Jueces 15 - Bible in Tzeltal de Oxchuc y Tenejapa

¹ Te c'alal c'axix c'aal a, ta yorail te ya xloq'uix a te trigo, te Sansón ba yil te yiname, soc la yic'bey bael ch'in tentsun. Jich la yal c'oel: —Ya x'ochon bael ta yilel te quinam ta scuarto —xi' c'oel. Ja'uc me to, te snialmamal ma la yac' ochel.

² Jich la yalbey: —La jcuy te yu'un ma x'ac'anixe, jich yu'un la cac'bey yic' te ajoye. Ja'uc me to, te yijts'in ja' c'axem to xan yutsil a. Ic'a, ja' sjelol ya xc'ot te xwixe —xi'.

³ Te Sansón la sjac': —Ta ora yo'tic ma me jmuluc ya xc'ot te bila ma lecuc ya jpasbey te filisteoetique —xi'.

⁴ Jich ba stsac jo'lajunwinic (300) ta jcojt' waxetic. Cha'cha'cojt' la syombey ta chuquel te sneique, soc tey la xchucbey a te silbil tajetic, ja' te bay syomojbey ta chuquel te sneique.

⁵ La stsumbey sc'aal te taje, la scoltay bael te waxetic ta bay te q'uinale ta bay strigoic te filisteoetique. Jich c'ajc' te trigoetic te busajtiquix ta set'ele soc te ma to set'biluque. C'ajq'uic uuc te ts'usubiletic soc te olivoetique.

⁶ Te filisteoetic la sjojc'oyic ta lec te mach'a la spase. C'alal la yaiyic stojol te ja' Sansón, te ja' spacol ta stojol te snialmamal, te Timnat-winic, te la spojbey yinam, te ja' la yac'bey te sjoye, bajt'ic ta chiq'uel te ants soc te state.

⁷ Jich la yal yu'un te Sansón: —Ja' yu'un la quilix te bit'il ay te awat'elique, ya me cal ta jamal te ma ba jcom jba ja' to teme la quich'bey spacol ta atojolique —xi'.

⁸ Mero c'ajc'uben yo'tan, tulan la yac'bey guerra, tsobol la smil. Ta patil ba ainuc ta nailch'en te ay ta muc'ul ton Etam.

Sansón soc sbaquel yalan'e burro

⁹ Te filisteoetic tal spas scampamentoic ta sq'uinal Judá, ja' to c'alal ta Lehi.

¹⁰ Te judioetic la sjojc'obeyic: —¿Bi yu'un tal awac'botic guerra te jo'otique? —la yutic. La sjaq'uic: —Ja' talotic ta xchuquel te Sansón, swenta yu'un ya me stojbotic te bi la spasbotique —xiic.

¹¹ C'alal la yaiyic stojol te judioetic, bajt'ic ta nailch'en ta Etam oxmil (3,000) ta jtul winiquetic te sts'umbal Judá. Jich la yalbeyic te Sansón: —¿Yu'un bal ma x'ana' te ja' c'axem to xan tulanic cu'untic te filisteoetique? ¿Bistuc tal ajach c'op ta jtojoltic? —xiic. Te Sansón la sjac': —Ma'yuc yan bi yacon ta spasel ta stojolic, ja' nax ya cac'bey stojic te bi la spasbonique —xi'.

¹² Jich la yalbeyic: —Te jo'otique tal jchucticat bael, yu'un ya awich' aq'uel ta sc'ab te filisteoetique —xiic. Te Sansón la yal: —Albonic ta jamal te ma ja'uc ya amilonic te ja'exe —xi'.

¹³ La yalbeyic ta smelelil: —Ma ba ya awich' milel, ja' nax ya awich' chuquel bael. Ya awich' aq'uel ta sc'ab te filisteoetique —xiic. Jich la xchuquic bael ta cha'lijc' yach'il lazo. La sloq'uesic bael tey a ta bay snac'oj sbae.

¹⁴ C'alal a c'otic ta Lehi, te filisteoetic loq'uic bael ta stael, bin nax yo'tanic ta yawtayel. Pero te Sansón tulan tal ta wentainel ta espíritu yu'un te Cajwaltique. Tuch' te lazoetic te chucajtic sc'ab a, jich nax c'ot yu'un te bit'il jlijc' sbuc'lel c'ajq'uem lino.

¹⁵ La stsac jun sbaquel yalan'e burro te ay tey a, te ma to bay bacubene, ja' la smil jmil (1,000) ta jtul filisteoetic a.

¹⁶ La yal ta patil: “Ta sbaquel yalan'e burro la jpas bayal ta jbus; ta sbaquel yalan'e burro jmil (1,000) ta jtul winiquetic la jmil a”, xi'.

¹⁷ La xch'oj bael te baque, jich yu'un Ramat-lehi sbiil c'ot yu'unic ta bay c'ot ta pasele.

¹⁸ Te bit'il mero bayal taquinaj yo'tan ta jyalel te Sansón, jich jajch' ta sc'oponel te Cajwaltique. Jich la yalbey: —¿Bit'il ay a te mero muc' la awac'bon caiy tsalawe, yo'tic ya xlajonix ta taquinti'il soc ta sc'ab te mach'atic ma'yuquic ta atojole? —xi'.

¹⁹ Jich yu'un Dios la sjambey ta bay lomol te lum te ay ta Lehi. Te Sansón la yuch' te ja' loc' tel tey a, jich la yich' xan yip. Te sloq'uibja' tey ay c'alal ora yo'tic ta Lehi, En-hacore sbiil c'ot.

²⁰ Te Sansón ay jtab ja'wil te ja' juez yu'unic te israeletic, ja' te c'alal ayic ta c'abal yu'un a te filisteoetique.