Job 36 - Bible in Tzeltal de Oxchuc y Tenejapa

Xchanebal sc'op Eliú

¹ La yal xan Eliú, jich la yal:

² —Maliya jtebuc, ya me x'och jp'ijubtesat, melel te jo'one ay to bitic chapal cu'un ta swenta scoltayel ta c'op te Diose.

³ Yo'tic ya me cal te smuc'ul sp'ijil co'tane, swenta yu'un ya cac' ta na'el te yu'unix jich ya sc'an a te bit'il ya spas te jpaswanej cu'une.

⁴ Ya me ana' te ma lotiluc te bila ya cale; melel te teq'uelon ta atojole, p'ij co'tan soc ju'em cu'un.

⁵ “Te Diose spisil ya xju' yu'un soc mero muc' sp'ijil stuquel, soc ma ba ya yilay te mach'a ma'yuc smule.

⁶ Ma spasbey perdón xcuxlejal te mach'a amen yo'tane, pero toj bi ya spasbey stuquel te mach'a me'baetique.

⁷ Spisil ora ya scoltay stuquel te me'baetic te toj ya yac' sbaique; ya yac' najc'ajuc soc te muc' ajwaliletic, ya yac' toyuc sc'oplalic.

⁸ Pero teme ya yich'ic chuquel ta cadena, soc teme c'ux obol sbaic yu'un te xc'uxule,

⁹ Dios me ya x'ac'bot yilic yu'un te bila amen la spasique, soc te bit'il la yac' sbaic ta tsalel yu'un te toybaile.

¹⁰ Ya sc'opon swenta stojtesel, soc swenta yu'un ya yalbey te yacuc yijq'uitayic te sbolilique.

¹¹ Teme ya yich'ic ta muq'ue, teme ya yac' sbaic ta stojole, bin nax me yo'tanic soc bayal me yutsil q'uinal ya yaiyic te jayeb xan c'aal ya xcuxinique.

¹² Pero teme ma ba ya yich'ic ta muq'ue, tey ma'yuc bi sna'ojic a, ya xlajic soc ya xcoic bael ta muquenal ch'en.

¹³ —Te mach'atic amen yo'tanic bayal ya x'ilinic, soc manchuc me ayic ta chuquel, pero ma ba ya sc'anic coltayel.

¹⁴ Mero jch'ieletic to a ya xlajic; q'uexlaltic sba a ya xlaj bael.

¹⁵ Te Diose ta swenta swocol ya scoltay te mach'a ay swocole; ta swenta xc'uxul swocol ya yac'bey sna' bi swentail.

¹⁶ Ja' nix jich la scoltayat ta woclajel, la yac'bat bayal bi ya xtuun awu'un, soc la yac'at ta libre stuquel; la snojesbat ta bujts'anil we'eliletic ta amesa.

¹⁷ Te castigo yac ta c'oel ta awenta, ja' pajal soc te castigo yu'un te mach'a amen yo'tane, ma xju' awu'un smaquel, puersa me ya xc'ot ta awenta stojel.

¹⁸ Ma me xawac' aba ta lo'layel ta yich'el amen majt'anil taq'uin, ma me xawac' yu'uninbat awo'tan te bayal taq'uine.

¹⁹ Te c'alal ayat ta wocol a, ma'yuc bila ya xtuun awu'un, ni ja'uc te awawe, soc ni ja'uc te awipe.

²⁰ Ma me xajic' awo'tan yu'un te ya x'ochix ajc'ubal c'oem, te bi ora ya xch'ay bael te lumetique.

²¹ Tsajtaya me aba, ma me sujt'at ta spasel te bila amene, melel te ja'ate la awich'ix pasel prueba ta swenta te awocole.

²² “Ila awil te smuc'ul yu'el te Diose. Ma'yuc jtuluc maestro te pajal soque;

²³ ma'yuc mach'a ya x'albot yu'un te bila ya spase, soc ma'yuc mach'a ya xju' ya yalbey te ma ba leque.

²⁴ Ta spamal balumilal ya yalbeyic yutsil sc'oplal te bitic spasoje; soc ya me sc'an te ya ana' te ya awalbey yutsilal.

²⁵ Spisil ants-winiquetic ya xju' ya yilic, manchuc me ta c'ubul, pero ya me yilic.

²⁶ Te Diose mero muc' yu'el ta jyalel, ma xju' cu'untic sna'el te smuc'ule; soc ma xju' cu'untic yajtayel te ya'wilale.

²⁷ “Te Diose ja' ya stsob ta t'ulult'ul ta yawil te ja'e, ta patil ya sc'atp'un ta ja'al.

²⁸ Te ja'ale, xchajet ya xtal ta tocal, ta buen tulan ja'al ya xyal coel ta sba te ants-winiquetique.

²⁹ ¿Mach'a ya xju' yu'un sna'el bi yu'un ya xbeen te tocaletique, soc bi yu'un te tulan ya xc'opojic te bitic ya xt'om ta ch'ulchane?

³⁰ Te Diose ja' ya slim bael ta sba mar te tsantsewale, ya yac' mujc'uc jilel ta mero sc'ubulil te muc'ul mar.

³¹ Jich ya smac'lin te lumetique, mero bayal swe'elic ya yac'bey.

³² Xlemlajet ya sbeentes ta sc'ab stuquel te chawuque, te banti ya stojlin baele, tey nix ya xc'ot a, jich te bit'il spasoj mandale.

³³ Te sc'op chawuc, ja' ya yalbey sc'oplal te Diose, te tulan yic'al ja'ale, ja' ya yalbey sc'oplal te yilimbae.