Jueces 11 - Bible in Tzeltal de Oxchuc y Tenejapa

Jefté

¹ Te Jefté, te ay ta sq'uinal Galaad, ma xiw ta guerra. Yal jtul jmulawil ants, in te state Galaad sbiile.

² Te yinam Galaad ay yantic yalatac. Te c'alal muc'ubic, la stenic loq'uel ta sna te Jefté. La yalbeyic te ma'yuc ta swenta sna stat, ta scaj te yal te yan antse.

³ Jich yu'un te Jefté an loq'uel ta stojol te yermanotaque, ba ainuc ta bay q'uinal te Tob sbiile. Tey la stsob milawetic a te ya xloq'uic bael ta spasel bol at'elil soque.

⁴ C'ax bael c'aal, te amonetic la yac'beyic guerra te Israel.

⁵ Te mamaletic ta Galaad la sticunic ta iq'uel tel te Jefté ta q'uinal Tob.

⁶ Jich la yalbeyic: —La', yu'un ya jc'antic te ja'uc jtsobwanejat cu'untic ta guerra ta stojol te amonetique —la yutic.

⁷ Te Jefté la yal: —¿Yu'un bal ma la awil-o'tantayonic te ja'exe, asta la atenonic loq'uel ta sna te jtate? ¿Bistuc tal aleonic yu'un te awocolique? —xi'.

⁸ La sjaq'uic: —Ta smelelil ja' nax tal jleticat yu'un te jwocoltique. Ya jc'antic te ya xtal ajoinotic ta guerra ta stojol te amonetique. Ja'at me ya x'ochat ta jtsobwanej cu'untic ta jpisiltic te ayotic ta sq'uinal Galaad —xiic ta yalel.

⁹ La yal te Jefté: —Jich yu'un teme ya ac'anic te ya sujt'on bael ta guerra ta stojol te amonetic, teme la yac'bon caiy tsalaw te Cajwaltique, jo'on me jmandalteswanejon awu'unic ya xc'oon —xi'.

¹⁰ Te mamaletic la yalbeyic xan ta melel: —Te Cajwaltic ja' me testigo cu'untic te ya jpastic ta spisil te bi ya awalbotique —xiic.

¹¹ Jich yu'un te Jefté bajt' soc. Te lume la yaq'uic ta jtsobwanej te ya spas mandal ta stojolic. Ta Mizpa la yal xan ta stojol Cajwaltic, te bi la yal ta neelal te Jefté.

¹² Ta patil la sticun bael c'op ta stojol te ajwalil yu'un te amonetic ta sjojc'oyel te sc'ope: “¿Bi swentailuc ta awo'tan te ya xtal awac'botic guerra soc te jlumale?” xi' bael sc'op.

¹³ Te ajwalil yu'un amonetic la sujt'esbey tel sc'op te Jefté: “Te ja'ex te israelex te c'alal loq'uex tel ta Egipto, la apojbotic jq'uinaltic, c'alal ta muc'ja' Arnón, c'alal ta muc'ul ja'etic Jaboc soc Jordán. Ora yo'tic sujt'esbon ta puro lequilal”, xi'.

¹⁴ Te Jefté la sticun xan bael c'op ta stojol te muc' ajwalil yu'un te amonetique.

¹⁵ Jich la yal bael te sc'ope: “Ya calbat, te jo'otic te israelotic ma'yuc mach'a jpojojbeytic sq'uinal, ni moabetic soc ni amonetic.

¹⁶ C'alal loc'otic tel ta Egipto, c'axotic tel ta jochol taquin q'uinal c'alal ta Mar Rojo, julotic ta Cades.

¹⁷ Jich la jticunbeytic c'op te muc' ajwalil yu'un Edom, la jc'anbeytic te yacuc yac'otic c'axel ta sq'uinalic. Ja'uc me to, ma la yac'otic c'axel. Ja' nix jich la jc'anbeytic te muc' ajwalil yu'un Moab, ni ma la yac'otic c'axel. Ja' swentail te tey jilotic ta Cades.

¹⁸ Jich beenotic ta jochol taquin q'uinal, ja' la joyintaybeytic sq'uinal te Edom, soc te Moab, ja' to c'alal c'ootic ta stojol sloq'uib c'aal yu'un Moab. Tey la jpas jcampamentotic ta jejch' ja' Arnón. Ma ba ochotic bael ta sq'uinal Moab, melel tey jajch'em a.

¹⁹ La jticunbeytic c'op te Sehón te muc' ajwalil amorreo ta lum Hesbón, la jc'anbeytic te yacuc yac'otic c'axel ta sq'uinal, swenta yu'un toj ya xbootic ta jq'uinaltic.

²⁰ Te Sehón amen yo'tan, ma la yac'otic c'axel ta sq'uinal. Ja' nax jajch' ta stsobel spisil te soldadoetic yu'une, ba spas scampamentoic ta Jahaza, la yac'botic guerra.

²¹ Ja'uc me to, te Cajwaltic te Dios cu'untic te Israelotic te lumotic yu'une, la yac'botic jtsaltic te Sehón soc te soldadoetic yu'une.

