Job 19 - Bible in Tzeltal de Oxchuc y Tenejapa

¹ La sjac' xan te Job, jich la yal:

² —¿Jayeb to xan buelta ya awac'bonic bayal jwocol, soc te ya awejch'entesbonic co'tan soc te ac'opique?

³ Bayal buelta ya awuts'inonic ta c'op; ¿yu'un bal ma ba ya xq'uexawex yu'un te jich ya apasbonique?

⁴ Manchuc teme yu'unix ay a te jmule, jtuquel nix ya yac'bon jwocol te jichuque.

⁵ Te ja'exe ya acuyic te c'axem jich lequex a te bit'il te jo'one, ya awalbonic ta jsit te bila ay jwocol yu'une.

⁶ Ya me sc'an ya ana'ic te ja' nix Dios te sjinojone, te ja' te yac'ojon ochel ta pejts'e.

⁷ Te jo'one ya x'awunon: “Ay, ya smilonic”, xoon, pero ma'yuc mach'a ya sjac'bon; ya jc'an coltayel, pero ma'yuc mach'a toj bi ya spasbon.

⁸ Dios la smacbonix jbe swenta yu'un ma xc'axon a; la spotsbonix ta ijc' q'uinal te beetic cu'une.

⁹ La spojbonix te jc'ulejale; la yich'bonix jcorona.

¹⁰ Jc'axel la sjinonix jilel; jc'axel la slajinbon soc yisim te bila ay smuc'ul co'tan yu'une.

¹¹ La stiles tel ta jtojol te yilimba, jich c'oon yu'un te bit'il te scontro.

¹² Spisil te soldadoetic yu'un, spisil soc yipic julic ta jtojol; la spas scampamentoic ta sjoyobal jna, la xchajpan sbaic yu'un te ya yac'bonic guerra.

¹³ “Dios jich la sc'an te c'ubic bael ta jtojol te quermanotac,soc nix te mach'aticjun co'tan soque, jich c'oon yu'unic te bit'il jyanlume.

^14-15 Te jchapomal soc te mach'atic jun co'tan soque, la spijt'esonic jilel; te mach'atic nainemic ta jna a, la xch'ayonix ta yo'tanic. Te cabat antsetic cu'unjich ya yilonic te bit'il ma sna'bonic jba; ma sc'aniquix te ya sna'bonic xan jba.

¹⁶ Teme ya quic' jtuluc cabat winic, ma ba ya sjac'bon jc'op, manchuc me ya calbey wocol ta stojol.

¹⁷ Teme ya xnoptsajon ta sts'eel te quiname, ya stenon loq'uel; asta te mero jnich'nab ya yilayoniquix.

¹⁸ Te alaletic ya yilayonic; te c'alal ya xtejc'ajon ta yolilic, amen bi la yalbonic ta jtojol.

¹⁹ Te mach'atic mero jun co'tan jba soque soc te jun ayon soque, ma'yuquix cutsil ta sitic; te mach'atic c'ux ta co'tan, c'atp'ujix ta jcontro.

²⁰ Te jnujc'ulel ya slap' sba ta jbaquel, mero wocol xanix te cuxulone.

²¹ Ja'ex te mero jun co'tan jbajtic, yacuc nix xc'uxbajon ta awo'tanic a, melel te Diose la syalesbonix tel sc'ab ta jtojol.

²² ¿Bi yu'un te ya anutsonic jich te bit'il te Diose? ¿Yu'un bal ma bayaluc buelta la ajomilayon ta ti'el c'oem jiche?

²³ Lec te ayuc mach'a ya sts'ibuy te jc'ope, te yacuc sts'ibuy ta lejch'el taq'uine.

²⁴ Ayuc nix mach'a ya sts'ibuy ta lápiz taq'uin, ta plomo o ta ton te ma'yuc bi ora ya xtup'e.

²⁵ Te jo'on ya jna' te cuxul te jcoltaywanej cu'un, te ja' stuquel te ya xc'opoj cu'un li' ta balumilale.

²⁶ Manchuc me juju-jxejt' ya xlubaj te jnujc'ulele, pero te jo'one ta jcuxlejal ya me quilbey sit te Diose.

²⁷ Jo'on me ta mero jsit ya quil te Diose, mero jo'onix ya quil, ma yanuc a. “Laj quip yu'un la caiy

²⁸ te c'alal la caiy te jich la awalique: “Bayal me ya cuts'intic. Te banti jajch'em tel te swocole ja' nix ta swenta stuquel”, te xaex la caiye.

²⁹ Pero ja' lec te yacuc axi'ic te puñale, ja' te puñal yu'un Dios te ya yac' castigo yu'un a te bila amene. Swenta yu'un ya ana'ic a te ay jtul mach'a toj ya xchajbanwane —xi' te Job.