Joel 2 - Bible in Tzeltal de Oxchuc y Tenejapa

¹ Oq'uesinaic oq'ues ta wits Sión, ac'a ta na'el ta ch'ul wits yu'un Cajwaltic te ya xtal swocolil. Ac'a jajch'icuc ta nijq'uel ta spisilic te mach'atic nainemic ta Judá, melel nopolix sc'aalelal te Cajwaltique:

² Sc'aalelal te ijc' q'uinale, sc'aalelal te tocaletic soc xiweltic sba axinal. Jchajp soldadoetic c'oem, mero bayal, soc mero bayal yipic, la spuc sbaic ta ba witsetic, jich bit'il saquil q'uinal ya xchicnaj te c'alal ya sacube. Ma'yuc jich chicnajem ta ilel soc ma'yuc bi ora ya xchicnajix, ma'yuquix pajal soc ya xchicnaj.

Guerra ya yac' c'ulubetic

³ Pajalic soc c'ajc', te spisil ya slajine. Ya xchic'awan te c'alal ma to xc'ax ae, soc manchuc me c'axemix a, pero ya to xchic'awan xan a. Te c'alal ma to xjulic ae, mero c'ax t'ujbil te q'uinale; te c'alal ya xbajt'ique, pajal soc jochol taquin q'uinal ya xjil yu'unic. Ma'yuc bila col jilel yu'unic.

⁴ Jich yilelic te bit'il caballo, jich ya x'animajic te bit'il mach'atic moemic ta caballo.

⁵ Te c'alal ya xwilic bael ta witse, jich sc'op te bit'il sc'op te carretaetic yu'un guerra, jich xch'ititet te bit'il taquin yabenal te ya xtil ta c'ajq'ue. Pajal soc jchajp soldadoetic te bayal yip te xcholoj sbaic yu'un guerra.

⁶ Te mach'atic ya yilic ya xjajch'ic ta nijq'uel yu'un, spisil sit-yelawic ya xch'ay xch'ich'elic yu'un.

⁷ Jichic te bit'il winiquetic te ma xiwic ta guerra, ya x'animajic, ya xmoic ta ts'ajq'uetic, ya xbajt'ic ta animal, mero toj nax ya xbeenic bael.

⁸ Ma ba stenten sba ya xbeenic, ta juju-jcojt' ya xbeen ta sbeic; xcholoj sbaic ya xwilic bael ta yolil yat'ejibalul t'imalte'etic; jun ayic, ma ba ya sjin sbaic.

⁹ Ya yochintay te lume, ya x'animajic ta ba ts'ajq'uetic, ya xmoic ta ba nanatic, ya x'ochic ta ventana jichuc j'eleq'uetic.

¹⁰ Te lumq'uinal ya stij sba ta stojolic, te ch'ulchan ya syuc' sba yu'unic, te c'aal te u ya xch'ay xojobil, te eq'uetic ya x'ijc'ub yu'unic.

¹¹ Te Cajwaltic neel yac'oj sba ta stojol te soldadoetic c'oem yu'une, ya yac' chicnajuc yaw ta mero tulan. Mero bayal te soldadoetic c'oeme, ma x'ajtabaj te mach'atic ya xch'uunbey smandale. Mero muc' soc mero xiweltic sba te sc'aalelal te Cajwaltique. Ma'yuc mach'a ya xcujch' yu'un.

Xc'uxul yo'tan Cajwaltic

¹² Ya yal te Cajwaltic: —Pero yo'tic in to, sujt'anic tel ta jtojol, sujt'anic ta jtojol ta spisil awo'tanic. Coma awe'elic, awunanic, oq'uetaya abaic —xi' te Cajwaltique.

¹³ Sujt'anic tel ta stojol te Awajwalic, te Dios awu'unique. Jatsaic jichuc pac' te awo'tanique, ma ja'uc x'ajatsic te ac'u'ique. Melel te Cajwaltique, sts'ujetotic ta yo'tan, ya sna' yo'bolil jbajtic; ay perdón ta yo'tan stuquel, mero c'uxotic ta yo'tan. Spisil ora ya xju' yu'un te ya slajinbey sc'oplal te castigoe.

¹⁴ Ma wan ya yac'beyex castigo, ya wan sticunbeyex bendición: sit trigo soc vino yu'un smajt'an te Awajwalic, te Dios awu'unique.

¹⁵ Oq'uesinaic oq'ues ta wits Sión. Tsobaic te yajwal lum, coma awe'elic;

¹⁶ tsobaic te lum yu'un Dios, ch'ultesaic. Tsobaic te mamaletic soc te alaletic, asta te alaletic ya to xchu'unique. Soc te mach'a nujbinelic to, ac'a loq'uicuc tel ta na yu'un nujbinel.

