San Juan 9 - Bible in Tzeltal de Oxchuc y Tenejapa

Te Jesús la sjambey sit te mach'a ma'sit ta yainabe

¹ Te c'alal yac ta c'axel bael te Jesuse, la yil jtul winic te ma'sit ta yainab toe.

² Te jnopojeletic yu'une la sjojc'oyic: —Maestro, ¿mach'a smul te ma'sit ayin in winic to? ¿Scaj bal smul sme'-stat, o scaj bal smul stuquel? —xiic.

³ La yal te Jesuse: —Ma scajuc smul, soc ma scajuc smul sme'-stat. Yu'un nax ya x'ac'ot ta ilel yat'el Dios ta swenta.

⁴ Te bit'il ayotic to ta c'aleltique, puersa me ya jpasbey yat'el te mach'a la sticunon tele. Yu'un ya xtal te ajc'ubale, c'alal ma'yuquix mach'a ya xju' ya x'at'ej.

⁵ Te bit'il ayon to ta balumilale, sacuben q'uinal cu'un ta stojolic te mach'atic ayic ta balumilale —xi'.

⁶ Lajel to yo'tan ta yalel a, la stubtay te lume. La spas ta ajch'al te ya'lel sti'e. La sbalanbey ta sit te ma'site.

⁷ Jich la yalbey: —Baan, poca asit ta bay estanqueil ja' te Siloé sbiile —la yut. (Te Siloé, “ticunbil”, xi' c'oem.) Te ma'site ba spoc te site. Te c'alal sujt' baele, ya yilix te q'uinale.

⁸ Te mach'atic nopol ay soque soc te mach'atic yilojic te bit'il ma'sit ta neelale, jich la yalic: —¿Ma bal ja'uc in to te ya snajc'an sba ta c'anbajele? —xiic.

⁹ Ay la yalic: —Ja' na'ax —xiic. Soc ay la yalic: —Ma ja'uc. Ja' nax te col pajaluc soc yilele —xiic. Te winique la yal sba stuquel: —Te bit'il ya awalique jo'on nix —xi'.

¹⁰ Jich yu'un la sjojc'obeyic: —¿Bit'il jam te asite? —xiic.

¹¹ La yal te winique: —Jtul winic te Jesús sbiile, la spas ajch'al. La sbalanbon ta jsit, soc la yalbon: “Baan ta bay estanqueil ja' te Siloé sbiile. Baan, poca asit”, la yuton. Jich boon. C'alal la jpoc te jsite, jich la quil te q'uinale —xi'.

¹² Jich la sjojc'obeyic xan: —¿Banti ay te winic ya awale? —xiic. La yal te winique: —Ma jna' te banti aye —xi'.

Te fariseoetic la sjojc'obeyic bit'il jam te site

¹³ Jich la yiq'uic bael ta stojol fariseoetic te winic te jambot site.

¹⁴ Ja'uc me to, ja' sc'aalelal cux-o'tan a, te la spas ajch'al te Jesuse soc te la sjambey sit te ma'site.

¹⁵ Jich yu'un te fariseoetique la sjojc'obeyic uuc te bit'il la yilix te q'uinale. La yal te winique: —La sbalanbon ajch'al ta jsit. La jpoc. Jich jam te jsite —xi'.

¹⁶ Ay cha'oxtul te fariseoetic la yalique: —Ma ba talem ta stojol Dios me to, melel ma scanantay te bi c'aalil swenta cux-o'tan —xiic. Soc ay la yalic: —¿Ya bal c'an ju'uc yu'un spasel jtul jmulawil in señailetic to? —xiic. Jich ma junuc yo'tan sbaic yu'un.

¹⁷ Jich la sjojc'obeyic xan te winique: —Ja'xan te ja'ate ¿bi xaat yu'un te winic te la sjambat asite? —xiic. La yal te winique: —Ya cal te jo'one j'alwanej yu'un Dios —xi'.

¹⁸ Te judioetique ma xch'uun yo'tanic teme yu'un nanix ma'sit ta neelal te winic te bit'il ya yilix q'uinale. Jich la sticunic ta iq'uel te sme'-state.

¹⁹ La sjojc'obeyic: —¿Ja' bal anich'an in to te ma'sit ta ac'opic te c'alal ayine? ¿Bit'il a te ya yilix q'uinale? —xiic.

²⁰ La yal te sme'-state: —Ja'. Jna'ojtic te ja' cal-jnich'antic in to te ma'sit c'alal ayine.

