Josué 22 - Bible in Tzeltal de Oxchuc y Tenejapa

Sujt'ic bael sts'umbal Rubén, Gad soc olil sts'umbal Manasés

¹ Te Josué la yic' tel te sts'umbal Rubén, Gad soc te olil sts'umbal Manasés,

² jich la yalbey: —Te ja'ex la ac'otesic ta pasel spisil te mandal la yalbeyex te Moisese te yabat Cajwaltic, soc la ach'uunic spisil te jmandale.

³ C'alal ora soc ta spisil te jayebix tel c'aal, ma'yuc bay la awijq'uitayic te awermanotaque. Jun awo'tanic la ac'otesic ta pasel te mandaliletic yu'un Cajwaltic te Dios cu'untique.

⁴ Ta ora to te Cajwaltic la sc'otes ta pasel te bitic yalojbey sc'oplale. Jich yu'un te bit'il lamalix jilel q'uinal ta stojol te quermanotactic, sujt'aniquix bael ta anailpaq'uic c'alal ta aq'uinalic te la yac'beyex Moisés te yabat Cajwaltic, ta jejch' muc'ja' Jordán ta stojol sloq'uib c'aal.

⁵ Jun nax te bi ya calbeyex, c'otesaic ta pasel te mandaliletic la yac'beyex Moisés te yabat Cajwaltic te Dios cu'untique. C'ux me x'awaiy ta awo'tanic, soc t'unbeya spisil ora te sbe, ch'uunbeyaic te mandaliletic yu'une. Na'aic me, soc ac'a abaic ta abatinel ta stojol soc spisil awo'tanic soc spisil ach'ulelic —xi' te Josué.

⁶ C'alal laj yo'tan ta yalel te Josué, la sc'anbey bendición ta stojolic, soc la sticun bael, jich bajt'ic ta snailpaq'uic.

⁷ Te olil sts'umbal Manasés, te Moisés la yac'beyix sq'uinalic ta sq'uinal Basán. Te yan olil sts'umbal Manasés, te Josué la yac'bey sq'uinalic ta bay yantic israeletic, ta stojol smalib c'aal yu'un muc'ja' Jordán. Te mach'atic ay sq'uinalic ta jejch' ja', la sc'anbey bael bendición, soc la sticun sujt'el,

⁸ jich la yalbey: —Baaniquix ta aq'uinalic soc te ac'ulejalic te c'ax bayale, bayal achambalamic, soc bayal oro, plata, bronce, hierro soc bayal c'u'il-pac'aletic. Pucbeya me abaic soc te awermanotac te bitic la apojbeyic te jcontrotique —xi' te Josué.

⁹ Jich te sts'umbal Rubén, Gad soc te olil sts'umbal Manasés loq'uic bael ta stojol te yantic israeletic ta lum Silo te ay ta sq'uinal Canaán, swenta yu'un ya me sujt'ic bael ta bay yich'ojic te q'uinal Galaad, te ja' sq'uinal c'otic, jich bit'il yalojbey mandal Cajwaltic ta stojol te Moisese.

Scajtijib majt'anil ta sti'il Jordán

¹⁰ C'alal c'otic ta muc'ja' Jordán te sts'umbal Rubén, Gad soc te olil sts'umbal Manasés, ay to ta sq'uinal cananeoetic, ta ti'ja' la sts'ajc'uyic moel muc'ul scajtijib majt'anil.

¹¹ Te yantic israeletic c'ot c'op ta stojolic te bit'il te sts'umbal Rubén, Gad soc te olil sts'umbal Manasés la sts'ajc'uyic scajtijib ta chiq'uel majt'anil ta sti'il sq'uinal Canaán ta ti'ja' Jordán ta bay sq'uinalic te israeletique.

¹² Te c'alal la yaiyic stojol te israeletic, la stsob sbaic ta Silo, swenta yu'un ya me xba yac'beyic guerra.

