Job 17 - Bible in Tzeltal de Oxchuc y Tenejapa

¹ “Nopol ya xtup'ix quic' ya caiy; nopolix ay slajibal jcuxlejal, ya smaliyonix te muquenale.

² Ma'yuc mach'atic ayic ta jts'eel, ja'ic nax te mach'atic jlabanwanejetique, ta c'aal ajc'ubal ya sjachbonic quilimba.

³ Pero te ja'at Cajwal, ya xju' ya xc'opojat cu'un. ¿Mach'a yan ya xju' yu'un? Ja'at nax atuquel, Cajwal.

⁴ Ja'at Cajwal te ajowtesbey sjolic, ma xawac' te ya stsalonique.

⁵ Ya me yil swocol ta wi'nal te yal-snich'anic te mach'atic scaj nax majt'anil ya yac' ta c'abal te mach'a jun yo'tan sba soque.

⁶ Ja'at jich la sc'an awo'tan te spisilic amen jc'oplal yu'unique, soc te ya stubtaybonic quelawe.

⁷ Ayix stocalil jsit yu'un te jwocole; te jbaq'uetal snojq'uetal xanix ya caiy te cuxule.

⁸ Te c'alal ya yilon te mach'atic lec yo'tanique, xchajp nax yo'tanic yu'un; ya x'ilinic yu'un, jichon ta yo'tanic te bit'il mach'a ma xyich' ta muc' te Diose.

⁹ Ya yaq'uic puersa ta yalel te toj yo'tanic stuquelic, soc te ma'yuc smul te sc'abique.

¹⁰ Pero la'ic ta apisilic, ma'yuc ya jtabeyex ni jtuluc mach'a p'ij yo'tan ta awolilic.

¹¹ Yac ta c'axel bael te c'aal yu'un te jcuxlejale, te bitic chapal cu'une, soc te bitic ya jmulan spasel, ch'ayix c'axel.

¹² Pero te ja'exe ya ac'atp'unic ta c'aaleltic ta ac'opic te ajc'ubale; manchuc me ijc' te q'uinale, pero ja'ex ya awalic te nopol ay te saquil q'uinale.

¹³ Ja' xanix ya jmaliy te ya xlajone, jich me ya jchawan jba ta wayel ta ijc' q'uinal.

¹⁴ Te jtate, te jme'e, te jbanquile, te quijts'in c'oeme ja' me te yalja, soc te muquenal ch'ene.

¹⁵ ¿Banti jil te bila t'ujbil yacon ta smaliyele? ¿Banti ay te cutsilale?

¹⁶ ¿Ya bal xcoon bael soc ta yawil lajel, swenta yu'un ya join ta cux-o'tan ta ts'ubil lum? —xi' te Job.