Jueces 12 - Bible in Tzeltal de Oxchuc y Tenejapa

Jefté soc sts'umbal Efraín

¹ Te sts'umbal Efraín la stsob sbaic, c'axic tel ta muc'ja' Jordán ta stojol lum Zafón. Jich jul yalbeyic te Jefté: —¿Bi yu'un te ba awac'bey guerra te amonetic, te ma ba la awalbotic caiytic te tal jointicat bael te jichuque? Yo'tic ya jchic'tic te ana, tey me ya xc'ajc'at ta yutil —xiic.

² Te Jefté la sjac'bey te sc'opique: —Te jo'on soc te jwinictac ay jc'optic soc te amonetique. La quiq'uex te ja'exe, pero ma ba talex ta coltaywanej.

³ La quil te ma ba talex, jich la cac' jba ta woclajel soc jcuxlejal ta yac'beyel guerra te amonetique. Te Cajwaltic la yac'bon caiy tsalaw. ¿Bi yu'un te ya xtal awac'bonic guerra yo'tic te ja'exe? —xi'.

⁴ Jich yu'un te Jefté la stsob spisil te yajwal Galaad, la yac'bey sbaic guerra soc te efrainetic soc la yaiy tsalaw stuquelic. (Te efrainetic yalojbeyic sc'oplal te yajwal Galaad te ayic ta swenta ta neelal te Efraín soc te la yijq'uitayic jilele.)

⁵ Te yajwal Galaad ba scanantayic te tec'oja'etic ta muc'ja' Jordán swenta ma xcolic bael te efrainetique. C'alal ay efraín-winic te tal ta anel, te la sc'an permiso te ya xc'axe, la me sjojc'obeyic teme ay ta swenta Efraín. Teme la yal te ma ja'uc,

⁶ ja' prueba ya x'ac'bot yal te “Shibolet”. Teme la yal loq'uel ta ye te “Sibolet”, scaj te ma xju' yu'un yalel te bit'il ya sc'an alele, la yich'ic stsaquel ta ora, soc tey me la yich'ic milel a ta bay sts'eel te tec'oja'etic ta Jordán. Te efrainetic ay lajic cheb yoxwinic ta jmil (42,000) winiquetic.

⁷ Te Jefté ja' juez c'ot yu'un israeletic waqueb ja'wil. C'alal laj, la smuquic ta Galaad te slumal ta bay aine.

Ay yantic oxtul juecetic ta Israel

⁸ Ta patil, ja' juez c'ot yu'un israeletic te Ibzán te talem ta Belén.

⁹ Ay oxwinic (60) snich'nab, lajuneb xcha'winic (30) ta jtul queremetic soc lajuneb xcha'winic (30) ta jtul ach'ixetic. Q'uejel talemic te mach'atic la yac' nujbinuc soc ta spisilic. Te Ibzán ja' juez yu'un Israel juqueb ja'wil.

¹⁰ Te c'alal laj, la smuquic ta Belén.

¹¹ Ta patil, ja' och te Elón te sts'umbal Zabulón. Ja' juez c'ot yu'un israeletic lajuneb ja'wil.

¹² Te c'alal laj, la smuquic ta bay Ajalón ta sq'uinal nix te sts'umbal Zabulón.

¹³ Ta patil, ja' och te Abdón te snich'an Hilel, te talem ta lum Piratón. Ja' juez c'ot yu'un israeletic

¹⁴ waxaqueb ja'wil. Te Abdón nich'naj, ay cha'winic (40) ta jtul queremetic soc ay lajuneb xcha'winic (30) ta jtul smamatac. Te juju-jtul la scajtibinic burro.

¹⁵ Te c'alal laj, la smuquic ta bay Piratón te ay ta sq'uinal Efraín ta witstiquil yu'un Amalec.