Job 24 - Bible in Tzeltal de Oxchuc y Tenejapa

¹ “¿Bi yu'un te ma xyac' ta na'el te bi c'aalil ya yac' castigo te Mach'a Spisil ya xju' yu'une, swenta yu'un ya xju' ya yilic a te mach'atic jun yo'tan sba soque?

² Te mach'atic amen yo'tanic ya sjeltaybeyic yawil te mojonetique, ya yelc'anic chijetic yu'un ya yesmantes a te chijetic yu'une,

³ ya spojbey xchamsbalamic te me'ba alaletic, ya spojbey xchamsbalamic te me'ba antsetique.

⁴ Parte la yac'bey yac' sbaic ta be te mach'atic me'baetique; te mach'atic peq'uelic, puersa me ya snac' sbaic yu'un.

⁵ Te me'baetic, jichic bit'il ja'mal burroetic ta jochol taquin q'uinale, ay swocolic ya xloc' sle swe'elic, ta taquin q'uinal ya stabey swe'el te yal-snich'nabique.

⁶ Ya xba sleic ta bay jilem trigo ta yan c'alc'altic, o ya xba sle banti jilem ts'usub ta sts'usubiltic te mach'atic amen yo'tanic.

⁷ Ma'yuc smujq'uilic a ya xc'ax ajc'ubal, ma'yuc bi ya scoltay sbaic yu'un a te sique.

⁸ Te ja'al ta witstiquil ya x'ajch'esotic yu'un, te muc'ul tonetic ya spetic ta scaj sleel smujq'uilic.

⁹ Ya spojbeyic yal te me'ba antsetic te ayinelic to, ya sc'anbeyic ta prendal te yalic te me'baetique.

¹⁰ Te me'baetic ma'yuquix lec sc'u'-spaq'uic, manchuc me scuchojic trigo, pero lajeliquix ta wi'nal.

¹¹ Ya stijbey te stonil cha', yu'un tey ya sloq'uesic a te aceite, ya st'usic ta teq'uel te ts'usube, yu'un tey ya sloq'uesic a te vino, pero lajeliquix ta taquinti'il.

¹² C'ubul to ay te lume te mach'atic ya x'oq'uic, ya x'ajc'anajic soc yacaliquix ta lajel ya yaiy, pero ma x'aiybotic yu'un Dios te ya yalbeyic wocole.

¹³ “Ay mach'atic ya yilayic te saquil q'uinale, ta spisil ora ma ba ya st'unic te lequil be yu'une.

¹⁴ Te milawal buen sab ya xjajch', yu'un ya xba smil te me'ba, ta ajc'ubal ya xc'atp'uj ta j'elec'.

¹⁵ Te j'antsiwej ya smaliy ya x'ijc'ub q'uinal soc ya smac ta lec yelaw, jich ya yal: “Jich ma'yuc mach'a ya yilon a”, xi'.

¹⁶ Te j'elec' ya yochintay naetic ta ajc'ubal. Spisilic ya smac sbaic ta na ta c'aaleltic; ja' mero scontroic te saquil q'uinale.

¹⁷ Te luz yu'un te c'aaleltic mero pimil ijc' q'uinal c'oem yu'unic; ja' lec ta yo'tanic sbolil te ajc'ubale, xi' te Job.

Sc'op Zofar:

¹⁸ —Te mach'a ma lecuc yo'tan ya me xlicot bael yu'un ja'. Te q'uinaletic yu'un, boloben me ya xjil, ma'yuquix mach'a ya x'at'ej ta sts'usubil.

¹⁹ Ta scaj sq'uixnal te q'uinale, te toib ya x'ulub ta jc'axel; te jmulawil, ta muquenal ya xch'ay bael.

²⁰ Ya me xch'ay ta o'tanil yu'un te mero sme'e; ya me xti'ot ta yalja, ma'yuc mach'a ya xna'otix yu'un. Te mach'a amen yo'tane jich me ya xyal ta lum te bit'il ya xyal ta lum te ts'etbil te'e.

²¹ Mero tulan la yac' sba ta stojol te antsetic ma'yuc yal, soc nix te me'ba antsetique ma'yuc bi ora la scoltay.

²² Pero ta swenta yip te Diose, ya me sjin te mach'atic tulan yac'oj sbaique; te c'alal ya xjajch' ta at'el te Diose ma'yuc mach'a stalel ay te xcuxlejale.

²³ Dios ya yac' cuxinuc, pero yacalic ta ilel yu'un te bit'il ya xbeenique.

²⁴ Te mach'a amen yo'tan ma ba jal c'aal ya xcuxin, ora nax ya xch'ay bael. Ya sayub jichuc bulbil wamal, jich te bit'il ya xpux sba coel te trigo.

²⁵ Teme ma jichuc te bit'il ya cale, ¿mach'a ya xju' ya yalbon ta jamal te jowejemon ta c'ope? —xi' te Zofar.