Josué 19 - Bible in Tzeltal de Oxchuc y Tenejapa

Sq'uinal sts'umbal Simeón

¹ Te xchebal buelta te la yich' puquel te q'uinal la yich' pasel snumeroil ta na'el, ja' c'ot ta swenta te jayeb ta jchajp sts'umbal Simeón. Te sq'uinal jil ta yutil sq'uinalic te sts'umbal Judá:

² ja' te lumetic Beerseba, Seba te yan sbiile, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot soc Saruhén, ta spisil oxlajuneb ta jpam lum soc ch'in lumetic yu'unic.

⁷ Soc jil xan ta swentaic te lumetic En-rimón, Eter, Asán soc te ch'in lumetic yu'unic,

⁸ soc spisil te ch'in lumetic c'alal ta Baalat-beer, ja' te lum Ramat ta Néguev. Ja' q'uinaletic te c'ot ta swentaic te jaychajp sts'umbal Simeón.

⁹ Te q'uinal te jil ta swenta te sts'umbal Simeón ay ta yutil sq'uinal te sts'umbal Judá, melel te sts'umbal Judá ay bayal ta jyalel te q'uinal smacoje, jich la yac'beyic te Simeón xejt' q'uinal te c'oem ta swenta Judá.

Sq'uinal sts'umbal Zabulón

¹⁰ Te yoxebal buelta te la yich' puquel te q'uinale la yich' pasel snumeroil ta na'el, ja' c'ot ta swenta te jayeb ta jchajp sts'umbal Zabulón. Te smojonil bajt' c'alal ta Sarid,

¹¹ bajt' xan ta stojol smalib c'aal c'alal ta Marala, soc c'alal ta Dabeset, swenta yu'un tey ya xc'ot ta comel ta beja' te ay ta yelaw Jocneam.

¹² Jajch' bael ta Sarid, bajt' ta stojol sloq'uib c'aal, c'alal ta Quislot-tabor, c'ax bael ta Daberat, soc mo bael c'alal Jafía.

¹³ Bajt' xan te smojonil ta stojol sloq'uib c'aal ta stojol Gat-hefer, jich c'ax bael ta Ita-cazín c'ot c'alal ta Rimón, la yac' buelta ta Nea.

¹⁴ Te mojón ta stojol norte la yac' bael buelta c'alal Hanatón, loc' bael ta stenlej xatal q'uinal yu'un Jefte-el.

¹⁵ Ja' in q'uinal to ay lajchayeb ta jpam lumetic soc ch'in lumetic yu'unic te nopol ayic soque. Jich sbiilic cha'oxpam: Catat, Naalal, Simrón, Idala soc Belén.

¹⁶ Ja' sq'uinalic te jayeb ta jchajp sts'umbal Zabulón te ay lumetic tey a soc te ch'in lumetic yu'unique.

Sq'uinal sts'umbal Isacar

¹⁷ Te xchanebal buelta te la yich' puquel te q'uinale la yich' pasel snumeroil ta na'el, ja' c'ot ta swenta te jayeb ta jchajp sts'umbal Isacar.

¹⁸ Ta sq'uinal ay te lumetic Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada soc Bet-pases.

²² Te smojonil c'ot ta Tabor, Sahazima soc Bet-semes, tey c'ot ta comel ta muc'ja' Jordán. Ay waclajuneb lumetic soc ch'in lumetic yu'unic.

²³ Ja' in q'uinal to ja' c'ot ta swenta te jayeb ta jchajp sts'umbal Isacar, ay lumetic soc ch'in lumetic yu'unic.

Sq'uinal sts'umbal Aser

²⁴ Te yo'ebal buelta te la yich' puquel te q'uinale la yich' pasel snumeroil ta na'el, ja' c'ot ta swenta te jayeb ta jchajp sts'umbal Aser.

²⁵ Ta sq'uinal ay te lumetic Helcat, Halí, Betén, Acsaf,

²⁶ Alamelec, Amad soc Miseal. Jich bajt' te smojonil q'uinal ta stojol smalib c'aal, c'alal ta wits Carmelo soc ta Sihor-libnat.

²⁷ Te smojonil ay ta sloq'uib c'aal, bajt' ta stojol norte c'alal Bet-dagón, jich la stabey sq'uinal te sts'umbal Zabulón, te stenlej xatal q'uinal yu'un Jefte-el, Bet-emec, Neiel, soc bajt' xan ta sjelawel Cabul,

²⁸ jich la smac tel te Abdón, Rehob, Hamón soc Caná, ja' to c'ot ta muc'ul lum Sidón.

