Job 33 - Bible in Tzeltal de Oxchuc y Tenejapa

¹ “Jich yu'un, tatic Job, aiybon me awaiy te jc'ope; mero ja' me xawac' achiquin a te bila ya calbate.

² Ayix ta que ya caiy te sujt'ib te ac'ope:

³ ya me xc'opojon ta spisil co'tan soc ya me cal ta jamal te bi ya yal te co'tane.

⁴ Te Dios te Spisil ya xju' yu'un, la spason, la yac'bon jch'ulel soc la yac'bon quich' ic'.

⁵ “Ya me ajac'bon te jc'op teme ya xju' awu'une, tatic Job; chajbana aba swenta yu'un ya me x'ayanotic.

⁶ Te ja'ate, soc te jo'one, pajal me quileltic ta stojol te Diose; pajal quich'ojtic pasel ta ts'ubil lum.

⁷ Ja' yu'un ma me xiwat ta jtojol, melel ma me yu'unuc ya cac' jba ta ich'el ta muc' awu'un.

⁸ “Pero ay jich la awal la caiy (jich ay la caiy te c'ope):

⁹ “Mero lecon, ma'yuc bila amen jpasoj, ma'yuc falta jtaoj, ni ma'yuc jmul jtaoj.

¹⁰ Pero Dios ya sle bi ya yac'bon jmulin, jichon ta stojol te bit'il scontro;

¹¹ la yac'bonix cadena ta cacan, soc ya yilon te bit'il ya xbeenon”, xaat la caiy.

¹² “Pero te bila la awale, ma jichuc ya sc'an alel, melel te Diose mero muc' stuquel, ma pajaluc soc ants-winiquetic.

¹³ ¿Bi yu'un jich ya awalbey ta stojol te ma ba ya yich'bat ta wenta te yiptajib awu'un te ac'ope?

¹⁴ Te Diose bayal banti ya sc'oponotic, pero ma ba ya xc'ot ta co'tantic.

¹⁵ Ay ya sc'oponotic ta ajc'ubal ta jwaichtic, soc ay bila ya yac'botic quiltic ta jsitic te c'alal ya x'och jwayeltic, te c'alal mero c'ubenix jwayeltic ae.

¹⁶ Te ants-winique, Dios ya xc'opoj ta xchiquin, ya spas ta mandal, soc bayal ya xiwtes

¹⁷ swenta yu'un ya yac'bey yijq'uitay te sbol at'elique, soc swenta yu'un ya yac'bey sna' te ma lecuc te toybaile.

¹⁸ Jich ya scoltay te ma xbajt' ta muquenale, jich ya scoltay te ma xbajt' ta swenta lajele.

¹⁹ Ta yan buelta, Dios ya stojtes ta swenta chamel te ants-winique, ya yac'bey sna'ic q'uinal ta swenta bit'il ya yac'bey c'uxubuc scojt'ol sbaq'uetal.

²⁰ Spisil we'eliletic, manchuc me buen bujts'anic, pero ma me xmalix ya yaiy.

²¹ Te sbaq'uetale ya me xc'un ts'uj bael, asta ya xchicnaj ta ilel te sbaquele.

²² Te xcuxlejal ya me xc'ot ta sti'il te muquenale, ya me xc'ot ta sti' te lajele.

²³ “Pero teme nopol ay ta sts'eel jtul ch'ul abat, manchuc me ay jmil te ya scontroc'optay, teme “Lec ay”, teme xi' sc'oplal yu'un te jtule, soc teme ya yal ta jamal te toj te yat'ele,

²⁴ te yacuc sna'bey yo'bolil sba, teme jich ya yalbey yaiy te Diose: “Coltaya ta lajel, melel la jtabeyix te scolele”, te xiuque,

²⁵ jich to me ya xcha'lecub xan a te sbaq'uetale, jich me ya xc'ot xan te bit'il querem.

²⁶ Jich me ya yal wocol ta stojol Dios, jich me ya stsacbot sc'op yu'un; bayal me yutsil q'uinal ya yaiy a ya yilbey sit te Diose, ya me sc'ajintabey yaiy ants-winiquetic te yutsil yo'tan te Diose.

²⁷ Jich me ya yal ta c'ayoj: “La jta jmul, la jpas te bila ma stojiluc, pero Dios ma ba la sc'an la yac'bon castigo yu'un stuquel;

²⁸ la to scoltayon ta sc'ab te lajele, jich ya to xju' ya quil xan te saquil q'uinale”, xi' me.

²⁹ “Te Dios ay jich ya spasbey jun cheb buelta te ants-winique;

³⁰ ya scoltay ta sc'ab te lajel, ya yac'bey xan yil te saquil q'uinale.

³¹ “Tatic Job, aiybon me awaiy ta lec te jc'ope; ma me xc'opojat te c'alal yacon ta c'ope.

³² Teme ay bila ya ac'an ya awale, c'opojan me, teme jich ya sc'an alel te bila ya awale, bin nax me co'tan ya cac'at ta c'op.

³³ Pero teme ma'uque, ja' lec ya me awaiybon te jc'ope, ma me xc'opojat jiche, jo'on me ya cac'bat anop te p'ijil-o'tanile —xi' te Eliú.