Biblia Todo Logo
Bìoball air-loidhne

- Sanasan -

Job 34 - Bible in Tzeltal de Oxchuc y Tenejapa


Xchebal sc'op Eliú

1 La yal xan te Eliú, jich la yal:

2 —Ja'ex te p'ijexe, soc te nojptesbilexe, aiybon awaiyic te jc'ope.

3 Te jchiquintic ya sna' stsajtayel te c'opetique, jich nix te bit'il quetic ya sna' te bila ay sbujts'e.

4 Ja' nix jich ya sc'an ya jtsajtaytic bit'il ay swentail te bila aye, ja' me ya sc'an ya jnoptic te banti toj ya caiytique.

5 Te jtatic Job jich ya yal ta jamal: “Ma'yuc bila amen jpasoj; pero te Diose ma sc'an ya xchajban ta stojil.

6 Lot me ya xc'ot teme ya cal te ay jmule; ma ba ya xlecub te quejch'ene, manchuc me ma'yuc bila jmulinej”, te xie.

7 —Ma'yuc mach'a jich te bit'il te jtatic Job. C'ax bayal ya slaban te Diose, jich te bit'il mach'a taquin yo'tane, bayal ya yuch' te ja'e.

8 Ya smulan te ya stsob sba soc te mach'atic amen yo'tanique, soc ya smulan te ja' ya sjoin te mach'atic ma ba lequique.

9 Ya yal te ma'yuc bila ya sta a te winic teme ya yac' puersa te ja'uc lec sc'oplal yu'un te Diose.

10 Pero ja'ex te ay ap'ijilique, aiybon me awaiyic jc'op. Ma me xcal ta co'tantic te ya spas te bila amen soc te bila ma stojiluc te Dios te Spisil ya xju' yu'une.

11 Te Dios ja' nix ya yac'bey stoj ta juju-jtul te bi yilel te yat'elique; ja' nix ya yac'bey ta swenta te bi snujp' ya xc'ot te yat'elique.

12 Ta mero melel, te Diose, ja' te Spisil ya xju' yu'une, ma'yuc ya spas te bila amene, stalel toj yo'tan stuquel;

13 ma'yuc mach'a ac'bot yat'el yu'un ta swentainel ta swolol te balumilale.

14-15 Teme ya spojbey xcuxlejalic te ants-winiquetique, pajal me ya xlajic ta spisilic, ya me xcha'sutp'ejic xan ta ts'ubil lum yan buelta.

16 “Teme ay lec snopjibal awu'une, aiybon awaiy te jc'ope, aiya me awaiy ta lec jiche.

17 Teme ya yilay te toj-o'tanil te Diose, ma ba ya xju' ya xwentainwan te jichuque. ¿Ya bal alebey smul te Mach'a mero stalel toj yo'tan stuquele?

18 Teme ja' amen te muc' ajwaliletic soc teme ja' amen te mach'atic bayal sc'oplale, te Diose ma ba wocol ya yalbey ta sitic.

19 Te Dios ma yanuc sc'oplal yu'un a te mach'atic ochemic ta ajwalil, ma ja'uc toyol sc'oplal yu'un te mach'atic ay sc'ulejalique, soc ma ja'uc peq'uel sc'oplal yu'un te mach'atic ma'yuc sc'ulejalique, melel ja' la spas ta spisilic stuquel.

20 Te ants-winiquetic ya xlajic ta ora nax, ya xlajic ta olil ajc'ubal; ya xjajch' c'op yu'unic soc ya xch'ayic bael ta q'uinal; te mach'a ay yu'ele, ma ta swentauc ants-winiqueticya xch'ay bael stuquel.

21 Dios ya yil te banti ya xbeen te ants-winique, soc ya sna'bey spisil te bit'il ya xbeene.

22 Ma'yuc ijc' q'uinal te mero ijc', te ya xju' ya xmacot yu'un te mach'a amen yat'ele.

23 Te Diose ma ba ya yalbey bi ora ya yic' ta stojol swenta yilel yat'elic te ants-winique.

24 Te Diose ma puersauc te ya sjac'bey te bitic spasoj te ya spejc'anbey sc'oplal te mach'atic muc' sc'oplale, swenta yu'un ya yac'bey yan sjelol ta yawil.

25 Te Diose yiloj te bi ya spas te ants-winique, ta ajc'ubal ya xc'ot, ya sjin ta jc'axel.

26 Ya yac'bey tulan majel ta comonsitil,

27 melel ma ba la sc'an st'unic te sbelal te bit'il ya sc'an ya xcuxinotique.

28 Ja' ta swentaic te awunic ta stojol Dios te me'baetique, soc nix te mach'atic ay swocolic ta uts'inele, jich aiybot sc'opic yu'un Dios.

29 Pero teme ma xc'opoj yu'un te Diose, ¿mach'a ya xju' yu'un ya yalbey smul te j'uts'inwaneje? Teme ya snac' yelaw te Diose, ¿mach'a ya yilbey te smule? Ja' stuquel ya yil lumetic soc juju-jtul ants-winiquetic,

30 swenta yu'un ma me ja'uc ya x'och ta ajwalil ta stojol te lum te mach'a amen yo'tan te ya xlo'laywane.

31 “¿Ay bal jich la awalbeyix te Diose: “La cac' jba ta lo'layel; pero ma ba ya jleix jmul yan buelta.

32 Ac'bon quil te faltaetic te ma ba ya quil te jo'one. Teme amen te cat'el te jo'one, ma ba ya jpasix yan buelta”, xaat bal ta stojol?

33 ¿Yu'un bal ya ac'an te Dios ya yac'bat stojol ac'abe, chican bi ya sc'an te awo'tane, manchuc me ach'ayoj ta awo'tan te Diose? Melel ja'at ya sc'an te ya awale, ma jo'ucon te ay bi ya cale, ja' la caiy te bi ana'oje.

34 “Te mach'atic ay sp'ijil yo'tanic te ya yaiybonic te jc'ope, soc spisil te mach'atic ya sna'ic q'uinal ta leque, jich me ya yalbonic:

35 “Te Job ma sna' te bi yac ta yalele; te sc'ope ma'yuc swentail.

36 Ac'a stsajtay yaiy ta lec te Job, melel te sc'ope, ja' sc'op te mach'a amen yo'tane.

37 Ma ja'uc nax te ay smul te Job, stoyoj to xan sba ta stojol a te Diose; ta jcomonsitic ya slaban te Diose, ya x'och slebey yan sujt'ib stuquel”, xiic me —xi' te Eliú.

Biblia en Tzeltal de Oxchuc y Tenejapa © Sociedad Bíblica de México, A.C., 2001.

Bible Society of Mexico
Lean sinn:



Sanasan