Jueces 17 - Bible in Tzeltal de Oxchuc y Tenejapa

Templo yu'un Micaía

¹ Ta witstiquil yu'un Efraín nainem jtul winic, Micaía sbiil.

^2-3 La yal sba ta jamal ta stojol sme': —Te jmil soc jo'winic (1,100) ta jsejp plata te ay mach'atic la yelc'anbate, te la awalbey amen sc'oplal te j'eleq'ue, jo'on quich'oj, jo'on xc'otuc quelc'anbat. Yo'tic ya jsujt'esbat. La caiyix stojol te yacat ta yalel te awac'ojix yu'unin te Cajwaltique, te ya yich' pasel jun loc'omba a te buen pasbil soc pac'bil ta plata —xi'. La sujt'esbey te plata, ja' yu'un te sme' la yal: —Cal, ac'a yac'bat bendición te Cajwaltique —xi'.

⁴ Te bit'il la sujt'esbeyix staq'uin sme' te Micaía, jich yu'un te sme' la stsac bael lajunwinic ta jsejp plata, ba yac'bey te jpas-caldera, swenta yu'un ya spas jun loc'omba a, te buen pasbil soc te pac'bil ta potsel ta plata. Ta patil ba yac'bey ta sna te Micaía.

⁵ Te Micaía ay jtsal na yu'un ta bay ya squejan sba ta stojol te dios yu'une. La spas jun efod soc yajcanan yu'un sna. Ja' la yac' ta sacerdote te jtul snich'ane.

⁶ Ma'yuc muc' ajwalil yu'unic ta Israel, jich yu'un juju-jtul la spasic te bi la sc'an yo'tanique.

⁷ Ta lum Belén ta sq'uinal sts'umbal Judá ay jtul muc'ul querem talem ta q'uejel, te sts'umbal Leví.

⁸ Te querem loc' bael ta Belén ta sleel ta bay ya xba nainuc. Been bael ta bay witstiquil yu'un Efraín, c'ot ta sna te Micaía.

⁹ —¿Banti talemat? —xi' te Micaía. —Talon ta Belén. Jo'on levitaon, yacon ta sleel te bay ya xnainone —xi' ta sujt'esel te quereme.

¹⁰ La yal te Micaía: —Jilan, joinawon. Ja' me sacerdote ya xc'oat cu'un, soc jich me ya xc'oat te bit'il mero jtat. Jo'on ya jtojat lajuneb ta jsejp plata ta jujun ja'wil, soc ya cac'bat ac'u'-apac' soc awe'el —la yut.

¹¹ Te levita la xch'uun, la sjoin ta nainel te Micaía, jich c'ot te bit'il mero snich'an.

¹² Te Micaía la yac' ta sacerdoteil te quereme, jil ta nainel tey a.

¹³ Te Micaía la scuy te mero ay bendición ta stojol yu'un Dios te bit'il ay jtul levita te ay ta sacerdoteil yu'une.