Job 9 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —Jna'oj ta lec te melel jich aye, soc jna'oj te ma xju' yu'un jtuluc winic te ya yac' ta na'el ta stojol Dios te ma'yuc bila spasoje.

³ Te ayuc mach'a ya sc'an yo'tan te ya stsal sba ta c'op soque, te jmil ta jchajp bila ya yale, ma xju' yu'un sjaq'uel ni junuc te jichuque.

⁴ Te Diose mero muc' yu'el soc mero bayal sp'ijil stuquel. ¿Mach'a ya xju' ya stejc'an sba ta stojol te libre ya xloc' tele?

⁵ Te Diose, ta swenta sc'ajc'al yo'tan ya xju' ya sjeltaybey yawil te witsetique; ya xju' yu'un ya sjin coel, ni ma'yuc mach'a ya sna'.

⁶ Ja' ya yac'bey stij sba te lume, soc ya yac'bey stij sba te yiptajibe.

⁷ Ja' ya yalbey mandal te ma ba xloc' tel te c'aale, soc ya yalbey mandal te eq'uetic te ma ba ya yac' xojobilique.

⁸ Stuquel la slim bael te ch'ulchane, ma'yuc mach'a coltayot yu'un; stuquel ju' yu'un stec'beyel yip te muc'ul chambalam ta mare.

⁹ Ja' la spas te eq'uetic soc chajbalchajp la yac': Osa Mayor, Orión soc te Xanab ec', soc te yan jtsojp eq'uetic te ayic ta sur.

¹⁰ Ja' la spas bayal jchajp at'eliletic, mero ma'yuc mach'a ya xju' yu'un sna'el.

¹¹ Teme ya xc'ax ta jts'eel te Diose, ma xju' cu'un yilel; ya xc'ax pero ni jxujt' ya caiy.

¹² Teme ay bi ya yu'unine, ¿mach'a ya xju' ya xc'opoj yu'un? ¿Mach'a a te ya xju' yu'un ya yalbey: “¿Bila ya apas?” teme ya yute?

¹³ Teme ya x'ilin te Diose, wocol me ya xlamaj te yilimbae; ya yich' pejc'anel ta ye'tal yacan te mach'atic jun ay soc te muc'ul chambalam ta mar, te Rahab sbiile.

¹⁴ ¿Bi ya cut ya jcontroc'optayix a jiche te Diose?

¹⁵ Manchuc me mero ma'yuc jmul, pero ma xju' ya jac'; ja' juez cu'un stuquel, ja' nax ya calbey sna'bon yo'bolil jba.

¹⁶ Teme ya jc'opon, teme ya sjac'bon te jc'ope, pero ma xju' ya cal te ya yaiybon te jc'ope.

¹⁷ Ya me xch'ojon c'alal ta lum ta buen tulan yic'al ja'al c'oem, ma me ayuc swentail ya yac' esmajuc xan te quejch'ene;

¹⁸ ya yac' esmajuc xan jwocol, ma xyac'bon quich' lequil ic'.

¹⁹ Teme ya jc'opon ta puersa soc quip, ja' ay bayal yu'el stuquel. ¿Ya bal quic' ta chajbanel? ¿Mach'a ya xju' ya yic' tel?

²⁰ Manchuc me mero toj ya caiy jba, manchuc me mero ma'yuc falta cu'un, ya me yalon ta jamal te ay jmule, ya me yalon ta jamal te amenone.

²¹ Ma'yuc bila jpasoj, pero ma'yuc sc'oplal; c'axix co'tan yu'un te cuxlejale, ma jc'anix te cuxulone.

²² Pajal nix spisil. Jich ya yal te co'tane: “Te Diose, pajal ya slajin mach'atic ay smulic soc mach'atic ma'yuc smulic,” xi'.

²³ Teme ay tal lajel te lajinotic yu'un te mach'atic ma'yuc smulique, te Diose, ya stse'lubey te swocole.

²⁴ Te balumilal ya yac'bey ta sc'ab te mach'atic amen yo'tanique; te juecetique, ya xmacbot sitic yu'un. Teme ma ja'uc te Diose, ¿mach'a ix a jiche?

²⁵ Te jcuxlejal ya xbajt' ta anel, ya xbajt' ta anel ta buen animal, tey ma'yuc la quil a te utsilale.

²⁶ Jich tulan ya xbeen te bit'il barco, jich ya xbeen te bit'il ya xwil ta stsaquel swe'el te águilae.

²⁷ “Teme ya jc'an ya jch'ay ta co'tan te jwocole, teme jich ya jpas jba te bin nax co'tane,

²⁸ spisil te xc'uxul te jwocole ya xcha'xiwteson, melel ya jna' te bit'il Dios sna'oj te ay jmule.

²⁹ Teme ay jmul yu'un te Diose, tojol ya cac' jwocol a te ya cac' puersa.

³⁰ Manchuc me ya jpoc jc'ab ta xapon, manchuc me ya jux jba ta ya'lel stanul c'ajc',

³¹ Dios me ya sjipon coel ta ch'en, asta ya me yilaybon te jc'u'e.

³² Ma xju' ya jsituy jba ta c'op soc Dios jichuc winic, soc ni yacuc xju' calbey te ya xbootic jchebaltic ta chajpajibale.

³³ Ayuc nix bit'il ay juez ta coliltic te ay yat'el ta jtojoltic ta jchebaltique,

³⁴ te ya scom te Diose, te manchuc ya yac'bon xan bael castigo, soc te manchuc ya yac'bon bael jxiwele.

³⁵ Te jichuque ma ba ya xju' ya jxi'ix sc'oponel a, melel ma'yuc jtaoj jmul ta stojol ya caiy.