¹³ Ja'uc me to, neel la sticunic bael te Finees te snich'an sacerdote Eleazar, swenta yu'un ya xbajt' ta Galaad ta bay ayic te sts'umbal Rubén, Gad soc te olil sts'umbal Manasés.

¹⁴ La sjoin bael lajuntul jwolwanej-israeletic, juju-jtul ta swenta chajbalchajp.

¹⁵ Spisilic bajt'ic ta Galaad, ja' te ba ayic te sts'umbal Rubén, Gad soc te olil sts'umbal Manasés, jich c'o yalbeyic:

¹⁶ —Te jo'otic talotic ta c'op ta swenta te lum yu'un te Cajwaltique. ¿Bi mulil te la apasic ta stojol te Dios cu'untique? ¿Bistuc la awijq'uitay ta awo'tanic te ba apasbeyic yan scajtijib ta chiq'uel majt'anil ta swenta toybail ta stojol te Cajwaltique?

¹⁷ ¿Yu'un bal ya acuy te ma muc'ul jmulticuc ta swenta Baal-peor te bolobenotic to yu'une, te ja' ta swenta te c'axem to xan lajic te lum yu'un te Cajwaltique?

¹⁸ ¿Yu'un bal ma tic'uc ya awaiyic te ja'ex, te ya ac'an ya awijq'uitay ta awo'tanic te Cajwaltique? Teme ya atoy abaic yo'tic ta stojol Cajwaltic, te pajel ya me x'ilin ta jtojoltic ta jpisiltic te lumotic yu'un te israelotique.

¹⁹ Teme ma lecuc ta stojol Cajwaltic ya awaiyic in q'uinal to, la'ic ta bay q'uinal yu'un te Cajwaltique, ta bay ch'ul templo yu'un, ich'a aq'uinalic te banti ayotique. Ma xatoy abaic ta stojol te Cajwaltique, te ya xjajch'ex ta spasel yan scajtijib ta chiq'uel majt'anil a te bit'il ay yu'un Cajwaltic te Dios cu'untique.

²⁰ Na'aic me te bila la spas Acán te snich'an Zara, te la sta smul yu'un te la stsac te bitic u'uninbilix yu'un te lajele. Ja' ta scaj smul te ilin Cajwaltic ta jtojoltic ta jtsojboltic te israelotique. Te Acán ma ja'uc nax stuquel a laj yu'un te smule —xi' te Finees.

²¹ Jich yu'un te sts'umbal Rubén, Gad soc te olil sts'umbal Manasés la sujt'esbeyic sc'op te jwolwanej-israeletique:

²² —Te Cajwaltic Dios te cajal yu'un spisil te yantic diosetique, ya me sna' te ma swentauc toybail te la jpastic te scajtijib majt'anil, soc te ma yu'unuc ya jloq'ues jbajtic ta stojole. Ya me sna' stuquel, soc ya me yac'beyex ana'ic stojol te ja'exe. Yan teme ma jichuc te bit'il ya caltique, ya xju' te ma ba ya apasbotic perdón yu'un te jcuxlejaltique.

²³ Teme yu'un parte ya cac' jbajtic loq'uel ta stojol Cajwaltic te bit'il la jpastic te scajtijib majt'anil, teme yu'un ya acuyic ya jchic'beytiquix scojt'ol majt'anil tey a, majt'anil harina, soc teme yan milbil majt'anil ta swenta lamal-o'tanil, jich yu'un te Cajwaltic ja' me ac'a yich'botic jc'optic stuquel.

²⁴ Te bi smelelil te la jpastic yu'une, yu'un ma jc'antic teme ay bi ora ya yalic te patil anich'nabic soc te cu'untique: “¿Bi awentaic a te Cajwaltic te Dios yu'un Israel?