²⁹ Te smojonil la yac' buelta c'alal ta Ramá, soc c'alal ta lum joytaybil ta ts'ajc' te Tiro sbiile. Bajt' xan ta stojol Hosa, loc' bael ta Mar Mediterráneo. Ta spisilic soc a te Mahaleb, Aczib,

³⁰ Uma, Afec soc Rehob, ay cheb xcha'winic (22) ta jpam lum soc ch'in lumetic te nopol ayic soque.

³¹ Ja' q'uinal te c'ot ta swentaic te jayeb ta jchajp sts'umbal Aser.

Sq'uinal sts'umbal Neftalí

³² Te swaquebal buelta te la yich' puquel te q'uinale la yich' pasel snumeroil ta na'el, ja' c'ot ta swenta te jayeb ta jchajp sts'umbal Neftalí.

³³ Te sq'uinale jajch' bael c'alal ta Helef, Alón-saananim, Adami-neceb soc Jabneel, c'alal ta Lacum, jich c'ot ta muc'ja' Jordán.

³⁴ Ta stojol smalib c'aal, te mojón bajt' ta Aznot-tabor, c'ax bael ta Hucoc, jich ta stojol sur la sts'ac sba soc te sq'uinal sts'umbal Zabulón. Yan ta stojol smalib c'aal, la sts'ac sba soc sq'uinal sts'umbal Aser. Ta stojol sloq'uib c'aal, te sq'uinal Neftalí c'ot c'alal ta muc'ja' Jordán.

³⁵ Te lumetic joytaybil ta ts'ajc' te c'ot ta swenta, ja' te Sidim, Zer, Hamat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat soc Bet-semes. Ta spisil ay balunlajuneb ta jpam lumetic soc ch'in lumetic yu'unic te nopol ayic soque.

³⁹ Ja' in q'uinal to soc te lumetic, soc ch'in lumetic yu'unic, te c'ot ta swenta te jayeb ta jchajp sts'umbal Neftalí.

Sq'uinal sts'umbal Dan

⁴⁰ Te sjuquebal buelta te la yich' puquel te q'uinale la yich' pasel snumeroil ta na'el, ja' c'ot ta swenta te jayeb ta jchajp sts'umbal Dan.

⁴¹ Ta sq'uinal ay te lumetic: Zora, Estaol, Ir-semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehud, Bene-berac, Gat-rimón,

⁴⁶ Mejarcón soc Racón, soc nix te q'uinal yelawinej sba soc Jope.

⁴⁷ Ja'uc me to, ma ba tic' a loc' te q'uinale, jich yu'un ja' ba yac'beyic guerra te lum Lesem. Jich la yich'ic te q'uinal te c'alal lajix yo'tanic ta smilel ta spisil te mach'atic nainemique. Jich jilic ta nainel tey a. La sjelbeyic sbiil, Dan c'ot yu'unic swenta yich'jibal ta muc' yu'unic te antiguo statique.

⁴⁸ Ja' in q'uinal to te la yich'ic jilel soc te lumetic soc ch'in lumetic yu'un te jayeb ta jchajp sts'umbal Dan.

Sq'uinal Josué

⁴⁹ C'alal lajix ta puquel sq'uinalic a te israeletic, ta bay c'ot ta swentaic te juju-jchajp sts'umbale, jich nix la yich' sq'uinal te Josué ta bay yolil sq'uinal te yantique.

⁵⁰ Jich bit'il yaloj mandal te Cajwaltic, ja' la yac'beyic te lum Timnat-sera ta witstiquil yu'un Efraín, ja' nix te bay sc'anoj te Josué. Te Josué la xcha'pas xan te lume, nain tey a.

⁵¹ Ja' spisil in q'uinaletic to te la spasbeyic snumeroil ta na'el ta puquel ta stojol chajbalchajp israeletic te sacerdote Eleazar, Josué soc te jwolwanejetic yu'unic. La spasic ta stojol Cajwaltic ta yochibal Nailpac' te bay ya yich' c'oponel Dios, te ay ta lum Silo. Jich la yich' juju-jsejp sq'uinalic te juju-jchajp sts'umbal Israel.