Job 21 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —Te bi ya xju' ya xmuc'ub q'uinal ya caiy awu'unic a, ja' te yacuc awaiybonic te jc'ope.

³ Maliybon awaiyic te bila ya cale, patil tse'enanic, teme ya ac'anique.

⁴ “Te c'op cu'une, ma ja'uc ta stojol winic; ja' yu'un mero ma xjunaj te co'tane.

⁵ Teme ya awaiybonic ta lec te jc'ope, ya me xmajc' aweic yu'un xiwel.

⁶ C'alal ya jna' ta co'tan, ya xiwon yu'un, jc'axel ya xlaj quip, soc ya xnijc' te jbaq'uetale.

⁷ ¿Bi yu'un te ya to xcuxinic te mach'atic amen yo'tanic, soc te ay to yipic soc sc'ulejalic te c'alal ya xmamalubique?

⁸ Ya to yilic ya xmuc'ub te snich'nabic, soc te smamataque, te bin nax yo'tanic, soc jun yo'tanic ta sts'eelique.

⁹ Lamal q'uinal ta snaic, ma'yuc bila amen ya xchicnaj tel swenta sjinelic; Dios ma ba ya x'ac'botic swocolic yu'un.

¹⁰ Spisil ora ya x'alaj te xchamsbalamic; ma'yuc bay amen ya x'alajic.

¹¹ Te yal-snich'anic ya xtajinic soc ya x'animajic jichuc alal chijetic,

¹² Bin nax yo'tanic ya xwilic soc ya x'ochic ta ajc'ot ta swenta sc'op arpa, c'ayob soc amay.

¹³ Jich bayal bila ay yu'unic a ya xlajic bael ta q'uinal; bin nax yo'tanic ya xcoic bael ta muquenal ch'en.

¹⁴ Jich ya yalbeyic ta stojol Dios: “¡Ac'botic lamal q'uinal, ijq'uitayawotic, ma jc'antic snopel te mandaliletic awu'une!

¹⁵ ¿Mach'a a te Spisil ya xju' yu'un te ya sc'an ya cac' jbajtic ta abatinel yu'une? ¿Bi ya jtatic a te ya jc'opontique?”, xiic.

¹⁶ (Pero te mach'atic amen yo'tanic ma ja'uc yu'unic te yutsil q'uinal ya yaiyique. Mero ma jichuc co'tan jo'on te bit'il yo'tanique.)

¹⁷ “¿Ay bal bi ora tup'en sc'ajq'uic c'oem te mach'atic amenique? ¿Bi ora yalem tel wocol ta stojolic? ¿Bi ora ilin Dios ta stojolic te ac'bot swocolic yu'une?

¹⁸ ¿Ay bal bi ora ya yich'ic puquel bael jichuc taquin ac yu'un yip te sutu-iq'ue?

¹⁹ Ay ta alel te Dios ya yac'bey stoj yal-snich'nab te smul te sme'-state. Pero te ya cale ja' nix te mach'atic amen yo'tanic te ay ta swentaic stojel ta tulan castigo te smulique.

²⁰ Ja' ni me ya xc'ot ta swenta te castigo yu'un te yilimba te Mach'a Spisil ya xju' yu'une.

²¹ ¿Ay bal ta yo'tan te bila ya xc'ot ta swenta te mach'atic ay yu'un teme lajix stuquele?

²² (Pero ¿ay bal mach'a ya xju' yu'un ya sp'ijubtes jiche te Diose, te bit'il ja' ya yilbey yat'elic stuquel te mach'atic ayic ta ch'ulchane?)

^23-24 “Ay mach'atic bayal to yipic, buen lec ayic, soc bin nax yo'tanic, bayal sbiluquic, ma'yuc xchamelic a te ya xc'ot yorail te ya xlajique.

²⁵ Pero ay yantic, te ma'yuc sbujts' q'uinal ya yaiyic ya xcuxinic ta balumilal, jich ayic a te ya xlajic, jich ma smulanic a te yutsil ainel ta q'uinale.

²⁶ Pero ta muquenal ch'en spisilic pajal yilelic ya xc'otic; ta spisilic pajal ya xlajinotic ta yalja.

²⁷ “Ya jna' te bila anopoj ta awo'tanic, soc te bila chapal awu'unic ta jtojole.

²⁸ Ya ajojc'obey abaic: “¿Banti ay sna te mach'a ma lecuc yo'tan te tulan yac'oj sbae?” xaex cu'un.

²⁹ ¿Ma bal ayuc c'opojemex soc te mach'atic yacalic ta beele? ¿Ma bal ayuc x'awaiyic te bitic ya yalique:

³⁰ “Te c'alal ya x'ilin te Diose, ya sticun tel woclajel; yan te mach'atic ma lecuc yo'tanic ma'yuc bi ya xc'ot ta swenta stuquelic”, te xiique?

³¹ Ma'yuc mach'a ya x'albot ta sit yu'un te bi yilel yat'el, ma'yuc mach'a ya x'ac'bot stoj te bila amen spasoje.

^32-33 Te bi ora ya sta yorail te ya x'ic'ot bael ta muquel, ya sjoinic bael, yantic patil ayic, soc yantic ya xneelajic, ya slaman sbaic ta scanantayel teme c'ot ta muquenal ch'en, soc asta c'un ya yaiy te lume.

³⁴ “Ma'yuc swentail te ya amuc'tesbonic q'uinal caiy ta ac'opique. Spisil alotic te bitic ya awalique —xi' te Job.