Josué 24 - Bible in Tzeltal de Oxchuc y Tenejapa

C'opoj xan jilel Josué

¹ Te Josué la stsob ta Siquem spisil ta jchajp te sts'umbal Israel. La yic' ta stojol Cajwaltic te mamaletic yich'oj yat'elic, jwolwanejetic, jchajbanwanejetic soc te yantic ay yat'elique.

² Jich la yalbey spisil te lume: —Jich ya yalbotic Cajwaltic te Dios cu'untic te israelotique: “Namey q'uinal te Taré soc te snich'nabe, ja' te Abraham soc Nacor, te antiguo jme'-jtatic, ainic ta ti'ti'ja' Éufrates, soc yacalic ta xch'uunel te yantic diosetique.

³ La quic' Abraham, soc la cac' beenuc ta spamal sq'uinal Canaán. La cac' esmajuc,

⁴ te snich'an la cac'beye, ja' te Isaac. Te Isaac la cac'bey cheb snich'nab, ja' te Jacob soc Esaú. Te Esaú la cac'bey te witstiquil ta Seir, yan te Jacob bajt' ta Egipto soc te snich'nabe.

⁵ Ja'uc me to, la jticun Moisés soc Aarón. La quejch'entes ta lajel te egipcioetic, ja' to c'alal loq'uex tel cu'un tey a.

⁶ Te c'alal loq'uic tel ta Egipto te antiguo ame'-atatic, te egipcioetic la snutsic bael ta carretaetic yu'un guerra soc caballoetic c'alal ta Mar Rojo.

⁷ Te antiguo ame'-atatic la sc'opononic, jich la cac' tel muc'ul ijc'al q'uinal ta yolilic soc te egipcioetique, soc la cac' ch'ayuquic bael ta ja', mujq'uic bael. Ja'ex testigoex yu'un te bitic la jpas ta Egipto. “Ta patil c'ax bayal c'aal awu'unic ta muc'ul jochol taquin q'uinal,

⁸ ja' to la quiq'uex tel ta sq'uinal amorreoetic ta stojol sloq'uib c'aal yu'un Jordán. Jajch' yac'beyex guerra; ja'uc me to, la cac'beyex ta ac'abic. La atsalic, jich la awu'uninic te q'uinale.

⁹ Patil te Balac, te snich'an Zipor te ajwalil yu'un te moabetic, tal yac'beyex guerra. Te Balac la sticun ta leel te Balaam te snich'an Beor, swenta yu'un ya yac'bey sc'anbeyex tel castigo ta atojolic.

¹⁰ Ja'uc me to, ma la cac'bey yal te Balaam te ya sc'anbeyex castigo ta atojolic, ja' nax la cac'bey sc'anbeyex bendición ta atojolic, jich la jcoltayex te ja'exe.

¹¹ Patil c'axex bael ta muc'ja' Jordán, c'oex c'alal ta Jericó. Te mach'atic nainemic ta Jericó soc te amorreoetic, ferezeoetic, cananeoetic, hititaetic, gergeseoetic, heveoetic, soc te jebuseoetique la yac'beyex guerra; ja'uc me to, la cac'beyex ta ac'abic.

¹² Te cheb ajwaliletic yu'un amorreoetic ma la atsal atuquelic ta puñal ni ta t'im, jo'on la jticunbey tel muc'ul xiwel ta stojolic ta awentaic te ja'exe. Jich loq'uemiquix bael ta anel a te c'alal c'oexe.

¹³ Jo'on la cac'beyex q'uinal te banti ma ba at'ejemex, soc lumetic te ma ja'uquex la apasique. Yo'tic nainemexix tey a, soc ya awe'eliniquix sit ts'usub soc sit olivoetic te ma ja'uquex la ats'unique”, xi' te Cajwaltic —xi' te Josué. Soc la yal xan te Josué:

¹⁴ —Ja' yu'un ya calbeyex, ich'aic ta muc' te Cajwaltique, soc ac'a abaic ta abatinel ta stojol soc yutsil awo'tanic ta mero melel. Ijq'uitayaic te diosetic yu'un te antiguo ame'-atatic, te la xch'uunic ta ti'ti'ja' Éufrates soc ta sq'uinal Egipto. Ja' xawac' abaic ta abatinel ta stojol te Cajwaltique.

¹⁵ Teme ma x'ac'an ya awac' abaic ta abatinel ta stojol te Cajwaltic, nopa awaiyic mach'a ya awac' abaic ta abatinel ta stojol: teme ja' te diosetic la yac' sbaic ta abatinel yu'un te antiguo ame'-atatic ta ti'ti'ja' Éufrates, o teme ja' te diosetic yu'unic te amorreoetic te nainemic ta q'uinal to. Te jo'on soc te mach'atic ay cu'un ta jna, ya cac' jbajtic ta abatinel ta stojol te Cajwaltique —xi'.

