi xaat yu'un teme tey ya xc'ax ajc'ubal cu'untic ta lum yu'un te jebuseoetic? —xi'.

¹² Te levita-winic la sjac': —Ni jpamuc lum ma x'ochotic tey a teme ma ja'uc yu'un Israel. Beenucotic xan ja' to c'alal ta lum Gabaa.

¹³ Ya me quiltic teme tey ya xc'ax ajc'ubal cu'untic ta lum Gabaa, o teme ta lum Ramá —xi'.

¹⁴ Jich a cha'beenic xan bael. C'alal ch'ay bael te c'aal, c'otic ta Gabaa, ja' jpam lum yu'un te sts'umbal Benjamín.

¹⁵ La yijq'uitayic jilel te be, ochic bael ta Gabaa swenta yu'un tey ya xc'ax ajc'ubal yu'unic a. Tey c'o snajc'an sbaic ta parque, melel ma'yuc mach'a ya x'ac'bot swayib yu'un.

¹⁶ Ja'uc me to, ajc'ubalix a te c'ax tel jtul mamal te sujt' tel ta yat'el ta sc'al. Te mamal ay ta witstiquil yu'un Efraín, ja' nax yu'un te talem ta nainel ta Gabaa, melel te mach'atic nainemic ta lum ja'ic te mach'atic sts'umbal Benjamín.

¹⁷ Te c'alal la yil te mamal te jbeome, la sjojc'obey: —¿Banti talemat, soc banti ya xbaat? —xi' te mamale.

¹⁸ Te levita-winic la sjac': —C'axel nax ayotic. Talotic ta Belén ta sq'uinal Judá, ya xbootic ta c'ubul witstiquil yu'un Efraín, tey nainemon a. Xc'otucon ta Belén, yo'tic ya sujt'onix bael ta jna. Ja'uc me to, ma'yuc bay jtaoj li'to te mach'a ya yic'on ta wayel ta sna.

¹⁹ Quich'ojtic ac soc we'elil yu'un te jburrotique. Ay we'elil soc vino cu'un, ay nix yu'un te quinam soc te cabate, ma'yuc falta ya caiytic —xi'.

²⁰ Te mamal la sjac': —Bin nax me co'tan te talemate. Jo'on ya jwentain spisil te bitic ya xtuun awu'une. Ma xcac' te tey ya xc'ax ajc'ubal awu'un ta parque —xi'.

²¹ Te mamale la yic' bael ta sna. Te jbeometic la spoc yacanic, we'ic soc uch'ajic, soc te mamal la yac'bey swe'el te burroetique.

²² C'alal bin nax yo'tanic a, ay winiquetic amen yo'tanic te ayic ta lum, tal sjoytayic te na, jajch'ic ta stijel te ti'naile. La yalbeyic te mamal, ja' te yajwal na: —Loq'uesa tel te winic te awula'e. Ya jc'an ya join jbajtic ta wayel soc —xiic.

²³ Te yajwal na la yalbey wocol: —¡Ma xapasic jich, joytic, wocoluc a! Ma me xtal apasic te bila amen, melel te winique cula' ta jna.

²⁴ Ilawilic te cantsil-nich'ane, tec'tom ach'ix, soc tey ay yants te winique, ya jloq'uesbeyex tel. Chican teme ya awuts'inique, ja' chican bi ya sc'an awo'tan ya apasbeyic. Pero ma me xawuts'inic te winique —la yut.

²⁵ Ja'uc me to, ma la yich'beyic ta muc' sc'op te mamale. Jich yu'un te levita-winic la sloq'ues bael te yants ta calle. Te winiquetic jelawic ta jyalel, la yuts'inic sjunal ajc'ubal ja' to c'alal sacub q'uinal, jich la yijq'uitayic jilel.

²⁶ Yaquix ta sacubel tel q'uinal a c'ot te ants ta sna te mamale, te banti ay te smamlale. Tey mero c'o lajuc ta ti'nail.

²⁷ C'alal jajch' tel te smamlal, la sjam te ti'nail swenta yu'un ya xbajt'ix. Lajemix la sta te yants ta bay smarcoil te ti'naile, cajatic sc'ab ta marco.

²⁸ Jich la yal: —Jajch'an, conic —la yut. Te antse ma la sjac'. Jich yu'un te sbaq'uetale la scajan bael ta sba te burro, jajch' ta beel, bajt' ta sna.

²⁹ C'alal c'ot, la stsac tel cuchillo, la sbojbey sbaq'uetal te yantse, lajchayeb loc' yu'un a. La spuc bael ta spamal sq'uinal Israel.

³⁰ Spisil te mach'atic la yilic, la yalic: —Ja' to c'alal loc' tel ta Egipto te jlumaltique ma'yuc bay quilojtic jich bit'il to. Ac'a me jnop caiytic te bila ya jpastic yu'un —xiic.