Job 30 - Bible in Tzeltal de Oxchuc y Tenejapa

¹ “Pero yo'tic ay mach'atic ya stse'luyonic, ja' te jch'iel winiquetic te peq'uel ya'wilalic cu'une, ja' snich'nab te mach'atic ni ja'uc ju' te la cac'bey sjoinic te ts'i'etic la scanantaybon te chambalametic cu'une.

² ¿Bi tuun cu'un a te yip sc'abique? Ja'ic te mero ma'yuc yipique

³ ta scaj bayal wi'nal soc te ma'yuc bi ya xwejt' yu'unique. Ta ajc'ubal, te c'alal stuquel ayic ta jochol taquin q'uinal a, la snul taquin yisim te'etic;

⁴ la sbulic ch'aal wamaletic ta pimil q'uinal te ma xtuune, asta la swe'elinic yisim retama-te'etic.

⁵ Yich'ojic ch'ayel ta o'tanil yu'un ants-winiquetic, tenbilic ta awtayel jichuc j'eleq'uetic;

⁶ puersa nainic ta nailch'entiquil, nainic ta yanil jemel soc ta yanil ch'entiquil;

⁷ x'awlajanic ta aw ta yolil te'etic, ya stsob sbaic ta yanil ch'ixtiquil.

⁸ Ma'yuc sc'oplalic, ma ba chican bay sme'-static, ma snujp'in te ya xnainic ta jlumaltique.

⁹ “Pero yo'tic ya slabanonic, ya xchajbanic jontol tse'luyel c'op ta jtojol.

¹⁰ Ya yilayonic, ya sq'uej sbaic ta jtojol, asta ya stubtaybonic quelaw.

¹¹ Ta ora in to ma'yuquix quip soc pejc'ajemonix, ma xyich'oniquix ta muc'.

¹² Bayal mach'atic ya stsob sbaic ta jxujc', ya syalesonic, ya smaconic, ya sleic bi ya yut ya smilonic.

¹³ Ya smacbonic jbe, yu'un ya sc'an ya smilonic, ma'yuc mach'a ya xcomotic yu'un.

¹⁴ Jich c'oem te bit'il ay lomen te sjoyob ts'ajc'ul te lume, tey ya xwilic tel ta jtojol ta spisil yipic.

¹⁵ Te tulan xiwel yal tel ta jtojol; te yutsil jc'oplal bajt' ta anel jichuc ic'; te jc'ulejale bajt' jichuc tocal.

¹⁶ “Ma jc'anix te cuxulon, la yu'uninonix te xc'uxul mel-o'tane.

¹⁷ Te xc'uxule ya xc'otix c'alal ta jbaquel; buen tulan wocol ya yac'bon ta spisil ora ta jujun ajc'ubal.

¹⁸ Te Dios la stsaconix ta jnuc' c'oem, spisil yip ya slilinbon te jc'u'e.

¹⁹ La xch'ojonix bael ta ajch'aleltic, jichuc ts'ubil lum soc tan.

²⁰ “Dios cu'un, ya jc'anbat coltayel, pero ma ba ya ajac'bon te jc'ope, ya calbat wocol, pero ma ba ya awich'bon ta wenta.

²¹ Mero tulan awac'ojix aba ta jtojol, mero spisil awip ya anutson.

²² La awac' syaleson te iq'ue, soc la awac' sliculayon te tulan yic'al ja'ale.

²³ Ya jna'ix te ya ac'an ya awaq'uix lajucone, ja' te banti chapal sc'oplal ya xc'ot spisil te bitic cuxajtique.

²⁴ ¿Yu'un bal ma ba jcoltayej te me'bae, yu'un bal ma ba la jcoltay te c'alal ay swocol ae?

²⁵ ¿Yu'un bal ma ba oc'on yu'un te mach'a ay yo'bolil sba, soc ma bal lajuc jc'uxtay te mach'a ma'yuc bi ay yu'une?

²⁶ Te jo'one yacon ta smaliyel te bila t'ujbil ya xtal ta jtojol, pero ja' tal te bila ma t'ujbiluque; ja' yacon ta sna'el te saquil q'uinal, pero ja' tal ta jtojol te ijc' q'uinale.

²⁷ Spisil ora yac ta woclajel te co'tane; yorailix mel-o'tan ta jtojol.

²⁸ Puro mel-o'tan ayon te cuxulone, ma'yuc xojobil c'aal ta jtojol c'oem; yacon ta sc'anel coltayel ta stojol ta spisilic te ants-winiquetique.

²⁹ Ja' pajalonix soc te ja'mal ts'i'etic, soc ja' pajalonix soc te avestruz-mutetique.

³⁰ Ijc'ubenix te jnujc'ulele, ya xtilix yu'un c'ajc' ya caiy te jbaq'uetale.

³¹ Te música yu'un te arpaetic soc te música yu'un te amayetique, sutp'ejix ta xc'uxul oq'uel ta jtojol.