San Juan 3 - Bible in Tzeltal de Oxchuc y Tenejapa

Nicodemo tal sc'opon te Jesuse

¹ Ay jtul fariseo Nicodemo sbiil, ja' principal yu'un te judioetique.

² Tal sc'opon ta ajc'ubal te Jesuse. Jich jajch' yalbey: —Maestro, jna'oj stojol te bit'il ticunbilat tel ta p'ijubteswanej yu'un te Diose, melel ma'yuc mach'a ya xju' yu'un spasel te jchajp at'eliletic te yacat ta spasel te manchuc sjoinejucat te Diose —xi'.

³ Te Jesús jich la yalbey: —Jamal ya calbat, ja' te mach'a ma xcha'ayin xan, ma xju' ya yil te bit'il ay ta ajwalinel te Diose —xi'.

⁴ La sjojc'o te Nicodemoe: —¿Bit'il c'an cha'ayinuc xan te winic te mamalixe? ¿Ya to bal xju' ya x'och ta xch'ujt' sme' te ya xcha'ayin xane? —xi'.

⁵ Te Jesús jich la yal: —Jamal ya calbat, ja' te mach'a ma x'ayin ta swenta ja' soc ta swenta Espíritu, ma xju' ya x'och tey a ta banti ay ta ajwalinel te Diose.

⁶ Te mach'a ayinem nax ta swenta baq'uet, ch'ich'-baq'uet nanix abi. Yan te mach'a ayinem ta swenta te Espíritu, yich'ojbey stalel te Espiritue.

⁷ Ma me q'uejeluc nax q'uinal ya awaiy yu'un, te la calbat te ya sc'an ya xcha'ayinate.

⁸ Te iq'ue bayuc nax ya xbeen. Ya awaiy stojol te xaxaxet ya xbeene, ja'uc me to, ma x'ana' te banti ya xtale, soc ma x'ana' te banti ya xbajt'e. Jich c'oem spisilic te mach'atic ayinemic ta swenta te Espiritue —xi'.

⁹ Te Nicodemo la xcha'jojc'obey xan: —¿Bit'il ya xc'ot ta pasel in to? —xi'.

¹⁰ La yal te Jesuse: —Te ja'ate maestroat yu'un te lum Israel, ja'uc me to, ¿ma x'ana' stojol te bila ya calbate?

¹¹ Jamal ya calbat, ja' ya caltic te bila jna'ojtique, soc te bila quilojtique; ja'uc me to, ma xc'ot ta awo'tan te bila ya caltique.

¹² Teme ma xach'uun te bila swenta nax balumilal te la calbate, ¿ja'uc to bal c'an ach'uun teme ya calbat te bila swenta te ch'ulchane?

¹³ “Ma'yuc mach'a moem bael ta ch'ulchan. Ja' nax stuquel te mach'a coem tel ta ch'ulchane, ja' te Nich'anil te talem ta ch'ulchane.

¹⁴ Soc jich te bit'il la sjijp'an jti'awal chan ta bay jochol taquin q'uinal te Moisese, ja' nanix jich ya yich' jijp'anel uuc te Nich'anile,

¹⁵ swenta yu'un spisil te mach'a ya xch'uune, ma xch'ay. Ya xcuxin sbajt'el q'uinal —xi' te Jesuse.

Te xc'uxul yo'tan Dios

¹⁶ Melel te Diose bayal c'ux la yaiy ta yo'tan spisil te ants-winiquetique. Jich yu'un la yac'bey te jip jtul Snich'ane, swenta yu'un spisil te mach'a ya xch'uune, ma xch'ay, jich me ya sta xcuxlejal sbajt'el q'uinal.

¹⁷ Ma ja'uc la sticun tel Snich'an ta balumilal yu'un te ya yac' ta lajel yu'un smulic te ants-winiquetique. Ja' la sticun tel yu'un te ya scoltaye.

¹⁸ Te mach'a ya xch'uun te Snich'an Diose, ma x'ac'ot ta lajel yu'un te smulique. Yan te mach'a ma xch'uune, chapalix te ya x'ac'ot ta lajele, scaj te ma xch'uun te jip jtul Snich'an te Diose.