²⁵ Te Cajwaltic ja' seña la yac' te Jordán, te bit'il parte ayex te ja'ex te sts'umbal Rubén soc Gad, jich yu'un ma awentauc te Cajwaltique”, teme xiic ta patile. Jich te anich'nabic ma xyac'bey yich'ic ta muc' Cajwaltic te jnich'nabtique.

²⁶ Ja' swentail te la jnoptic sts'ajc'uyel te scajtijib majt'anil, ma yu'unuc ya jchic'tic majt'anil tey a ta stojol te Cajwaltique, soc ma yu'unuc ya cac'tic yan milbil majt'anil tey a.

²⁷ Ja' swenta testigo cu'untic soc te ja'exe, soc ta swenta te jts'umbaltique, te jich ya cac' jbajtic ta abatinel yu'un te Cajwaltic, soc jich ya cac'beytic chic'bil smajt'an ta stojol, soc milbil smajt'an cu'untic ta swenta te jmultique, soc ta swenta lamal-o'tanil. Ja' yu'un te ats'umbalic te ja'exe, ma xju' ya yalbeyic te jts'umbaltic: “Te ja'ex ma awentauc te Cajwaltique”, ma me xiuquic.

²⁸ Jich nix jnopojtic teme ay mach'a ya yalbotic te jo'otic, o teme ja' te jts'umbaltic, ja' yu'un te jo'otic, jich ya jsujt'esbeytic te sc'opic: “¡Aiya awaiyic stojol! Te antiguo me'il-tatiletic cu'untic la sts'ajc'uyic te scajtijib majt'anil yu'un te Cajwaltic, ma yu'unuc ya cac'beytic chic'bil smajt'an tey a soc milbil smajt'an. Ja' nax me swentail te testigo c'oem cu'untic soc te ja'exe”, xootic me ta stojolic.

²⁹ Dios me ya yac'otic ta libre yu'un te jtoybaeltic ta stojole, teme yu'un parte ya cac' jbajtic loq'uel yilel te bit'il la jpastic yan scajtijib majt'anil te ya jchic'tiquix majt'anil yilel a, teme majt'anil harina, teme yantic milbil majt'anil, te bit'il ay scajtijib majt'anil yu'un Cajwaltic te Dios cu'untic te ay ta yelaw te ch'ul awilal yu'une —xiic te jwolwanejetic yu'un te oxchajbique.

³⁰ Te sacerdote Finees soc te jwolwanejetic yu'un stsojbol te israeletic, soc te jwolwanejetic yu'un ta juju-jchajp te baemic soc te sacerdote, la yaiyic stojol te bi la yalic te sts'umbal Rubén, Gad soc te olil sts'umbal Manasés, lec a c'ot ta yo'tanic.

³¹ Jich yu'un te Finees, snich'an sacerdote Eleazar, la yalbey: —Yo'tic c'otix ta co'tantic te sjoinejotic te Cajwaltique, te melel ma'yuc ta awo'tanic te toybail ta stojol. Jich ma jtatic castigo yu'un te Cajwaltique —xi'.

³² Ta patil te Finees soc te mach'atic sjoinejic baele, la sc'oponic jilel, jich sujt'ic bael ta Canaán te banti ay te israeletique. C'alal c'o yalbeyic yaiy te mach'atic ayic ta Canaán te sujt'ib sc'opique,

³³ lec a c'ot ta yo'tanic, soc la yalbeyic wocol Dios yu'un. C'alal yo'tic ma'yuquix amen sc'opic te ya situy sba soc te sts'umbal Rubén soc Gad, te ya xba sjinbeyic sq'uinal.

³⁴ Te sts'umbalic Rubén soc Gad la slebeyic sbiil te scajtijib majt'anil: “Testigo Cu'untic”, xi' sbiil yu'unic, yu'un la yalic: “Te scajtijib majt'anil ja' me testigo bael cu'untic soc te ja'exe, te ja' Dios te Cajwaltique”, xiic te oxchajbique.