Job 27 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —Ya calbey ta jamal te Dios te Spisil ya xju' yu'une, ja' te ma sc'an xchajbanon ta stojil soc te bayal jwocol yu'une,

³ te jayeb xan c'aal te yac'ojbon quip ta yich'el ic',

⁴ ma'yuc bi ora ya cal lotil c'op, soc ma ba ya caiy jlo'laywanej.

⁵ Te jayeb c'aal cuxulon, ya me jpas tulan ta yalel te ma'yuc bi amen jpasoje; ma xcac' permiso te ya atojol-lebonic jmule.

⁶ Ma ba ya jquejch'an yalel te toj ayon, melel ma'yuc bi ya stijbon ta c'op ya caiy te co'tane.

⁷ “Spisil te mach'atic ya scontroinonic, ac'a me yich' castigo jich bit'il ya x'ac'bot te mach'atic ma lecuc yo'tanic soc te ma tojuc yo'tanique.

⁸ ¿Bitic xan ya smaliy te mach'a amen yo'tan te c'alal ya xpojbot xcuxlejal yu'un te Diose?

⁹ Te bi ora ya sta swocolic, ma ba ya x'ich'bot ta wenta yu'un Dios teme ya yalbey wocole.

¹⁰ Melel ma ba ya sle yutsil q'uinal yaiy stuquel ta stojol te Mach'a Spisil ya xju' yu'une, soc ni ayuc bi ora ya yalbey wocol.

¹¹ “Ja'ex ya me cac'beyex awilic te smuc'ul yu'el te Diose, te bitic chapal yu'un te Mach'a Spisil ya xju' yu'une.

¹² Teme apisilic la awiliquix, ¿bi yu'un ya awalic te ma jichuc swentaile? —xi' te Job.

Sc'op Zofar:

¹³ Te Dios te Spisil ya xju' yu'une, ja' me castigo ya yac'bey te mach'atic mero tulan ya yac' sbaique, soc te mero amen te yo'tanique.

¹⁴ Manchuc me mero tsobol te snich'nab, pero ya me xlajic ta guerra, o ya me xlajic ta wi'nal ta scaj te ma sta swe'elique.

¹⁵ Te jayeb xan cuxul ya xjil ya me xmilotic yu'un chamel; te me'ba antsetic yu'unic ma ba ya x'oq'uetayotic yu'un.

¹⁶ “Te mach'a ma lecuc yo'tan manchuc me ya sbusan bayal plata, jich te bit'il ya yich' busanel lum, soc manchuc me ay bayal sc'u'-spac',

¹⁷ pero ja' me ya slap te c'u'il-pac'al te winic te ay yutsil yo'tane, soc ta plata ja' me ya xc'ot ta swenta te mach'a toj yo'tane.

¹⁸ Te sna te mach'a ma lecuc yo'tan, ya nax me xwuy, ja' pajal soc te spechech ja'mal mute, jich nax te bit'il slejchepat na te mach'a ya scanantay c'altique.

¹⁹ Jc'ulej a te ya xwaye, pero ta slajibal, te c'alal ya xjajch' ta wayel, ma me ayuc bi ayix yu'un a.

²⁰ Te tulan xiwel ya me xjul ta stojol ta c'aaleltic, te tulan chawuquil ja'ale ta ajc'ubal me ya xlicot bael yu'un.

²¹ Te buen tulan ic' ya xtal ta stojol sloq'uib c'aal, ya me xc'ax ta liquel sna yu'un;

²² mero tulan me ya xtenot yu'un, manchuc me ya sc'an ya scoltay sba.

²³ Ya me xnutsot yu'un te iq'ue, bayal me yip, soc xpumet me sc'op ya xnutsot yu'un, —xi' te Zofar.