Josué 1 - Bible in Tzeltal de Oxchuc y Tenejapa

Dios la yic' ta at'el Josué

¹ Te c'alal lajix a te Moisés te yabat Cajwaltique, te Cajwaltic la sc'opon te Josué te snich'an Nun te sjoy ta at'el Moisés, jich la yalbey:

² —Te cabat Moisés lajix, jich yu'un ta ora to ja'at me ya awic' c'axel ta muc'ja' Jordán te lum Israele. Tey me ay a te q'uinal ya cac'beyex te ja'exe.

³ Ja' me te calojbey te Moisés te jo'on ya cac'beyex spisil te lumq'uinal te bay ya xbeenex baele.

⁴ Ya cac'bat spisil te q'uinal c'alal ta bay jochol taquin q'uinal ja' to c'alal ta witsetic yu'un Líbano, soc c'alal ta muc'ja' Éufrates, ja' spisil te sq'uinal hititaetic, ja' to c'alal ta Mar Mediterráneo.

⁵ Ma'yuc mach'a ya stsalat te jayeb c'aal cuxulate. Jich bit'il la join te Moisés, jich nix ya joinat te ja'ate, ma xquijq'uitayat soc ma ba ya jpijt'esat.

⁶ Ma xiwat, pasa tulan, yu'un ja'at me ya x'och ta awenta spuquel sq'uinal te lume, ja' te la calbey ame'-atatic ta namey te ya cac'beye.

⁷ Ja' nax ya jc'anbat te ma xiwate, pasa me tulan, ch'uuna spasel spisil te mandaliletic te la yalbat te cabat Moisés. C'otesa ta pasel te bila ts'ibubil, jich me lec ya xc'oat ta loq'uel soc spisil a te bitic ya xjajch' apase.

⁸ Alulaya te bila ya yal ta libro yu'un te mandaliletique, na'ulaya me c'aal ajc'ubal. Ich'a ta muc' soc c'otesa ta pasel te bitic ya yalbat, jich me lec ya xc'oat ta loq'uel soc spisil te bitic ya apase.

⁹ Jo'on me te ya calbat te ma xiwate, soc te ya apas tulane. Ma me xiwat, soc ma me xpejc'aj awo'tan, melel jo'on Ajwalilon te Dioson awu'une, ya me joinat bayuc ya xbaat —xi' te Diose.

Josué la xchajban sba yu'un tsalaw

¹⁰ Te Josué la yalbey mandal te jtsobwanejetic yu'un te lume, jich la yalbey:

¹¹ —C'axanic bael ta yoclinel te campamento yu'un te israeletic, pasaic ta mandal. Jich me ya awalbeyic: “Chajbana me abaic soc awe'elic, tey xan meix ta oxeb c'aal ya xc'axotic bael ta muc'ja' Jordán te ya xba ochucotic ta yu'uninel te q'uinal te ya yac'botic Cajwaltic te Dios cu'untique”, utaic me —xi'.

¹² Te Josué la yalbey te sts'umbal Rubén, te sts'umbal Gad soc te olil sts'umbal Manasés:

¹³ —Na'aic me te sc'op Moisés, te yabat Cajwaltic, te bit'il la yalbeyex te ya yac'beyex te q'uinal te Cajwaltic Dios cu'untic, ta bay ya acux awo'tanique.

¹⁴ Ijq'uitayaic li'to ta q'uinal te awinamic, te anich'nabic soc te achambalamique, te la yac'beyex te Moisés ta jejch' ja' Jordán. Yan te winiquetic, ja' te mach'atic ya xju' yu'unic guerra, spisil ac'a stsac te yat'ejibique. Ya me xneelajex bael yu'un te awermanotac ta scoltayel ta guerra,

¹⁵ ja' to me c'alal ya x'ac'botic ta bay ya xcux yo'tanic yu'un te Cajwaltique. Ta patil ya me sujt'ex bael ta bay aq'uinal te la yac'beyex te Moisés te yabat te Cajwaltique, ja' ta jejch' ja' Jordán ta bay stojol sloq'uib c'aale. Ja' me ya awu'uninic ta jc'axel —xi' te Josué.

¹⁶ La sjaq'uic ta spisilic: —Ya me jpastic spisil te bila mandal ya awalbotique, ya me xbootic ta bay ya aticunotique.

¹⁷ Ya me jch'uuntic te ac'op jich bit'il la jch'uunbeytic sc'op Moisés. Ja' nax ya jc'antic te yacuc sjoinotic te Cajwaltic te Dios cu'untique, jich bit'il la sjoin Moisés.

¹⁸ Spisil te mach'atic ya stoy sbaic ta swenta te mandal ya awalbotic, teme ma sc'an xch'uunic te bi ya awale, ac'a yich'ic milel. Ja' nax teme ma xiwate, soc teme ya apas tulane —xiic.