Jueces 10 - Bible in Tzeltal de Oxchuc y Tenejapa

Yat'el ta juez Tola soc Jair

¹ C'alal ma'yuquix ta q'uinal te Abimelec, ay jtul winic ta sts'umbal Isacar, Tola sbiil, snich'an Fúa, ja' smam te Dodo, ja' jajch' ta scoltayel te Israele. Te Tola nainem ta lum Samir ta witstiquil yu'un Efraín.

² At'ej ta juez ta stojol Israel oxeb xcha'winic (23) ja'wil. C'alal laj, la smuquic ta Samir.

³ Ta patil jajch' te Jair te ay ta Galaad, at'ej ta juez ta Israel cheb xcha'winic (22) ja'wil.

⁴ Ay lajuneb xcha'winic (30) ta jtul snich'nab te Jair, juju-jtul snich'nab ya xmoic ta burro, juju-jtul ay jpam lum yu'un ta bay sq'uinal Galaad. Te lajuneb xcha'winic (30) ta jpam lum, ya to x'ac'bot sbiilic: “Lumetic yu'un Jair”, xi' sc'oplal.

⁵ C'alal laj Jair, la yich' muquel yu'unic ta Camón.

Amonetic la yuts'inic Israel

⁶ Ja'uc me to, te israeletic la xcha'pasic te bila ma lecuc ta sit Cajwaltic, la xch'uunic loc'ombaetic yu'un Baal soc yu'un Astarté, soc diosetic yu'un Siria, diosetic yu'un Sidón, diosetic yu'un Moab, diosetic yu'un Amón, soc diosetic yu'un te filisteoetique. Ja' la yijq'uitay ta yo'tanic te Cajwaltic, ma'yuc bay ya squejan sbaiquix ta stojol.

⁷ Ja' swentail te ilin Cajwaltic ta stojolic, jich la yac'bey ta sc'abic te filisteoetic soc te amonetique.

⁸ Ja' yorail te jajch' te swocolique. Waxaclajuneb ja'wil te filisteoetic soc te amonetic buen tulan uts'inel la yac'beyic ta spisilic te israeletic te nainemic ta Galaad ta jejch' ja' Jordán, ta sq'uinal amorreoetic.

⁹ Te amonetic c'axic tel ta Jordán, ja' ba yac'beyic guerra te sts'umbal Judá, te sts'umbal Benjamín soc te sts'umbal Efraín. Ay bayal swocolic te israeletic yu'un te amonetique.

¹⁰ Jich la sc'anbeyic coltayel te Cajwaltic, jich la yalbeyic: —Cajwaltic Dios cu'untic, jtaoj jmultic ta atojol, melel la quijq'uitayat ta co'tantic, ja' bajt' ta co'tantic xch'uunel te lotil diosetique —xiic.

¹¹ Te Cajwaltic la sjac': —Te ja'ex la awich'ic uts'inel yu'un te egipcioetic, amorreoetic, amonetic, filisteoetic,

¹² sidonetic, amalequetic soc te madianetique. Te c'alal la awalbonic wocol te ja'exe, jich la jcoltayex.

¹³ Tojol te jich la jcoltayexe, melel la awijq'uitayon ta awo'tanic ta scaj xch'uunel yantic diosetic, jich yu'un ma ba ya jcoltayexix.

¹⁴ Baan c'anbeyaic coltayel te diosetic te atsaojiquix ta ch'uunele, ja' ac'a scoltayex teme ay awocolic ya awaiyique —xi' te Diose.

¹⁵ Jich yu'un te israeletic la sjac'beyic sc'op te Cajwaltic: —Jtaoj jmultic ta atojol. Pasbotic me ta jtojoltic te bitic lec ya sc'an awo'tan atuquele. Mero wocoluc ta jyalel, coltayawotic yo'tic —xiic.

¹⁶ Jich te israeletic la yijq'uitayic te diosetic yu'un jyanlumetic te xch'uunejique, swenta yu'un ja' ya xch'uunic xan te Cajwaltique. Te Cajwaltic ma la sc'anix te ya xc'ax xan swocol te israeletique.

¹⁷ Te amonetic la stsob sbaic, soc la yac' scampamentoic ta sq'uinal Galaad. Ja' nix jich te israeletic la stsob sbaic, soc la yac' scampamentoic ta Mizpa.

¹⁸ Te israeletic te nainemic ta Galaad soc te jtsobwanejetic yu'unic la xchapic te ja' jtsobwanej ya xc'ot yu'un spisil te yajwal Galaad te mach'a ya xjajch' yac'beyel guerra ta stojol te amonetique.