Jueces 1 - Bible in Tzeltal de Oxchuc y Tenejapa

Judá soc Simeón la stsaquic Adonisedec

¹ C'alal lajix a te Josué, te israeletic la sjojc'obeyic te Cajwaltic mach'a sts'umbal te neel ya xba yac'bey guerra te cananeoetique.

² Te Cajwaltic la yal te ja' neel ya xbajt' te sts'umbal Judá, ja' ya x'ac'bot ta sc'ab yu'un Cajwaltic te q'uinale.

³ Ja' yu'un te sts'umbal Judá la yic' te yermanotac, ja' te sts'umbal Simeón, swenta yu'un jun me ya yac' sbaic ta spojel te q'uinal te ya xc'ot ta swenta Judá, soc ta patil ya xba spojic te q'uinal te ya xc'ot ta swenta Simeón. Te sts'umbal Simeón soc te sts'umbal Judá la xch'uunbey sbaic te sc'opique.

^4-5 Jich yu'un te sts'umbal Judá la spojbey sq'uinal te cananeoetic soc te sq'uinal ferezeoetic, ja' te mach'atic ac'botic ta sc'abic yu'un te Cajwaltique. Ta lum Bezec la stsalic lajunmil (10,000) ta jtul, ta yolilic ay te Adoni-bezec.

⁶ Manchuc me an bael te Adoni-bezec, la snutsic bael, la stsaquic, la set'beyic loq'uel xchebal te sme' sc'ab soc xchebal te sme' yacane.

⁷ Te Adoni-bezec jich la yal: —Jo'on neel la jset'bey loq'uel lajuneb xchanwinic (70) ta jtul sme' sc'abic soc sme' yacanic te ajwaliletique. Ja' la stamic sobrail we'elil ta yet'al jmesa. Ora yo'tic sujt'ix ta jwenta yu'un Dios te bi la jpasbeye —xi'. La yiq'uic bael ta Jerusalén, tey laj a.

Sts'umbal Judá la yich' Hebrón soc Jerusalén

⁸ Te sts'umbal Judá la yochintayic Jerusalén, la yich'ic. C'alal laj yo'tanic ta smilel ta puñal spisil, ora la xchiq'uic te lume.

⁹ Ja' nix jich ba yac'beyic guerra te cananeoetic te nainemic ta witstiquil, ta Neguev soc ta coel q'uinal bael.

¹⁰ Ba stsalic te cananeoetic ta lum Hebrón, te Quiriat-arba sbiil ta neelale, soc la stsalic Sesai, Ahimán soc Talmai.

Otoniel la yich' Debir, soc ac'bot yinamin Acsa

¹¹ La yac'beyic guerra te lum Debir, te Quiriat-sefer sbiil ta neelale.

¹² Te Caleb la yal ta jamal: —Te mach'a ya stsal Debir, ya cac'bey yinamin te cantsil-nich'an Acsa —xi'.

¹³ Te mach'a la yaiy tsalaw, ja' te Otoniel te snich'an Cenaz, te yijts'in Caleb. Jich yu'un te Caleb la yac'bey yinamin te yantsil-nich'an Acsa.

¹⁴ Ja'uc me to, te c'alal c'ot ta stojol te Otoniel, la yalbey te yacuc sc'anbey jsejpuc sq'uinal te state. C'alal la yil Caleb te co ta sburro te Acsa, jich la sjojc'obey yaiy: —¿Bi la apas? —xi'.

¹⁵ La yal te Acsa: —Yu'un ay bi ya jc'anbat jtebuc. Te bit'il la awac'bonix te q'uinal ta Néguev, ac'bon soc sloq'uibja'etic —xi'. Jich yu'un te Caleb la yac'bey te sloq'uibja'etic ta cajal soc ta alan.

Te bi la yich'ic Judá soc Benjamín

¹⁶ Te sts'umbal Hobab te quenita-winic, te snialmamal Moisés, loq'uic bael ta lum Palmaetic, sjoinej bael te sts'umbal Judá. Bajt'ic ta bay te jochol taquin q'uinal yu'un Judá te ay ta stojol sur yu'un lum Arad. La sjoin sbaic ta nainel soc te yajwal q'uinal tey a.

¹⁷ Te sts'umbal Judá bajt' soc te sts'umbal Simeón, jich te bit'il chapal yu'unic, ba stsalic te cananeoetic te nainemic ta Sefat. La sjinic ta jc'axel te lume, ja' swentail te Horma la yac'beyic sbiiline.