²² Jich la quich'beytic spisil sq'uinal te amorreoetic ja' to ta muc'ja' Arnón, c'alal ta muc'ja' Jaboc, soc c'alal ta jochol taquin q'uinal, c'alal ta muc'ja' Jordán.

²³ ¿Yu'un bal ya ac'an apojbotiquix yo'tic te sq'uinal amorreoetic, te la yich' pojel yu'un Cajwaltic, te la yac'botic te jo'otique?

²⁴ Teme ja' te dios awu'unic, te Quemós sbiil, ya yac'beyex jtebuc q'uinal te ya awu'uninique, ja' awu'unic nix ya xc'ot a, ¿me jichuc? Jich te jo'otique, cu'untic nix c'ot a te bi la yac'botic te Cajwaltique.

²⁵ ¿C'ax jich bal ya acuy aba te bit'il Balac, te snich'an Zipor, te muc' ajwalil yu'un Moab? Ma ba tal yac'botic guerra stuquel.

²⁶ Ayix jo'lajunwinic (300) ja'wil te ainemotic ta Hesbón, ta Aroer soc ta ch'in lumetic te nopol ayic soque, soc ta spisil te lumetic ta sti'il te muc'ja' Arnón. ¿Bi yu'un ma ba c'opojex tel yu'un te q'uinal te xc'axel tel c'aale?

²⁷ Ma'yuc bi amen jpasojtic ta atojol. Ja'at me atuquel te ma lecuc bila ya xtal apasbotic ta jtojoltic, te ya xtal awac'botic guerra. Ja'uc me to, te Cajwaltic ja' me juez stuquel, ya me yilbey yat'el te israeletic, soc nix te amonetique”, xi'.

²⁸ Manchuc me jich la yal bael te Jefté, te muc' ajwalil yu'un te amonetic ma ba la yich'bey ta muc'.

Te bi la xchap Jefté

²⁹ Te espíritu yu'un te Cajwaltic tal ta stojol te Jefté. Jich been ta sq'uinal Galaad soc ta sq'uinal Manasés, c'ax ta lum Mizpa te ay ta sq'uinal Galaad, yu'un ya yochintay te sq'uinal amonetique.

³⁰ Te Jefté la xchap ta stojol Cajwaltic: —Teme ya awac'bon caiy tsalaw ta stojol te amonetique,

³¹ ya cac'bat achic'bil majt'anin te mach'a neel ya xloc' tel ta jna stabelon ochel te c'alal ya sujt'on tel ta guerra —xi'.

³² Te Jefté la yochintabey sq'uinal te amonetic, soc la sjach guerra. Te Cajwaltic la yac'bey yaiy tsalaw.

³³ Te Jefté bayal la smil te scontroe. La yich'bey jtab ta jpam lumetic, c'alal ta Aroer, Minit soc ta Abel-keramim. Jich a ju' yu'unic te israeletic, jich ochic ta c'abal te amonetique.

³⁴ C'alal sujt' bael ta sna te Jefté ta Mizpa, te yantsil-nich'an, te mero jip jtul a, loc' tel ta tael ochel yu'un ta sna, yac ta ajc'ot loq'uel tel ta stijel pandereta. Ma'yuc xan yan snich'nab a.

³⁵ Jich yu'un te c'alal la yile, la xch'i' sc'u' yu'un mel-o'tan, jich la yal: —¡Ay, cantsil-nich'an, mero ya x'oc' co'tan awu'un! Ja'at ta awenta te bayalix ayon ta mel-o'tan awu'un. Yu'un ay bi la jchap ta stojol Cajwaltic, jich yu'un ya me xc'ot ta pasel cu'un yo'tic —la yut.

³⁶ Te ach'ix la sjac': —Tat cu'un, pasa ta jtojol te bila achapoj ta stojol te Cajwaltic, melel c'otix ta pasel yu'un te bit'il la yac'bat atsal te acontroe, ja' te amonetique.

³⁷ Ja'uc me to, ya calbat wocol te yacuc awac'bon xan cheb u, te ya join xan ta beel ta witstiquil te jo'tac ta ach'ixile, melel ma ba nujbinemon a te ya xlajon baele —xi'.

³⁸ Te Jefté la yac'bey te cheb u. Jich been, la sjoin xan ta beel ta witstiquil te sjo'tac ta ach'ixil. Yac ta oq'uel, melel ma ba nujbinem a te ya xlaj baele.

³⁹ C'alal ts'aquej te c'aal yu'une, jich a sujt' bael ta stojol te state. Te state la sc'otes ta pasel te bila xchapoj ta stojol te Cajwaltique. Te yantsil-nich'an Jefté ma'yuc bay la sjoin ta wayel winic te c'alal laj baele.

⁴⁰ Jich yu'un te israeletic spisil ja'wil ya xbajt'ic te ach'ixetic ta yoc'tayel te yantsil-nich'an Jefté, chaneb c'aal te jujun ja'wile.