²¹ Ja'uc me to, ma jna'tic te bit'il ay te ya yilix q'uinale. Soc ma jna'tic xaal te mach'a jambot sit yu'une. Jojc'obeya awaiyic stuquel, melel muc'ul winiquix. Ac'a yalbat stuquel —xiic.

²² Jich la yal te sme'-state scaj te la xi'ic te judioetique. Melel chajbanbilix yu'unic te ya yich' loq'uesel ta sinagoga chican mach'a a te ya yal te ja' Cristo te Jesuse.

²³ Ja' swentail te la yalic te sme'-state: “Jojc'obeya awaiyic stuquel melel muc'ul winiquix”, te xie.

²⁴ Jich yu'un te judioetique la xcha'yiq'uic xan tel te winic te ma'sit ta neelale. Jich la yalbeyic: —Albotic ta jamal ta stojol Dios te mach'a la sjambat te asite, yu'un jna'ojtic stojol jo'otic te jmulawil te winic ya awale —xiic.

²⁵ La yal te winique: —Te jo'one ma jna' teme jmulawile, o ma jmulawiluque. Ja' nax ya jna' te ma'siton ta neelale, ja'uc me to, ya quilix q'uinal ta ora to —xi'.

²⁶ La xcha'jojc'obeyic xan: —¿Bi la yut la sjambat te asite? —xiic.

²⁷ Te winique la yal: —La calbeyexix awaiyic. Ma x'ac'an awaiyic stojol te bi ya cale. ¿Bistuc awu'unic te ya calbeyex xane? ¿Yu'un bal ya ac'anic te ya x'ochex ta jnopojel yu'un? —xi'.

²⁸ Jich caj yutic te winique, jich la yalbeyic: —Te ja'ate yaj-nopojelatix atuquel. Yan te jo'otique jnopojelotic yu'un Moisés.

²⁹ Jna'ojtic stojol jo'otic te c'oponot yu'un Dios te Moisese. Yan te mach'a ya awale, ni ya jna'tic stojol xujt'uc te banti taleme —xiic.

³⁰ La yal te winique: —Jchajp nax ya caiy a te ma x'ana'ic stojol ja'ex te bay taleme, melel la sjambonix te jsite.

³¹ Jna'ojtic stojol ta jpisiltic te Dios ma xyaiybey stojol sc'op te jmulawiletique. Ja' nax ya yaiybey stojol sc'op te mach'atic jun yo'tanic ta stojole soc te ya spas te bila ya sc'an yo'tane.

³² Ta namey q'uinal tel ma'yuc bay chicnaj ta alel sc'oplal jtuluc te ya xjam sit te mach'a ma'sit ya x'ayine.

³³ Te manchuc talemuc ta stojol Dios te winique xujt' ma'yuc bi ya xju' yu'un spasel te jichuque —xi'.

³⁴ La yalbeyic: —Mero jmulawilat ja' to c'alal ayinate. ¿Ja' bal c'an ap'ijubtesotic? —la yutic. Jich la sloq'uesic ta sinagoga.

Ma'sit ta stojol Dios

³⁵ La yaiy stojol Jesús te la sloq'uesiquix te mach'a ma'sit ta neelale. La sta sba soc te winique. Jich la yalbey: —¿Ya bal ach'uun te Snich'an Diose? —xi'.

³⁶ La yal te winique: —Cajwal, albon caiy te mach'a a. Ya me jch'uun —xi'.

³⁷ Jesús la yalbey: —Awilojix. Jo'on abi te yacotic ta aiyej —xi'.

³⁸ La yal te winique: —Ya jch'uunat, Cajwal —xi', soc la squejan sba ta stojol.

³⁹ La yal te Jesuse: —Talemonix li' ta balumilal to swenta yu'un ya xchicnaj te mach'a leque soc te mach'a amene. Jich yu'un te mach'atic ma xyilic q'uinale, ya me xjam sitic. Yan te mach'atic ya yilic q'uinal ta sc'opique, ya me xc'atp'ujic ta ma'sit —xi'.

⁴⁰ La yaiyic stojol cha'oxtul te fariseoetic te sjoinejic tey a. Jich la yalbeyic: —¿Yu'un bal ma'sitotic te jo'otique? —xiic.

⁴¹ Jesús la yalbey yaiyic: —Te yu'unuc ma'situquexe, ma'yuc amulic te jichuque. Ja'uc me to, ya awalic te jamal asitique, ja' ma xch'ay amulic yu'un —xi' te Jesuse.