Job 23 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —Yo'tic ya to me xc'opojon xan ta yalel te xc'uxul te jwocole, melel te Diose yac'oj tel yalal sc'ab ta jtojol.

³ Ayuc nix bit'il ya jna' banti ya xju' ya jta te Diose, ayuc bit'il ya jta c'oel te banti ay stuquele.

⁴ Ya me xc'o calbey yaiy te bila ay ta jwenta, melel te jo'on ay bayal bitic ya xju' ya calbey.

⁵ Ya jna'ix te bila ya calbey ta sujt'esel te bi ya yalbon te jichuque.

⁶ Pero te Diose ma ja'uc ya stenon te yip, ya me yaiybon stuquel te jc'ope,

⁷ ya sna' te melel te bila ya cale; ya me yalon ta jamal te ma'yuc bila amen jpasoj, ya me yac'on ta libre sbajt'el q'uinal.

⁸ Pero te Diose, ya jle ta stojol sloq'uib c'aal, ma ba tey ay a; ya jle ta stojol smalib c'aal, ja' nix jich, ma ba ya jta tey a.

⁹ Ya xboon ta stojol norte, ma ba chican ta ilel tey a; ya xboon ta stojol sur, ja' nix jich ma ba chican.

¹⁰ Spisil yiloj te juju-jtejc' ya xbeenone; ya spason ta prueba, pero mero lec me ya xloc'on, jich me ya xloc'on yu'un te bit'il mero lequil oro.

¹¹ Te jo'one spisil ora ja' jt'unojbey te be yac'ojbon quil te Diose, ma'yuc bi ora jowejemon tey a.

¹² Spisil ora ja' ya jch'uunbey te sc'ope, ma ja'uc ya jpas te bila ya sc'an co'tan ta jtuquel naxe.

¹³ Te bi ora ya sc'an ya spase, ya spas; ma'yuc bi ya xju' ya xcomot yu'un.

¹⁴ Te bila chapal yu'un ya spasbon ta jtojole, puersa me ya spas, soc ay to xan yantic pajal soc a.

¹⁵ Ja' yu'un mero bayal ya jxi' ya caiy; te c'alal ya jna', bayal xiwel ya xtal ta co'tan yu'un.

¹⁶ Ja' te Dios Spisil ya xju' yu'un, te yac'ojbon xiwel ta co'tane.

¹⁷ Ayuc nix bit'il ya xch'ayonix bael ta yijc'al q'uinal, ayuc nix bit'il ya spotsonix bael.