Jueces 14 - Bible in Tzeltal de Oxchuc y Tenejapa

Nujbin Sansón

¹ Ay jun c'aal co bael Sansón ta lum Timnat, tey la yil jtul filistea-ach'ix a.

² Te c'alal sujt' tel ta sna, la yalbey yaiy te sme'-state, jich la yal: —Wocoluc, ya jc'an te ya achajbanbon spisil te bit'il ya xnujbinon soc te jtul filistea-ach'ix te la quil ta Timnat —xi'.

³ Ja'uc me to, te sme'-stat la yalbey: —¿Bi yu'un te ya xba ale awinam ta bay filisteoetic te ma'yuquic ta stojol te Diose? ¿Yu'un bal ma'yuc ach'ixetic yu'un quermanotactic soc ta spisil te israeletique? —xi'. Te Sansón la sjac': —Yu'un ya jmulan te ach'ix, soc ja' ya sc'an co'tan te ya quinamin —xi'.

⁴ Te sme'-stat ma sna'ic stojol teme chajbanbil yu'un Cajwaltic te jich ya xc'ot ta pasele, melel yac ta sleel te Cajwaltic bit'il ya x'ac'bot guerra yu'un te filisteoetic, melel ja' yorail a te swentainejic te Israele.

⁵ Ja' yu'un te Sansón soc sme'-stat bajt'ic ta lum Timnat. C'alal c'ot Sansón ta bay ts'usubiletic yu'un te lume, ay león-choj yac ta aw, wil tel ta stojol.

⁶ Te espíritu yu'un Cajwaltic wentainot ta jyalel yu'un te Sansón, ta sc'ab nax la smil, la sjecbey yoc sc'ab te león-choje, jich bit'il te mach'a ya sjecbey yoc sc'ab ch'in tentsun. Ja'uc me to, ma la yalbey sme'-stat te bi c'ot ta pasel yu'une.

⁷ Bajt', c'ot ta aiyej soc te ach'ixe, mero la smulan ta lec.

⁸ C'alal c'axix c'aal bajt' xan, swenta yu'un ya xba nujbinuc soc te ach'ixe. C'alal ay bael ta be, och bael ta yilel te león-choj lajeme. Ta bay sbaq'uetal pujule, ayix chab la sta tey a.

⁹ La sjots' loq'uel ta sc'ab te chabe, yac ta slo'el bael. C'alal la sta te sme'-state, la yac'bey chab slo'ic; ja'uc me to, ma la yalbey yaiyic teme loq'uem tel yu'un ta sbaq'uetal te león-choj smiloje.

¹⁰ Te stat Sansón bajt' ta sna te ach'ixe ta banti la spas q'uin yu'un te nujbinel te Sansón, jich bit'il ya spasic te queremetique.

¹¹ Ja'uc me to, c'alal la yilic te filisteoetic te bi yilel te Sansone, la yiq'uic bael lajuneb xcha'winic (30) ta jtul sjo'tac te ya sjoin sba soque.

¹² Te lajuneb xcha'winic (30) ta jtul jich la yalbey ta stojolic te Sansón: —Ya calbeyex p'ijil c'op: Teme ya ana'beyic swentail, chican bi c'aalil ta sjuquebal bael yu'un te q'uine, ya me awac'bonic sujt'ib ta lec. Jich ya cac'beyex juju-jlijc' ac'u'ic pasbil ta lino, soc juju-jlijc' ajelc'u'ic yu'un q'uin.

¹³ Yan teme ma la awac'beyic te sujt'ibe, ja'ex me ya awac'bonic juju-jlijc' c'u'il, soc juju-jlijc' jelc'u' yu'un q'uin —la yut. La sjaq'uic: —Ala caiytic te bi ya awac' ta na'ele, ya me caiytic stojol ta jpisiltic —xiic.

¹⁴ Te Sansón la yalbey: —Te bi ya xti'awane, loc' we'elil tey a, te bi tulane, ay bi bujts'an xchi'il loc' tey a —xi'. Ta yoxebal c'aal ma'yuc bay staojbeyic sujt'ib te c'ope.

¹⁵ Ja' yu'un ta xchanebal c'aal ba yalbeyic te yinam Sansón: —Ac'a puersa ta sjojc'oyel te amamlal, te yacuc yalbotic ta atojol bi swentailuc te c'ope. Teme ma jichuc ya apase, ya me awich' chiq'uel soc te mach'atic ay yu'un te atate. ¿Ja' nax bal la awic'otic tel yu'un te ya apojbotic te bi ay cu'untique? —xiic.

¹⁶ Te ants ba sc'opon te Sansón, jich la yalbey ta oq'uel: —¡Te ja'ate ma ba c'ux ya awaiyon ta awo'tan! ¡Ja' nax ya awil-o'tantayon! Ay p'ijil c'op la awac'bey snopic te jlumale, pero te jo'one ma ba awalojbon caiy te bi swentailuque —xi'. Te Sansón la sjac': —Ni te jtat, ni te jme', ma ba calojbey swentail. ¿Ja'uc to bal ya calbat swentail te ja'ate? —la yut.

¹⁷ Ja'uc me to, oc' ta sts'eel jujun c'aal, c'axem to xan la swulilay. Jich yu'un, ta sjuquebal c'aal la yalbey swentail. Te ants ba yac'bey sna' stojol te slumale.

¹⁸ Ta sjuquebal c'aal te nopol ya xch'ayix bael ae, te filisteoetic ba yalbeyic te Sansón: —Ma'yuc yan bi bujts'an xchi'il te bit'il chab, ma'yuc bi yan tulan a te bit'il león-choj —xiic. Te Sansón la sjac': —Ja' nax yu'un la ajoc' lum soc te ch'in wacax cu'une, jich ju' awu'unic yaq'uel sujt'ib te c'ope —xi'.

¹⁹ Ta ora tulan tal ta wentainel ta espíritu yu'un Cajwaltic te Sansón. Jich bajt' ta Ascalón, la smil lajuneb xcha'winic (30) ta jtul winiquetic tey a. La sloq'uesbey bael sc'u'ic, ja' ba stoj a te trato spasoj soc te mach'atic la sna'ic sujt'esel swentail te c'ope. Ta patil, c'ajc'uben yo'tan sujt' bael ta sna te state.

²⁰ Pero te yiname ja' ac'bot yic' yinamin te testigo yu'un Sansón.