Job 3 - Bible in Tzeltal de Oxchuc y Tenejapa

Job c'opoj yu'un swocol

^1-2 Ta slajibal jajch' ta c'op te Job, la sp'aj te bi c'aalil ayin ta q'uinal, jich la yal:

³ —Mero boloben sc'oplal te ajc'ubal te bi ora chicnajon ta ch'ujt'ule. Mero boloben sc'oplal te bi c'aalil ayinon ta q'uinale.

⁴ Ayuc bit'il c'atp'uj ta ajc'ubal te c'aale, soc te manchuc la yich' ta wenta te Diose, ma ba sacub q'uinal te jichuque.

⁵ Ayuc bit'il tal buen pimil axinal te ijc'ubtesot yu'une, o ijc'al tocal te potsot yu'une, o ja'uc majc' sit c'aal a te ya yac' xiwel te jichuque.

⁶ Ayuc bit'il ch'ay bael ta yijc'al q'uinal te ajc'ubale, soc manchuc ya yich' ajtayel te c'aale, manchuc ya yich' ajtayel te yajtalul uetic soc te ja'wiletique.

⁷ Ayuc bit'il ma'yuc bi chicnaj a te ajc'ubale, te ma'yuc mach'a ya x'awun yu'un yutsil q'uinal yaiye.

⁸ Ayuc bit'il la sbolc'optayic a te j'ac'-chameletique, te ay yipic ta stojol te Leviatán.

⁹ Ayuc bit'il ma ba la yac' xojobil te sacubel q'uinal eq'uetique, soc te manchuc taluc te luz la yich' maliyele, soc te ma ba la yich' ilel te sacubel q'uinal te jichuque.

¹⁰ Mero boloben sc'oplal te ajc'ubal te c'alal chicnajone; ma ba ayon ta bayal wocol ta ora to te manchuc ayinone.

¹¹ ¿Bi yu'un ma ba lajon ta xch'ujt' te jme'e, soc bi yu'un ma orauc lajon te c'alal ayinon ta q'uinale?

¹² ¿Bistuc te ay mach'a la speton ta yacan te c'alal ayinone? ¿Bistuc te ay mach'a la xchu'untesone?

¹³ Te lajucon ta yoraile, jun co'tan wayalonix, lamal q'uinal ya caiy te jichuque,

¹⁴ soc joinejix ta muquenal te muc' ajwaliletic, soc joinejix te mach'atic ay ta ajwalil soque, te la spasic smuquenalic ta toyol ts'ajc'ubil te tonetique,

¹⁵ o ja' te ajwaliletic la snojes snaic ta oro soc ta plata te jichuque.

¹⁶ ¿Bi yu'un ma ba la smuconic jich bit'il te jc'axem-alale, soc jich te bit'il alaletic ya xlajic te c'alal ma to x'ayinique?

¹⁷ Ta muquenal ay slajibal te mach'atic j'amen-o'tanetique; soc mach'atic lubenic tey ya xc'o staic cux-o'tan a;

¹⁸ tey ya xc'o staic lamal q'uinal a te mach'atic ochemic ta chuquele, soc tey ma ba ya yaiybeyiquix sc'op a te jsujawetic ta at'ele;

¹⁹ te ayiquix a te muc'-biq'uit pajal sc'oplalic; te mosoetique ya x'ainiquix ta libre, ma ba ya smozoinotiquix yu'un yajwalic.

²⁰ “¿Bi yu'un te Dios ya yac'bey yil saquil q'uinal te mach'a ay swocole? ¿Bi yu'un te ya yac' cuxinuc te mach'a c'ux obol sba ya yile?

²¹ Te mach'a ya smaliy te lajele, ma ba ya xjul ta stojol stuquel, manchuc me c'axem jich ya sle a te bit'il nac'bil c'ulejalile.

²² Ja' to ya sta sbujts' yo'tan a te winic teme c'ot yorail te ya xco bael ta muquenale.

²³ ¿Bistuc te ac'bot xcuxlejal te winic te ma sna' te ba ya xbajt'e? Melel ja' nix Dios ya xmacbot sbe yu'un.

²⁴ “Ja' jwe'elix c'oem te jic'jic'-o'tanile; te cuch'bale ja' te xc'uxul te ajc'ane.

²⁵ Spisil te bitic jxi'oj soc te bayal ya yac'bon xiwele, ja' c'oemix ta jwenta.

²⁶ Ma'yuc ya jcux co'tan soc ma'yuc yutsil q'uinal ta jtojol, ma'yuc lamal q'uinal ya caiy, ja' nax spisil ora puro mel-o'tan ayon —xi' te Job.