Job 2 - Bible in Tzeltal de Oxchuc y Tenejapa

¹ C'alal c'ot sc'aalelal te ya stejc'an sbaic ta stojol Cajwaltic te abatetic yu'un ta ch'ulchan, c'o stejc'an sba uuc te Satanase.

² Jojc'obot yu'un te Cajwaltic: —¿Banti talat? —xi' sc'oplal. La sjac' te Satanás: —Yacon ta beel ta yoclinel spamal te balumilale —xi'.

³ Jich albot yu'un te Cajwaltic: —¿Ay bal la awilbon te cabat Job? Ma'yuc mach'a yan pajal yo'tan soc ta balumilal, melel jun yo'tan yac'oj sba ta abatinel ta jtojol, soc mero toj yo'tan cuxul ta q'uinal, ma'yuc bila amen spasoj, soc stsajtayej sba te ma'yuc mach'a ya yuts'in. Manchuc me la awac'bon jtojol-lajinbey spisil bitic ay yu'un soc spisil snich'nab, pero stalel jun yo'tan, ma xwejt' bila ya calbeytic ta stojol —xi'.

⁴ Te Satanás jich la yalbey te Cajwaltique: —Te bit'il ma'yuc bila ya xc'ot ta sbaq'uetale, spisil lec ay yilel. Melel te winic ja' nax ya yac' puersa yu'un scoltayel te xcuxlejale.

⁵ Teme ay bila ya awac' c'otuc ta mero sbaq'uetale, ya me awil teme ma ta asituc ya yutat yu'une —xi'.

⁶ Te Cajwaltic jich la yalbey te Satanase: —Lec ay jiche, ya cac'bat ta ac'ab, pero ma awu'unuc stuquel te xcuxlejale —la yut.

⁷ Te Satanás loc' bael ta stojol te Cajwaltique, la sticunbey buen tulan sac'al chin ta snujc'ulel te Job, jajch' ta yacan c'alal ta sjol, potsot yu'un te chamele.

⁸ Ja' yu'un te Job, ba snajc'an sba ta c'ajc'al tan soc la stsac xejt'elul c'a'oxom, la sjux sba a.

⁹ Pero jich albot yu'un te yiname: —¿Puersa acuyoj to aba ta lec? Bolc'optaya te Diose, lajan ta jc'axel —xi'.

¹⁰ La sjac' te Job: —Ants, ma x'ana' q'uinal. Teme jun co'tantic ya quich'tic te bila lec ya yac'botic te Diose, ¿bi yu'un ma ba ya quich'tiquix a jiche te bila amen ya yac'botic tele? —xi' yu'un te Job. Jich ma la sta smul ta stojol Dios te Job. Manchuc me ay swocol, pero ma ba loc' bol c'op ta ye stuquel.

Job bajt' ta ilel yu'un te mach'atic jun yo'tan sba soque

¹¹ Te Job ay oxeb te mach'atic jun yo'tan sba soque: Elifaz, talem ta sq'uinal Temán; Bildad, talem ta sq'uinal Súa; Zofar, talem ta sq'uinal Naamat. Te c'alal la yaiyic te ay swocol te Job, la xchapic te ya xba smuc'ubtesbeyic q'uinal yaiy, soc te ya xba sjoinic ta sc'asesel xc'uxul te swocole.

¹² Q'uejel to ayic a, la staic ta ilel te Job. Melel ma xna'bajix sba ta lec la yilic, ja' yu'un jajch'ic ta aw soc jajch'ic ta oq'uel. Mero bayal la smel yo'tanic. La xch'i' sc'u'ic yu'un, ta yoxebalic la swilesic moel ts'ubil lum ta toyol, soc la smojt'es ts'ubil lum ta sjolic.

¹³ La snajc'an coel sbaic ta lum soc te Job. Juqueb c'aal soc juqueb ajc'ubal ainic tey soc a, pero ma'yuc jp'aluc c'op loc' ta yeic tey a, ja' nax la yilbeyic te swocol te Job te mero bayale.