Job 6 - Bible in Tzeltal de Oxchuc y Tenejapa

¹ La sjac' xan te Job, jich la yal:

² “Ta spisil te jwocole, ta spisil te jmel-o'tane, te yacuc xju' ta p'isel yalal ta balanza,

³ c'axem jich yalal ya xloc' a te bit'il yalal te sji'al mare. Ja' yu'un ta scaj jwocol te ya xjelawon ta c'ope.

⁴ Te Mach'a Spisil ya xju' yu'une, sts'apojbon ta jbaq'uetal c'oem te yat'ejibal t'ime, ja' yacal ta pujq'uel ta jbaq'uetal te svenenoile. Dios yac'ojbon tulan xiwel, ja' te xiwel julem ta jtojol yu'une.

⁵ ¿Ay bal ya x'oc' te burro teme ay wamal ya swe'e? ¿O ya bal x'oc' te toro teme ay ac ya swe'e?

⁶ ¿Ay bal mach'a bujts'an ya yaiy jiche te we'elil te ma'yuc yats'amule? ¿Ay bal mach'a ya smulan yo'tan te bila ma bujts'anuque?

⁷ Te bila ma jmulan swe'el ja' jwe'elinej c'oem ta ora in to.

⁸ Ayuc bit'il ya yac'bon a te Dios te bila ya jc'anbeye; ayuc laj bit'il ya spasbon a te bila ya jmulane.

⁹ Ayuc laj bit'il ya yal a te jc'axel ya stenon te Diose, soc te jc'axeluc ya slajinbon te jcuxlejale.

¹⁰ Manchuc me mero ay xc'uxul ya caiy, pero ja' me ya xmuc'ub q'uinal ya caiy yu'un, melel spisil ora quich'ojbey ta muc' te mandaliletic yu'un te ch'ul Diose.

¹¹ Ma'yuquix quip ya caiy, ma ba ya xcujch'ix cu'un ya caiy, soc ma'yuquix swentail ya caiy teme ya to xcuxinone.

¹² Ma pajaluc jtulanil soc te tone, ni ma pajalucon soc bronce.

¹³ Ma xju' cu'un te jo'onix ya jcoltay jba, soc ni ma'yuc mach'a yan ya scoltayon.

¹⁴ Teme ay ta wocol te jo'taque, ya me yich' c'uxtayel, manchuc me ma junuc yo'tan ta stojol te Mach'a c'ax bayal yu'ele.

¹⁵ Pero te ja'ex amigotac, ma jichuc la apasbonic, jichex te bit'il taquin beja'etique.

¹⁶ Te ja'e, tatuben ya xco, capal soc bat soc toib;

¹⁷ pero teme c'ax te yorail te bate, teme q'uixnaj te q'uinale, ya xtaquej te beja'etique; ya xtal te sq'uixnal c'aale, ya xtup' te ja'e.

¹⁸ Ma ba ya xtojobix ta sbe te jbeel-chonbajeletic, c'unc'un ya xjowejic bael, jich ya xc'ubic bael ta taquin q'uinal. Tey ya xlajic a.

¹⁹ La sleic ja' te jbeel-chonbajeletic te talemic ta Temá soc ta Sabá, ja' smuc'ul yo'tanic te beja'etic;

²⁰ te c'alal ya staic te beja'etique, ma ba ya sta ja' yuch'ic tey a, jich ya smel yo'tanic yu'un; soc ch'ay te smuc'ul yo'tanique.

²¹ Jich c'oemex ta jtojol ya caiy: ya awilic te bila xiweltic sba te ay jwocol yu'une, ya xtal xiwel ta awo'tanic yu'un.

²² Pero ma'yuc bila ya jc'anbeyex, ni ma'yuc ya awaq'uic taq'uin te yu'un ya quich' coltayele,

²³ ni ma'yuc ya jc'anbeyex te ya acoltayonic ta sc'ab jcontro, soc ma'yuc ya calbeyex te ya apojonic loq'uel ta sc'ab te j'eleq'uetique.

²⁴ “P'ijubtesawonic, ya me jmaliy caiy, ma ba ya xc'opojon; ac'bonic me jna' te banti jowejemon ya awaiyique.

²⁵ Ma'yuc mach'a ya sp'aj teme ja' te lequil tojtesele; pero te ja'exe la atojol-leonic ta c'op, melel ma'yuc bi jamal chican.

²⁶ Te ja'exe la aleonic ta c'op, pero tojol c'opetic nax te yac nax ta bael ta iq'ue.

²⁷ Awo'tanicuc ya achapbeyic sc'oplal te me'ba alale, soc awo'tanicuc ya achapbeyic sc'oplal ta chonel te awamigoique.

²⁸ Yo'tic ya me awilonic ta lec; ya me awalbonic teme yacon ta lote.

²⁹ Suta ac'opic yu'un te bila awalojique, t'unbeyaic stojil te bila leque; na'aic te yu'unix melel a te bi ya cale.

³⁰ ¿O ya bal acuyic te yacon ta lote, soc te ma ba ya jna' te bila yacon ta yalele?