¹⁶ Jich yu'un te lume la sjaq'uic: —Ma me xyac'otic a te Cajwaltic te ya quijq'uitaytique, te ja' ya xba cac' jbajtic ta abatinel ta stojol te yantic diosetique.

¹⁷ Ja' Cajwaltic te mach'a la sloq'uesotic tel jo'otic soc te antiguo jme'-jtatic ta Egipto ta bay la quich'tic mozoinel yu'une. Ja' stuquel la spas bayal jchajp at'eliletic ta jsitic, ja' te la scanantayotic soc te c'opoj cu'untic ta bebetic te c'alal c'axotic tel ta bay bayal ta jchajp lumetic.

¹⁸ Ja' la sloq'uesbotic bael ta jtojoltic ta spisil te lumetic ta bay beenotique, jich bit'il te amorreoetic te nainemic li'to. Ja' yu'un ta jpisiltic, jun me co'tantic ya cac' jbajtic ta abatinel ta stojol te Cajwaltic, melel ja' Dios cu'untic stuquel —xiic.

¹⁹ Ja'uc me to, te Josué la yalbey: —Te ja'exe ma xju' awu'unic te ya awac' abaic ta abatinel ta stojol te Cajwaltic, melel ch'ul Dios stuquel. Soc ma ba ya smulan te ya ale yantic diosetic. Ma ba ya sts'icbeyex te atoybailic soc te amulique.

²⁰ Teme ya awijq'uitay ta awo'tanique, teme yantic diosetic ya xba awac' abaic ta abatinel ta stojol, te Cajwaltic ya me yac'beyex tel woclajel ta atojolic, ya me slajinex, manchuc me bayal yutsil bila spasojbeyex —xi'.

²¹ Te lum la sjaq'uic: —Ya caltic te ma xc'ot ta pasel. Te jo'otic ya me cac' jbajtic ta abatinel ta stojol te Cajwaltique —xiic.

²² Jich yu'un te Josué la yal: —Ja'ex me testigoex te ja' la atsaic, te ja' nix ya awac' abaic ta abatinel yu'un te Cajwaltique —xi'. —Jo'otic me abi —xiic te lume.

²³ La to yalbey xan te Josué: —Loq'uesaic spisil te yantic diosetic te ay awu'unique, sujt'anic tel soc spisil awo'tanic ta stojol te Cajwaltic Dios cu'untic te israelotique —xi'.

²⁴ Te lum la sjaq'uic: —Te jo'otic ya me cac' yabatinotic te Cajwaltic te Dios cu'untic, ya me jpastic te bila ya yalbotic —xiic.

²⁵ Ja' nix sc'aalelal a, te c'alal ayic ta Siquem, te Josué la spas trato soc te lume. La yac'bey mandaliletic soc te bila chapbilix yu'un te Diose.

²⁶ La sts'ibubey ta libro te mandaliletic yu'un te Diose. Ta patil la stsac muc'ul ton, la yac' ta bay yet'al jijte' te ay ta ch'ul awilal yu'un te Cajwaltique.

²⁷ Jich la yalbey spisil te lume: —Te tone ja' me ya xtuun cu'untic ta testigo. Ja' me testigo yu'un spisil te bila yalojbotic te Cajwaltique. Ja' me testigo ta atojolic ja'ex, swenta yu'un ma xapasic ta lot te Diose —xi'.

²⁸ Laj yo'tan ta c'op te Josué, la sticun bael juju-jtul ta sq'uinalic.

Laj Josué

²⁹ Ta patil laj te Josué, te snich'an Nun, yabat te Cajwaltique, ay lajuneb swacwinic (110) ya'wilal.

³⁰ La smuquic ta bay sq'uinal, ja' te lum Timnat-sera, te ay ta witstiquil yu'un Efraín, ta stojol norte yu'un te wits Gaas.

³¹ Te israeletic jun yo'tanic la xch'uunbeyic smandal te Cajwaltic c'alal cuxul to a te Josué, soc nix ta patil te bit'il cuxulic to a te mamaletic te sna'ojic spisil te bitic la spas Cajwaltic ta stojol te israeletique.

Israeletic la smucbeyic xan sbaquel José

³² Te sbaquel José te la yich'beyic tel israeletic c'alal ta Egipto, ba smucbeyic ta Siquem, ja' te q'uinal te la sman te Jacobe. Jo'winic (100) ta jsejp plata la stojbey te snich'nab Hamor, te stat Siquem, ja' te la sq'uinaliniquix te sts'umbal José.

Laj Eleazar

³³ C'alal laj te Eleazar snich'an Aarón, la smuquic ta ch'in wits te ja' yu'un Finees te snich'ane, te ac'bot ta witstiquil yu'un Efraín.