Job 42 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —Te jo'one jna'oj te spisil ya xju' awu'une, soc te ma'yuc bila ma xju' awu'un spasele.

³ ¿Mach'a ya jcuy jba a te xchebet co'tan ta xch'uunel te awu'el ta canantaywaneje, te jich ya cac' ta na'el a te ma'yuc bila jna'oje? Ja' la cal te bila ma ba jna'oje, jelawen yutsil te bitic ma jna'bey swentaile.

⁴ Ja'at jich la awalbon: “Aiya awaiy, ya jc'an ya jc'oponat; sujt'esbon me te bitic ya jojc'obate”, xaat.

⁵ Te ayix tel ora, ja' nax la caiybat ac'oplal ta jchiquin, pero yo'tic ya quilatix ta jsit.

⁶ Ja' yu'un jc'axel me ya jsujt'esix co'tan, ya me jnajc'an jba ta tan soc ta ts'ubil lum —xi' te Job.

Cha'ac'bot xan sc'ulejal yu'un Dios te Job

⁷ Te c'alal jich la yal Cajwaltic ta stojol a te Job, jich la yalbey te Elifaz: “Mero ilinemon ta atojol soc nix ta stojol te yan cheb ajo'tac, melel ma la awalic te bila smelelil jc'oplale, jich te bit'il la spas stuquel te cabat Job.

⁸ Yo'tic ya me atsaquic juqueb toroetic soc juqueb tat chijetic. Baanic ta stojol te cabat Job, ac'aic ta scojt'ol chic'bil majt'anil ta jtojol yu'un awu'unic ja'ex. Te cabat Job ya me sc'oponon ta awentaic, ya me quich'bey ta wenta te sc'ope, jich ma'yuc bila amen ya cac' c'otuc ta atojolic, manchuc me jich ya sc'an pasel ta atojolic te jichuque, melel ma ja'uc la awalic te bila smelelil jc'oplale, jich te bit'il la spas stuquel te cabat Job —xi'.

⁹ Te Elifaz, Bildad soc Zofar la spasic te bila albotic yu'un te Cajwaltique. La yich'bey ta wenta te sc'op Job te Cajwaltique.

¹⁰ Te c'alal laj yo'tan te Job ta sc'oponbeyel Dios yu'un te sjo'taque, Dios cha'sujt'esbot xan te sc'ulejal te ay yu'un ta neelal to, soc cheb buelta xan c'axem la yac'bey a te bit'il ay yu'un ta neelal toe.

¹¹ Jich bajt' ta ula'tayel yu'un spisil te yermanotac winiquetic antsetic, soc te mach'atic jun yo'tan sba soque, ta spisil te mach'atic ya xna'bot sba yu'un ta namey tele. Ta comon la stsob sbaic ta we'el swenta q'uin ta sna te Job. La smuc'ubtesbeyic q'uinal yaiy: “Pajal c'ux la caiytic te wocol la sticunbat ta atojol te Cajwaltique”, xiic ta stojol. Ta juju-jtul la yac'beyic taq'uin soc jujun ch'ocowil oro.

¹² Ac'bot bayal bendición yu'un Dios te Job ta slajibalix bael te jayeb ja'wil cuxine. Bayal xan bitic esmaj yu'un a te bit'il ay yu'un ta neelal to, melel esmaj xan chanlajunmil (14,000) chijetic, wacmil (6,000) camelloetic, jmil (1,000) ta jchajp wacaxetic te ya sjoq'uic lum ta arado, soc jmil (1,000) me' burraetic.

¹³ Soc ayin xan juqueb ta jtul squerem-nich'nab soc oxeb yantsil-nich'nab.

¹⁴ Te wixile Jemima sbiil, te xchebale Cesia, te yoxebale Keren-hapuc sbiil.

¹⁵ Ma'yuc yan antsetic jich st'ujbilalic ta balumilal te bit'il te yantsil-nich'nab Job. Te yantsil-nich'nabe la yac'bey yu'unin jilel te jayeb bitic ay yu'une, jich nix la spasbey te squerem-nich'nabe, pajal la yac'bey.

^16-17 Te Job cuxin to xan jucwinic (140) ja'wil te c'alal c'axix yu'un a te wocole. Mero jal to cuxin ta balumilal, laj to yil te snich'nabe, te smamataque, te snich'nab te smamataque, soc te snich'nab te snich'nab smamataque. Patil laj bael.