Jueces 18 - Bible in Tzeltal de Oxchuc y Tenejapa

Micaía soc mach'atic sts'umbal Dan

¹ Ja' yorail te ma'yuc muc' ajwalil yu'un Israel. Te sts'umbal Dan ma to bay staoj sq'uinalic, jich yu'un yacalic ta sleel te bay ya x'ainique.

² Jich yu'un te mach'atic yu'un Dan la sticunic jajch'el ta Zora soc Estaol jo'tul winiquetic te ma xiwic, swenta yu'un ya xba stsajtayic te q'uinale, yu'un jich me ya sna'ic te bi yilele. Te jo'tul winiquetic bajt'ic ta witstiquil yu'un Efraín, c'otic ta sna Micaía, tey c'ax yu'unic a te ajc'ubale.

³ C'alal nopol ayic ta sna te Micaía la sna'ic te bi yaiyel sc'op te querem-levitae. Jich la sjojc'obeyic: —¿Mach'a la yic'at tel li'to? ¿Bi yu'un te li' ayate? ¿Bi ya ale? —la yutic.

⁴ Te levita la yalbey te spasoj trato soc Micaía. Te trato spasoj soque, ja' te ay ta sacerdoteil yu'un stuquel.

⁵ Jich yu'un la yalbeyic: —Jojc'obotic ta stojol Dios teme lec ya xbeenotic baele, swenta yu'un ya me jna'tic stojol —xiic.

⁶ Te sacerdote la sjac': —Junuc me awo'tanic ya xbaex. Te Cajwaltic ya me yilex bayuc ya xbaex —xi' te levitae.

⁷ Te jo'tul jtsajtaywanejetic bajt'ic ta lum Lais. Te yajwal lum ma'yuc bi ay swocol ya yaiyic yu'un, jich bit'il stalel te sidonetique. Jun nax yo'tanic nainemic tey a, lamal nax q'uinal ta stojolic, ma'yuc mach'a ya x'uts'inotic yu'un, ma'yuc falta ta stojolic. Najt' yiloj sba soc te lum Sidón, ma'yuc mach'a jun yo'tan sba soc.

⁸ Te jo'tul jtsajtaywanejetic sujt'ic bael ta Zora soc Estaol ta bay te sjo'taque. C'otic ta jojc'oyel yu'unic: —¿Bi yilel? —xi' sc'oplalic. La sjaq'uic:

⁹ —Beenotic ta yilel te q'uinal, la quiltic te mero lec. ¡Ja' lec teme ya xjajch'otic ta beele, ya xba quil jbajtic soc! ¡Ma me xanajc'an abaic te xujt' ma'yuc bi ya ac'an apasique! ¡Ac'a ba yich' pojel te q'uinale!

¹⁰ C'alal ya xc'ootic tey a, ya me jtatic te ants-winiquetic te ma'yuc bi chican ta sc'opique. Bayal sq'uinalic, mero ma'yuc bi falta ya yaiyic. Dios me ya yac'beyex awu'uninic te q'uinale —xiic.

¹¹ Olil xcha'bajc' (600) ta jtul winiquetic te sts'umbal Dan loq'uic bael ta Zora soc Estaol, buen chapalic bael soc yat'ejibic.

¹² C'otic ta sq'uinal Judá, la spas scampamentoic tey a ta stojol smalib c'aal yu'un Queriat-jearim, ta bay “Campamento yu'un Dan”, xi' sbiil yu'unic c'alal ora yo'tic.

¹³ Cha'bajt'ic ta witstiquil yu'un Efraín, c'otic ta sna Micaía.

¹⁴ Te jo'tul jtsajtaywanejetic te yilojiquix te q'uinal ta lum Lais, la yalbeyic te sjo'tac: —¿Ya bal ana'ic te ay bila li'to? Ja' te na lum ay to, ay efod soc yajcananic ta na, soc loc'omba te buen pasbil ta plata. ¿Bi ya ac'an apasic yu'un? —xiic.

¹⁵ Te jtsajtaywanejetic c'axic bael ta stojol te yantique, bajt'ic ta stojol te querem-levita te ay ta sna Micaía, la spatbeyic yo'tan.