¹⁸ Ja'uc me to, ma ju' yu'unic te la yich'ic te lum Gaza, te lum Ascalón, soc te lum Ecrón, ni te sq'uinalic te nopol ayic soque.

¹⁹ Te Judá joinbilic yu'un te Cajwaltic, jich ju' yu'unic yich'el te witstiquile. Ja'uc me to, ta spamlej ma ba ju' yu'unic stsalel te mach'atic nainemic tey a, melel yich'oj pasel soc taq'uin te carretaetic yu'unique.

²⁰ Te Caleb ja' c'ot ta swenta te Hebrón, jich bit'il yalojbey sc'oplal Moisés. Te Caleb la sloq'ues bael yoxebal sts'umbal Anac.

²¹ Yan te sts'umbal Benjamín ma ju' yu'un sloq'uesel te jebuseoetic te nainemic ta Jerusalén. Ja' yu'un ta ora to, te jebuseoetic pajal nainemic ta Jerusalén soc te sts'umbal Benjamín.

Sts'umbal José la yich'ic Betel

^22-23 Te sts'umbal José la snopic te ya xba yac'beyic guerra te lum Betel, ja' te Luz sbiil ta neelale. Neel la sticunic bael ta ilel. Coltayotic yu'un te Cajwaltique.

²⁴ Te j'ilwanejetic la yilic jtul winic yac ta loq'uel tel ta ti'lum, jich la yalbeyic: —Teme ya awac'botic quiltic banti ya x'ochotic, ja' yu'un te jo'otic bayal ya jc'uxtayticat —la yutic.

²⁵ Te winic la yac' ta ilel banti ya x'ochic. Jich och smilic ta puñal ta spisilic te mach'atic ainemic tey a; ja' nax ma la yaq'uic ta lajel te mach'a la yac' ta ilel te sbelal ochel, soc spisil mach'atic ay yu'un.

²⁶ Ta patil te winic bajt' ta sq'uinal hititaetic, la spas yach'il lum tey a, Luz sbiil c'ot yu'un. Jich sbiilinej ta ora yo'tic.

Ma jc'axeluc ju' yu'un te sts'umbalic Manasés soc Efraín

²⁷ Te sts'umbal Manasés, ma ju' yu'un te la sloq'ues bael yajwal te lumetic Bet-seán, Taanac, Dor, Ibleam soc Meguido, ni ja'uc ju' yu'un sloq'uesel bael te mach'atic ainemic ta ch'in lumetic te nopol ayic soque. Ja' yu'un te cananeoetic ainic xan tey a.

²⁸ Te c'alal la yich' yip te israeletic, ju' yu'unic te la yac'beyic spas buen tulan at'el te cananeoetic, pero ma ju' yu'un sloq'uesel bael.

²⁹ Te sts'umbal Efraín, ja' nix jich ma ju' yu'un sloq'uesel ta Gezer te cananeoetic te ainemic tey a, jich ainic jilel ta yolilic.

Bi la yich'ic te yantic sts'umbal Israel

³⁰ Te sts'umbal Zabulón, ja' nix jich ma ju' yu'unic sloq'uesel te cananeoetic te ainemic ta lum Quitrón soc Naabal. Jich jun yo'tan ainic ta yolilic; ja'uc me to, puersa la yac'beyic spas tulan at'el.

^31-32 Te sts'umbal Aser, ja' nix jich ma ju' yu'unic sloq'uesel te cananeoetic ta lumetic Aco, Sidón, Ahlab, Aczib, Helba, Afec soc Rehob. Te bit'il ma ju' yu'unique, ja' nix jich ainic jilel tey a.

³³ Te sts'umbal Neftalí, ja' nix jich ma ju' yu'unic sloq'uesel te cananeoetic ta lum Bet-semes soc ta lum Bet-anat. Ja'uc me to, la yac'beyic spas tulan at'el, jich a ainic jilel ta yolilic.

³⁴ Te amorreoetic la stenic bael te sts'umbal Dan c'alal ta witstiquil, ma la yaq'uic coel ta spamlej.

³⁵ Jich yu'un te amorreoetic tey nix ainic ta lumetic Heres, Ajalón soc Saalbim. Pero te c'alal la yich' yip ta lec te sts'umbal te José, jich la yac'beyic spas tulan at'el te amorreoetique.

³⁶ Te sti'il sq'uinal te edometic bajt' ta moel q'uinal yu'un Acrabim, c'alal ta lum Sela, soc bajt' xan ta cajal.