Job 5 - Bible in Tzeltal de Oxchuc y Tenejapa

¹ Tatic Job, awunan caiytic, ya me quiltic mach'a ya sjac'bat. ¿Mach'a ch'ul abatil ya ac'opon?

² Teme ya awac' aba a te ilimbae, o teme ya awac' aba a te bic'tal-o'tanile, ta scaj te ma x'ana' q'uinal te ya yac'at bael ta lajele.

³ Ay quiloj te mach'a ma sna' q'uinal te toy bael ta xjajch'ibal te sbiluque, pero ora nax lajinbot te snae.

⁴ Ma'yuc mach'a coltaybot yu'un te snich'nabe; ta chajbajibal ma stojiluc te bila ya xpasbotic tey a, ma'yuc mach'a ya xcoltayotic yu'un.

⁵ Te sit yawal-sts'unub ya xwe'bot yu'un te mach'a ayic ta wi'nale, ya sloq'uesic tel ta yolil ch'ixtiquil; te mach'atic ayic ta taquinti'il ya xbic'taj yo'tanic yu'un te sc'ulejale.

⁶ Te bila amen ma ba xloc' tal ta ba lum; te j'ac'-wocol ma ba ya x'ayin ta lumq'uinal.

⁷ Ja' te winic te ya yac' te wocole, jich te bit'il ta c'ajc' ya xloc' tel ta wilel te nich c'ajq'ue.

⁸ Te jo'ucon te ayon ta wocol jich te bit'il te ja'ate, ya sujt'on ta stojol Dios te jichuque, te jwocole ya cac'bey ta sc'ab te jichuque;

⁹ ja' ya spas bayal bitic muq'uic te jchajp ta ilel stuquel, ma'yuc mach'a mero ya xc'ot ta yo'tan te bitic ya spase.

¹⁰ Ja' ya yac' tel ja'al ta lumq'uinal, ja' ya x'ajch' yu'un te lumq'uinaletique;

¹¹ ja' ya stoyesbey sc'oplal te mach'atic peq'uel ayique, te mach'atic ayic ta wocol, ya yich'ic coltayel yu'un;

¹² ja' ya sjinbey te bila chapal yu'un te mach'a p'ij yac'oj sbae, soc ma'yuc swentail ya xc'ot.

¹³ Ja' ya spotsbey yo'tan te mach'a p'ije, ja' te mach'a ay sp'ijil ya scuy sba ta stuquel-o'tane, ya sjowtesbey te bila xchapoj te mach'a amene.

¹⁴ Ta c'aaleltic ma ba ya yil sbeic, xmaxlajan ya xbeenic c'oem; potsbilic ta ijc' q'uinal, jich c'oem te bit'il ajc'ubale.

¹⁵ Dios ya xcoltayotic yu'un te me'baetique, Dios ya xcoltayotic yu'un te bit'il ayic ta uts'inel yu'un, ta sc'abic te j'amen-o'tanetique;

¹⁶ ja' smuc'ul yo'tanic te mach'atic ma'yuc yipique, ja' ya smacbey yeic te j'amen-o'tanetique.

¹⁷ “Bin nax me yutsil te winic ya x'ac'bot tojtesel yu'un te Diose; ma me xap'aj te tojtesel yu'un te Mach'a Spisil ya xju' yu'une.

¹⁸ Teme ay ja' nix ya yac' ejch'ene, ja' nix me ya spots yan buelta; teme ta sc'ab ya xmajawane, ta sc'ab nix me ya xpoxtaybey.

¹⁹ Ta spisil ora ya scoltayat loq'uel a te bila chujc'ule, ma xyac' te ya staat te bitic amene.

²⁰ Ta yorail wi'nal, ya me smac'linat, jich me ma xyac' te ya xlajate; ta yorail guerra ya me scoltayat, jich me ma xlajat ta puñal.

²¹ Ya me scoltayat ta ixtac'optayel, ma ba ya xiwat te c'alal ya xtal te wocol te xiweltic sbae.

²² Ya me stse'enat ta yorail wi'nal, soc ta yorail te ya xtal lajinel, ma ba ya axi' te ja'mal chambalametique.

²³ Te tonetic ta aq'uinal ma ba ya smacat, lec me yo'tanic ta atojol te jti'awal chambalametique.

²⁴ Ya me x'esmaj abiluc ta ana, te c'alal ya awil te chambalametic awu'un, ts'acal me ya xc'o ata.

²⁵ Ya me xchicnaj bayal patil alnich'anetic awu'un, jich yipal te bit'il wamaletic te ayic ta q'uinale.

²⁶ Ay to awip a te c'alal ya xmamalubat, jichat me te bit'il jtom trigo te staoj syijil ta leque.

²⁷ Te bila jna'ojtic ja' ya yac' jnoptic te jich aye; aiya awaiy ta lec te bila la cale, paja soc awaiy, jich me ya ana' te jich aye —xi' te Elifaz.