¹⁷ Ac'a oq'uicuc te sacerdoteetic, ja' te abatetic yu'un te Cajwaltique. Jich ac'a yalic ta yolil te yochibal Ch'ul Awilal soc te scajtijib ta chiq'uel majt'anile: “Cajwal, pasbeya perdón te lum awu'une; ma xawac' te ay mach'a ya xlabanot yu'un te mach'atic awu'une; ma xawac' te ya x'u'uninot yu'un yantic nación, soc te jich ya yalic te mach'atic ma ba xch'uunejate: ‘¿Banti ay te Dios yu'unique?’ xiic me”, xiuc me sc'op te sacerdoteetique.

¹⁸ Te Cajwaltic jich la yac' ta ilel xc'uxul yo'tan ta stojol te lum yu'une, la sna'bey yo'bolil sba te lum yu'une.

¹⁹ Jich la yal: —Ya me jticunbeyex trigo, vino soc aceite, ja' to teme noj ach'ujt'ique. Ma'yuquix bi ora ya cac' slabanex te mach'atic ma ba xch'uunejone.

²⁰ Ya me jloq'uesbeyex ta atojolic te c'ulubetic ya xtalic ta norte, ya me cac' bael ta jochol taquin q'uinal. Ya me cac'bey sjic' ja' ta Mar Muerto te j'il-q'uinal yu'un ta naile, ya me cac'bey sjic' ja' ta Mar Mediterráneo te j'il-q'uinal yu'un ta spate. Tey me ya xc'a' sbaq'uetalic, tey me ya xtuub a. Muc' me te bitic ya jpase —xi'.

²¹ Binuc nax me awo'tan, lumq'uinal, ma me xiwat, melel te Cajwaltic ay bitic muc' ya spas.

²² Ma me xiwex, ja'ex ja'mal chambalametic, melel ya me xyaxubiquix xan te aquiltique. Ya me xcha'yac' xan sit te te'etique, ay me bayal higueraetic soc ts'usubetic.

²³ Binuc nax me awo'tanic, ja'ex te nainemex ta Sión, binuc nax me awo'tanic ta stojol te Cajwaltic Diose. Ja' stuquel la yac'beyexix tel ta yorail te ja'ale, ja' te ja'al ya xtal ta yorail invierno soc ta yorail primavera, mero jich nix te bit'il la spasbeyex ta neelal toe.

²⁴ Ya me xloc' lec sit atrigoic, bayal me ya x'esmaj te aceite awu'unic, soc tsobol me ya x'esmaj te vino awu'unique.

²⁵ Ya yal te Cajwaltic: —Jo'on me ya jeltaybeyex te ja'wiletic te ch'ay awu'unic te ja'exe, te ch'ay ta swenta c'ulubetic, te jlajinwanej-soldadoetic c'oem cu'un la jticunbeyex ta atojolique.

²⁶ Te ja'exe, ya me xwe'ex ta lec, ja' to teme noj ach'ujt'ique. Jich me ya awalbonic yutsil jc'oplal jo'on te Ajwalilon te Dioson awu'unique, melel te jo'on ay bayal jchajp at'eliletic muq'uic la jpas ta awentaic. Ma me ayuquix bi ora ya xtaot yu'un q'uexlal te lum cu'une.

²⁷ Ja'ex israeletic, ya me sc'an ya ana'ic te joinejex jo'on te Ajwalilon, te jo'on Dioson awu'unic te ma'yuc mach'a yan ay awu'unic. Ma'yuquix bi ora ya xtaotic yu'un q'uexlal te lum cu'une —xi'.

Ya xtal espíritu yu'un Dios

²⁸ Jich ya yal te Cajwaltic: —C'alal ya xc'ax ta spisil te bitic la cale, spisil te ants-winiquetic ya me jmalbey ta stojolic te espíritu cu'une. Te aquerem-nich'nabic, te awantsil-nich'nabic ay me bi ya yalic ta jwenta, te mamaletic ay me bila ya swaichinic, te queremetic ay bitic ya x'ac'bot yilic ya yaiyic.

²⁹ Soc nix ta stojolic te abatetic te ants-winiquetique ya me jmalbey ta stojolic te espíritu cu'un te c'alal ya xc'ot sc'aalelale.

³⁰ Ya me cac' chicnajuc jchajp at'eliletic ta ch'ulchan soc ta lumq'uinal te muc' sc'oplale: Ch'ich', c'ajc' soc pimil ch'ail ta lumq'uinal.

³¹ Ya me x'ijc'ub te c'aale, te u, jich me ya xc'ot yilel te bit'il ch'ich', ja' me te c'alal ma to xc'ot sc'aalelal a te Cajwaltique, ja' te sc'aalelal te mero muc' sc'oplale, ja' te sc'aalelal te mero xiweltic sbae —xi' te Cajwaltique.

³² Spisil te mach'atic ya yalbey wocol te Cajwaltic ya me xcol stuquelic. Ta wits Sión, ta Jerusalén, tey ya xjul a te colele, jich nix te bit'il yaloj te Cajwaltique. Te mach'atic stsaoj stuquel cuxulic me ya xjil stuquelic.