Jueces 13 - Bible in Tzeltal de Oxchuc y Tenejapa

Ayin Sansón

¹ Ja'uc me to, te israeletic la spasic xan te bi ma lecuc ta sit Cajwaltic, ja' swentail te la yac' ta sc'ab filisteoetic cha'winic (40) ja'wil.

² Ay jtul winic Manoa sbiil te nainem ta lum Zora te ay ta sq'uinal sts'umbal Dan. Te yinam ma'yuc alajem jtuluc, yu'un nix ma x'alaj a.

³ Te ants chicnaj ta stojol te ch'ul abat yu'un te Cajwaltique. Jich la yalbey: —Te ja'at ma'yuc ataoj awalatac; ja'uc me to, ya me x'alajat. Ay me ch'in querem awu'un ta patil.

⁴ Ma me x'awuch' vino soc yantic tulan uch'balil, ni ma me xawe' jtebuc bi ma lecuc sc'oplal.

⁵ Te ch'in alalquerem ya x'ayin awu'une ma me xju' ta loq'uesel stsotsil sjol. Melel te ch'in querem ya me x'u'uninot yu'un Dios, yu'un nix me stalel nazareo te c'alal ma to x'ayin a, swenta yu'un ja' me ya xjajch' ta yaq'uel ta libre te israeletic te bit'il ayic ta sc'ab te filisteoetique —xi'.

⁶ Te ants ba yalbey te smamlal: —Ay jtul winic yu'un Dios tal ta jtojol. Bayal la yac'bon xiwuc co'tan, ja' nix yilel te ch'ul abat yu'un te Cajwaltique. Ma la jojc'obey mach'a a, soc ma la yalbon.

⁷ Ja' nax ya jna' te bi la yalbone, te ya jta jch'in querem-al. Ta c'alal ora yo'tic ma ba ya cuch' vino ni yantic bitic tulan uch'balil, soc te ma ba ya jwe'elin te bila ma lecuc sc'oplale. Melel te alal, yu'un laj Dios ya xc'ot, stalel laj nazareo te c'alal ma to x'ayin a ja' to c'alal ya xlaj —xi'.

⁸ Ja' yu'un te Manoa la sc'opon te Cajwaltic, jich la yal: —Ya calbat wocol, Cajwal, te yacuc aticunbon xan tel ta jtojoltic te winic, swenta yu'un ya me yalbotic te bitic ya sc'an jpastic soc te alal ya x'ayine —xi'.

⁹ Te Manoa tsacbot sc'op yu'un te Diose. La yac' chicnajuc ta stojol te ants yan buelta te c'alal ay ta aquiltique. Te bit'il ma ba tey ay a te Manoa,

¹⁰ animal bajt' te antse, ba yalbey: —¡Aiya awaiy stojol, te winic la quil ta yan c'aale, chicnajix yan buelta ta jtojol! —xi'.

¹¹ Te Manoa jajch' ta beel, bajt' soc te banti ay te winique, jich c'o sjojc'obey: —¿Ja'at bal te ay bi la awalbey quinam ta yan c'aale? —la yut. Te winic la sjac': —Jo'on —xi'.

¹² Te Manoa la yalbey: —Te c'alal ya xc'ot ta pasel te bi la awalbotique, ¿bit'il ya sc'an jch'ijtestic te quereme? ¿Bila ya sc'an jpastic soc? —xi'.

¹³ Te ch'ul abat yu'un te Cajwaltic la sjac': —Te awiname, ac'a spas spisil te bitic calojbeyixe:

¹⁴ Ma me stuuntes te bila ya xloc' ta ts'usub, soc ma me xyuch' vino ni yantic uch'balil te tulanique, ni ma me swe' we'elil te ma lecuc sc'oplale. Ja' me ac'a spas te mandal calojbeye —xi'.

^15-16 Te Manoa ma ba sna'oj stojol teme ja' te ch'ul abat yu'un Cajwaltic, jich la yalbey: —Wocoluc a, joinawotic xan, ya jchajbanbat ati' ch'in tentsun —la yut. Ja'uc me to, te ch'ul abat la yal: —Manchuc me ya jcom jba, ma xju' ya jtuuntesbat te awe'ele; ja'uc me to, ya xju' ya achic'bey smajt'anin Cajwaltic te ch'in tentsune —xi'.

¹⁷ Jich yu'un te Manoa la yalbey te ch'ul abat: —Albotic caiytic te bi abiil, swenta yu'un jich me ya jna'ticat a te c'alal ya xc'ot ta pasel te bi awalojbotique —xi'.

¹⁸ Te ch'ul abat la yalbey: —¿Bistuc ya ac'an ana' te jbiile? Jchajp a soc ma'yuc ta na'el —xi'.

¹⁹ Te Manoa la stsac te ch'in tentsun soc majt'anil harina. La yac' ta sba te tone, jich la xchic'bey smajt'anin te Cajwaltique. Jich yu'un te Cajwaltic ay bi jchajp la spasbey ta sit te Manoa soc te yiname.

²⁰ C'alal til moel c'ajc' ta scajtijib majt'anil, te Manoa soc te yinam la yilic te ch'ul abat yu'un Cajwaltic, mo bael ta ch'ulchan ta yolil te c'ajc' xpulpon nax ta tilele. Jich la stinan sbaic coel c'alal ta lum.

²¹ Te Manoa jich la sna' te ja' ch'ul abat yu'un Cajwaltic te winique. Ma'yuquix bay la yac' xan sba ta ilel ta stojol, soc ni ja'uc te yiname.

²² Te Manoa jich la yalbey te yiname: —Ta mero melel ya xlajotic, melel la quiltic te Diose —xi'.

²³ Te ants la sjac': —Te yu'unuc ya smilotic te Cajwaltic, ma la stsacbotic te chic'bil majt'anil cu'untique. Ma'yuc bitic la yac'botic quiltic soc ma'yuc bi la yalbotic sc'oplal te jichuque —xi' te antse.

²⁴ La sta yorail alaj te antse, ayin squerem-al, Sansón sbiil c'ot yu'un. Te ch'in querem muc'ub, soc la yac'bey bendición te Cajwaltique.

²⁵ La sta sc'aalelal te jajch' ta at'el ta stojol Sansón te espíritu yu'un te Cajwaltique. Tey c'ot ta pasel ta scampamento te sts'umbal Dan, te olil ay yu'un te lumetic Zora soc Estaol.