Job 15 - Bible in Tzeltal de Oxchuc y Tenejapa

Xchebal buelta c'opojic

¹ La sjac' xan yan buelta te Elifaz te temán-winique, jich la yal:

² —Te mach'a ay sp'ijile, ma tojol jochol c'opuc ya sjac' a te c'opetique, soc ma stoy sba soc c'opetic te pajal soc ic' te ma'yuc swentail ya xbajt'e;

³ ma tojoluc nax ya smulan c'op soc ma xyal c'opetic te ma'yuc tulan sc'oplale.

⁴ Pero te ja'ate ya alajinbey sc'oplal te yich'el ta muc' te Diose; ya acom te sc'oponel Dios ta mero spisil-o'tanile.

⁵ Ja' ta scaj te amen awo'tan, ja' yu'un jich ya xc'opojat, ya xtal ta awo'tan te c'opetic ya xlo'laywane.

⁶ Ma ba wocol ya calbat ta jamal te ay amule, melel ja' nix te awe te ya yac'at ta c'abale.

⁷ “¿Yu'un bal ya acuy te ma'yuc yan winic neel awu'une, soc yu'un bal ya acuy te ja'at neelat yu'un te witstiquile?

⁸ ¿Yu'un bal acuyoj te j'ac'-consejoat yu'un te Diose, soc yu'un bal ya acuy te ja'at nax atuquel mero p'ijat ta balumilale?

⁹ ¿Bitic ana'oj ta ac'op te ma ba jna'ojtic? ¿Bitic ana'ojbey sba ta ac'op te ma jna'beytic sba uuque?

¹⁰ Te jo'otic yijil winicotiquix, bayal bitic quilojtic a te bit'il atate.

¹¹ “¿Ma bal tic'ucat a te ya smuc'ubtesbat q'uinal awaiy te Diose, soc te bit'il buen lamal co'tantic a ya jc'oponticate?

¹² ¿Bi stuc te ya awac' stsalat te awo'tane, soc te ya xloq'uix c'ajc' yilel ta asite?

¹³ ¿Bi yu'un ya xc'ajc'ubat ta stojol te Diose, soc te jamal awo'tan ya asujt'esbey sc'op te Diose?

¹⁴ Ma'yuc winic te mero leque, ma'yuc mach'a libre ay yu'un smul.

¹⁵ Teme ma junuc yo'tan Dios ta stojol te ch'ul abatetique, teme ni ja'uc te ch'ulchan mero lec ta ilel ya yile,

¹⁶ ja'uc to balix a jiche te winic te boloben soc te ilaybil sba, te ya yuch' c'oem te bila amen te bit'il ay ta uch'el te ja'e.

¹⁷ “Aiybon awaiy jc'op, ay bila ya calbat awaiy, ja' ya calbat awaiy te bila jna'oj soc te bila quiloj,

¹⁸ ja' te bi ya yac' jnoptic te mach'atic p'ij yo'tanique. Ja'ic te la snopic ta swenta te antiguo sme'-statique,

¹⁹ ja'ic te mach'atic ac'botic te lumq'uinale, ja'ic te ma ba capalic soc jyanlumetique.

²⁰ “Te winic te spisil ora ya spas te bila ma stojiluque soc te bayal ya x'uts'inwan, mero com te xcuxlejale soc ya xc'ax bayal swocol.

²¹ Teme ay bila ya yaiye, ya xiwtesot yu'un ta ora; te c'alal mero jun yo'tan a, ya x'elc'anbot sbiluc yu'un j'eleq'uetic.

²² Ma ja'uc yac ta smaliyel te ya xcol ta stojol te ijc' q'uinale; ja' nax yac ta smaliyel puñal te ya xmilot yu'une.

²³ Te sbaq'uetal ya xtuun yu'un swe'el xulemetic; sna'oj stuquel te puersa ya yich' lajinele.

²⁴ Ja' me ya xiwtesot yu'un te ijc' q'uinale, ya me xmacot ta be yu'un c'oem te c'uxul woclajel soc te c'uxul mel-o'tanile, jich te bit'il muc' ajwalil ya xtenawan ta guerra.

²⁵ “Ja' me jich ya xc'ot ta stojol te mach'a ya stoy sc'ab ta scontroinel te Diose, ja' te ma xi' ya stoy sba ta stojol te Mach'a Spisil ya xju' yu'une,

²⁶ ja' te mach'a ya yich' smajq'uil yu'un ya yac'bey guerra te Diose.

²⁷ Mero jujp'en te sit-yelawe, soc alubix yu'un sjujp'el te xch'ujt'e.

²⁸ Te lumetic banti ya xnain, ja' me te jinemiquixe; ch'aybil me ya xjil te nanatique, busajtic me ya xjil ta jinel.

²⁹ Ma spisiluc ora ay sc'ulejal, soc ma xmuc'ub sq'uinal ta balumilal.

³⁰ Ma xju' ya scoltay sba ta stojol te ijc' q'uinale. Pajal soc te' te ya xchic'ot ta c'ajc' te spule, soc te ya x'eanot bael ta ic' te sniche.

³¹ Ma me ja'uc ya smuc'ulin yo'tan te lo'laywaneje, melel ja' nax ya sta lo'layel yu'un.

³² Te c'alal ma to sta yoraile, ya xjajch'ix ta sayubel a te sc'abc'abe, tey ma'yuquix bi ora ya xcha'yaxub xan a.

³³ Pajal soc te ts'usub te ma ba ya sta syijil te site, pajal soc te olivo te ya xlubaj te sniche.

³⁴ Te mach'atic ma xyich'ic ta wenta Dios ma'yuc sts'umbal ya xjil ta q'uinal. Te nanatic yu'une, te buen ch'albil yu'un ta slo'laybil taq'uine, ilaybil sba, ya me xtilic ta c'ajc'.

³⁵ La yic' yal c'oem, ja' la swol ta xch'ujt' te amen-o'tanile, c'alal la yayintes c'oem, ja' ayin te wocolil ta q'uinale; te sit ya yaq'ue, ja' te lo'laywaneje —xi' te Elifaz.