Joel 1 - Bible in Tzeltal de Oxchuc y Tenejapa

C'ulubetic la slajinbey sit awalts'unubil

¹ Joel snich'an Petuel, tal ta stojol yu'un Cajwaltic te c'op in to:

² Mamaletic soc ta apisilic te yajwalex te lumq'uinale, aiybon me awaiyic jc'op. Mamaletic, ¿ay bal bi ora jich awilojic te bit'il ya awilic ta ora in to? ¿Ay bal awilojic jich te pajal soc te c'alal cuxulic ta q'uinal a te ame'-atatique?

³ Albeya me yaiy awal-anich'nabic, soc ac'a me yalbey yaiy yal-snich'nabic, jichic uuc ac'a me yalbeyic te mach'atic ya to x'ayin yu'unique.

⁴ Spisil lajinot ta c'ulubetic; te bay c'alal jil yu'une, tal te yantique, la slajinic ta jc'axel.

⁵ ¡Cuxa awo'tanic, ja'ex jyacubeletic! Ochanic ta oq'uel, j'uch'-vinoetic, melel ya me awich'ic pojbeyel te ya'lel ts'usub awu'unique.

⁶ Melel te c'ulubetique, pajal soc soldadoetic te bayal yipique, pajal sbaquel yeic soc león-choj, pajal scolmilloic soc me' león-choj, ja'ic ju' yu'unic yochintayel te lumq'uinal cu'une.

⁷ La slajinbotiquix te jts'usubiltique; la set'botiquix te higueraetic cu'untique. Jc'axel la xcho'botiquix spat, asta sacubix jilel sc'abc'ab yu'un.

⁸ Pajal soc c'anbil ach'ix, te ya x'oc' soc te ya slap ch'ixal pac' ta scaj te laj mach'a quechel ya xnujbin soque,

⁹ jich nix yacalic ta oq'uel te sacerdoteetic. Melel ta templo ma'yuquix sit trigo tey a soc ma'yuquix vino yu'un smajt'an Cajwaltic.

¹⁰ Te lumq'uinal jochol jilel; te lumq'uinaletic, yacalic ta mel-o'tan. Jc'axel laj te trigoe, jc'axel taquejix te ts'usubiletique, sayubeniquix te olivoetique.

¹¹ Ja'ex te ya x'at'ejex ta yawil trigo soc ta yawil ts'usubile, oc'anic me yu'un mel-o'tan. Melel ma'yuc swentail c'ot te ts'unubiletic, ma'yuc swentail c'ot te sit trigo, soc ma'yuc swentail c'ot te sit cebada.

¹² Taquejix te ts'usubile, tojol ch'ay te higueraetique. Taquin a jilic uuc te granadoetic, te palmaetic, soc ste'el manzanaetic, soc ta spisil ste'el te q'uinaletique. Jich ch'ay te yutsil yo'tanic spisil te ants-winiquetique.

¹³ Jichex uuc sacerdoteetic te ya awac' abaic ta abatinel ta scajtijib ta chiq'uelsmajt'an Dios, lapaic ch'ixal pac', oq'uetaya te templo. Melel ta templo yu'un Dios awu'unic, ma'yuquix trigo soc cebada ni vino yu'un smajt'an Dios.

¹⁴ Tsobaic te lume, coma awe'elic; tsobaic ta templo yu'un Cajwaltic, ja' te Dios awu'unique. Tsobaic te ancianoetic soc ta spisil te yajwal lumq'uinale, c'oponaic te Cajwaltique.

¹⁵ ¡Ay! Ya xnoptsajix sc'aalelal te Cajwaltique. Mero xiweltic sba te c'aal in to; ya me yich'botic tel lajel, ja' lajel yu'un te Mach'a Spisil ya xju' yu'une.

¹⁶ Q'uelel jsitic a la quich'tic pojbeyel te jwe'eltique; ch'ay te yutsil q'uinal la caiytic ta templo yu'un te Dios cu'untique.

¹⁷ Te ts'unubile, laj ta surcoil; lajix te trigo, jinix te snaile.

¹⁸ Xme'lajan te chambalametique. Tojol ya sle swe'elic te wacaxetique; ta stsojbol te chijetic ayic ta chamel.

¹⁹ Cajwal, ja'at ya jc'oponat, melel lajix ta chiq'uel ta c'ajc' c'oem te swamalel te jochol q'uinale, soc lajix ta c'ajq'uel te te'etic ta q'uinaletique.

²⁰ Yacal to ta aw ta atojol te ja'mal chambalametic, ja' yu'un te tup'ix ya'lel te beja'etique, lajix ta chiq'uel ta c'ajc' c'oem te swe'elique.