¹⁶ Yacalic ta maliywanej ta ti'ts'ajc' te lajunwinic xcha'bajc' (600) soldado-danetic te chapalic ta lec soc te yat'ejibique.

¹⁷ Te jo'tul jtsajtaywanejetic ochic bael ta na, la stsaquic te loc'omba te lec pasbil ta plata, te efod, soc te yajcananic ta na. Te sacerdote jil ta ti'ts'ajc' soc te lajunwinic xcha'bajc' (600) soldadoetique.

¹⁸ C'alal la yil te sacerdote te ochic bael te jo'tul ta sna Micaía, soc te la stsaquic te loc'omba, te efod soc te yajcananic yu'un te sna, jich la yalbey: —¿Bi yacalex ta spasel? —xi'.

¹⁹ La sjaq'uic: —¡Ch'aban nax me! ¡La' me, joinawotic bael! Ya jc'antic xtuunat cu'untic ta sacerdote, soc ya jc'antic jichuc ya xc'oat te bit'il jtatic. ¿Me ja'uc lec ya awaiy te ya xtuunat ta sacerdoteil ta stojol spisil ta jchajp sts'umbal Israel, te ma ja'uc jwol nax na yu'un jtul winique? —xiic.

²⁰ Ja' la smulan te sacerdote. La stsac bael te loc'omba, te efod, soc te yajcananic yu'un na, bajt' soc te danetique.

²¹ Cha'jajch'ic ta beel te danetic soc alaletic, chambalametic soc spisil te bitic ay yu'unic, ja' neelaj bael yu'unic.

²² Najt'ix sbaelic a, te Micaía la stsob sba soc te mach'atic nopajtic ay soque, loq'uic ta snutsel bael.

²³ Te danetic la yaiybeyic stojol yaw te mach'atic yacalic ta nutsaw baele. Jich la sujt'es sitic, la sjojc'obeyic te Micaía: —¿Bi la apas? ¿Bistuc bayal ya awawtayotic? —xiic.

²⁴ Te Micaía la sjac': —Ja'ex la awich'bonic bael te diosetic cu'un te jpasoje, soc te sacerdote cu'une, xujt' ma'yuc bi la awijq'uitayboniquix. Yacalex me ta jelawel ta c'op te ya ajojc'obonic te bila ya jpase —xi'.

²⁵ Te danetic la sjaq'uic: —Ma me xtoyat soc te ac'ope. Ja' me wocol teme ay ma xcujch' cu'untic te jo'otique, te ya jlajintic acuxlejal te ja'at soc te mach'atic ay awu'une —xiic.

²⁶ Te Micaía la yil te mero bayalic ta jyalel, jich sujt' bael ta sna. Te danetic beenic bael

²⁷ soc te biluc pasbil yu'un Micaía, soc te sacerdote yu'une, c'otic ta lum Lais. Te mach'atic tey a lamal nax yo'tanic, soc ma'yuc bi chican ta sc'opic. Ja'uc me to, te danetic la smilic ta puñal ta spisil, soc la xchiq'uic te lume.

²⁸ Te lume najt' yiloj sba soc Sidón. Ma'yuc mach'a jun yo'tan sba soc, jich ma'yuc mach'a tal scoltay. Ay ta muc'ul stenlej xatal q'uinal te ay ta swenta Bet-rehob. Te danetic la xcha'pasic te lume, tey jilic ta nainel a.

²⁹ Te lume Lais sbiil ta neelal, Dan sbiil c'otix yu'unic. Ja' yich'jibal ta muc' te antiguo static te sbiil nixe, te snich'an Israel.

³⁰ Te danetic tey la yaq'uic a te loc'omba te lec pasbile, te ya squejan sbaic ta stojole. Te sacerdote yu'une, ja' Jonatán, sts'umbal Gersón, soc ja' antiguo stat te Moisés. Te sts'umbal Jonatán ja' sacerdoteetic ta cajalcaj yu'un te danetic, ja' to ta yorail te tal ta chuquel bael.

³¹ Ay ta yolilic te loc'omba la spas Micaía ta spisil tel c'aal te ay ta Silo te Nailpac' Templo yu'un te Cajwaltique.