¹⁹ Ja' smulic c'ot te c'alal tal ta balumilal te saquil q'uinale, te ants-winiquetic ma la smulanic. Ja' toyol yo'tanic yu'un te ijc' q'uinale scaj te bit'il amen te yat'elique.

²⁰ Melel spisil te mach'a ya spas te bila amene, ya sp'aj te saquil q'uinale. Melel ma xtalic ta bay te saquil q'uinale, yu'un ma sc'anic te ya xchicnaj ta ilel te bila amen yacalic ta spasele.

²¹ Yan te mach'atic ya spas te bila smelelile, ya xtalic ta bay te saquil q'uinale. Jich ya xchicnaj ta ilel te bit'il ja' ta swenta Dios spisil te yat'elic yacalic ta spasele.

Te Juan J'ac'-ich'ja'e la yalbey xan sc'oplal te Jesuse

²² Ta patil te Jesús bajt' ta sq'uinal Judea soc te jnopojeletic yu'une. Tey la sjoin sbaic ta yaq'uel ich'ja' a.

²³ In te Juane yac ta yaq'uel ich'ja' uuc ta bay Enón te nopol yiloj sba soc te Salime, yu'un ay bayal ja'etic tey a. Te ants-winiquetic talic ta stojol, jich la yac'bey yich'ic ja'.

²⁴ Melel ma to ochemuc ta chuquel a te Juane.

²⁵ Te jnopojeletic yu'un te Juane, jajch' c'op yu'unic soc te jwolwanej-judioetique ta swenta te bit'il ay sc'oplal te utstesele.

²⁶ Jich ba sc'oponic te Juane: —Maestro, te mach'a ajoinej ta stojol sloq'uib c'aal ta bay jejch' muc'ja' Jordán te la awalbotic sc'oplale, ja' yaquix ta yaq'uel ich'ja'. Spisilic xbajt'iquix ta stojol —xiic.

²⁷ Te Juan jich la yal: —Ma'yuc jtuluc winic te ay bila ya xc'ot ta swenta spasel teme ma ja'uc ya x'ac'bot spas yu'un te Diose.

²⁸ Te jo'one la calbeyex ta jamal te ma jo'ocon te Cristoe. Ja' nax quich'oj tel neeltesel yu'un.

²⁹ Jich bit'il te nujbinele. Te mach'a ya xnujbin soc te ach'ixe, ja'ix te smamlale. Yan te mach'a sjoy nax sba soque, ja' nax ya xbujts'naj yo'tan yu'un te ya yaiybey te sc'ope. Jich c'oemon ta stojol te Jesuse. Bayal ya xbujts'naj co'tan ta swenta.

³⁰ Ja' me ya xtoy bael sc'oplal stuquel. Yan te jo'one, ya me xlaj bael jc'oplal jtuquel —xi' te Juane.

Te mach'a talem ta toyole

³¹ Te mach'a talem ta toyole, ja' cajal ay yu'un spisil te bitic aye. In te mach'a swenta te balumilale, swenta nax balumilal, soc ja' nax ya sna' yalel te bila swenta te balumilale. Yan te mach'a talem ta ch'ulchane, cajal ay yu'un spisil te bitic aye.

³² Te bila la yile soc te bila yaiyoj stojole, ja' ya xcholbey sc'oplal. Ja'uc me to, ma'yuc mach'a ya xch'uun te bi ya yale.

³³ Yan teme ay mach'a ya xch'uune, ya yac' ta na'el te bit'il melel te bila ya yal te Diose.

³⁴ Melel te mach'a ticunbil yu'un te Diose, ja' ya yal te sc'op Diose, yu'un ma p'isbiluc nax Espíritu ya yac' te Diose.

³⁵ Te Tatile c'ux ta yo'tan te Snich'ane, ja' yac'ojbey ta sc'ab spisil te bitic aye.

³⁶ Te mach'a ya xch'uun te Nich'anile, ya me xcuxin sbajt'el q'uinal. Te mach'a ma sc'an xch'uun te Nich'anile, ma xyil te cuxinele. Ja' nax quechel yilimba Dios ta stojolic.